1. ‘Ona galulue lea o Pesaleli, ma Aliavu, ma tagata popoto uma lava, o ē na avatu i ai e le ALI‘I le poto ma le mafaufau, ‘ina ‘ia iloa ai e galulue i le galuega uma lava mo le sauniga o le malumalu e tusa ma mea uma lava na poloa‘i mai ai le ALI‘I.
2. ‘Ua vala‘au Mose ‘iā Pesaleli, ma Aliavu, ma tagata popoto uma lava ē na avatu i ai e le ALI‘I le poto i o latou loto, e ta‘ito‘atasi uma ‘ua ua‘i i ai o latou loto e ō mai i le galuega ‘ina ‘ia faia.
3. ‘Ua latou ‘ave fo‘i nai luma o Mose le taulaga uma lava ‘ua ‘aumaia e le fānauga a Isaraelu mo le galuega o le sauniga o le malumalu e fai ai; na latou ‘aumai ai pea ‘iā te ia ma le loto i lea taeao ma lea taeao.
4. ‘Ona ō mai lea o tagata popoto uma lava ē ‘ua faia le galuega uma o le malumalu, e ta‘itasi ma sau mai lana galuega ‘ua latou faia.
5. ‘Ua latou fai mai ‘iā Mose, ‘ua fa‘apea mai, “‘Ua tele lava mea ‘ua ‘aumai o le nu‘u e sauni ai le galuega na poloa‘i mai ai le ALI‘I ‘ia faia, o le a totoe.”
6. ‘Ona poloa‘i lea o Mose, ‘ia latou fa‘asalalauina le ‘upu i le togālauapi, o lo‘o fa‘apea: “Sōia le toe faia e se tane po o se fafine se galuega mo le taulaga i le malumalu.” ‘Ona vaoia lea o le nu‘u, ‘ua lē toe ‘aumai ai.
7. Auā o mea ‘ua faia ‘ua lava ia i galuega uma e fai ai, e totoe lava.
8. O ē popoto uma lava i ē ‘ua faia le galuega o le malumalu, ‘ua latou faia ‘ie puipui e tasi le sefulu i le ‘ie vavae ‘ua milo ona manoa, ma le ‘ie uli, ma pāuli, ma le mūmū; ‘ua ia fai i ai kerupi i le galuega a le tufuga poto.
9. E luafulu ma le valu o kupita le umi o le ‘ie puipui e tasi, ma le lau o le ‘ie puipui e tasi e fa ona kupita; ‘ua gatasi fua o le puipui uma.
10. ‘Ona fa‘aso‘oso‘o lea e ia o ‘ie puipui e lima, o le tasi i le tasi ‘ua na fa‘aso‘oso‘o fo‘i le isi lima o ‘ie puipui, o le tasi i le tasi.
11. ‘Ua ia faia fo‘i fa‘amaufa‘alave i le ‘ie uli i le tafatafa o le tasi le puipui i le tafatafa e so‘o ai; ‘ua ia fai fa‘apenā fo‘i i le tafatafa lava o le tasi ‘ie puipui i le mea e so‘o ai ma le tasi.
12. ‘Ua ia faia fa‘amaufa‘alave e limagafulu i le tasi ‘ie puipui, ma fa‘amaufa‘alave e limagafulu i le tafatafa o le ‘ie puipui i le mea e so‘o ai ma le tasi; o fa‘amaufa‘alave ia ‘ua fa‘amauina le tasi i le tasi.
13. ‘Ua ia faia fo‘i fa‘amau auro e limagafulu, ma na fa‘aso‘oina ai ‘ie puipui o le tasi i le tasi i fa‘amau; i le ‘ua fai ma malumalu e tasi.
14. ‘Ua ia faia fo‘i ‘ie puipui i fulufulu ‘oti e fai ma ufi i luga o le malumalu ‘ua ia faia ‘ie puipui e sefulu ma le tasi;
15. e tolugafulu kupita le umi o le ‘ie puipui e tasi e fa fo‘i kupita le lau o le ‘ie puipui e tasi e tasi le fua o ia le puipui e sefulu ma le tasi.
16. ‘Ua ia fa‘aso‘oina ‘ie puipui e lima, ‘ia fa‘atasi, ma ‘ie puipui e ono, ‘ia fa‘atasi.
17. ‘Ua ia faia fo‘i fa‘amaufa‘alave e limagafulu i le tafatafa o le ‘ie puipui i le mea e so‘o ai; ‘ua ia faia fo‘i fa‘amaufa‘alave e limagafulu i le tafatafa o le tasi ‘ie puipui i le mea e so‘o ai ma le tasi.
18. ‘Ua ia faia fo‘i fa‘amau ‘apamemea e limagafulu e fa‘aso‘oina ai le fale fetāfa‘i, ‘ina ‘ia tasi.
19. ‘Ua ia faia fo‘i le ufiufi mo le fale fetāfa‘i i pa‘u mamoe po‘a fa‘alanu ulaula ma le ufiufi o pa‘u takesa e lau aluga.
20. ‘Ua ia faia fo‘i laupapa mo le malumalu i le la‘au o le setima, ‘ua fa‘atutū.
21. E tasi le sefulu o kupita o le umi lea o le laupapa e tasi, o le kupita e tasi fo‘i ma le vaeluagalemū o le kupita o le lau lea o le laupapa e tasi.
22. E lua mea fa‘anifo i le laupapa e tasi, ‘ua fa‘afeagai le tasi i le tasi, ‘ua fa‘apea ‘ona faia e ia o laupapa uma lava o le malumalu.
23. ‘Ua ia faia fo‘i laupapa mo le malumalu, o laupapa e luafulu mo le itū i saute, e feagai lea ma le itū i saute;
24. e fagafulu fo‘i lago ario ‘ua faia e ia i lalo o laupapa e luafulu; e lua lago i lalo o le laupapa e tasi, e fa‘atatau i mea, fa‘anifo e lua ma lago e lua i lalo o le tasi laupapa, e fa‘atatau i mea fa‘anifo e lua.
25. ‘Ua ia faia fo‘i laupapa e luafulu mo le tasi itū o le malumalu, o lo‘o i le itū i matū lea.
26. E fagafulu fo‘i o latou lago ario; e lua lago i lalo o le tasi laupapa, ma lago e lua i lalo o le tasi laupapa.
27. ‘Ua ia faia fo‘i laupapa e ono mo itū i sisifo o le malumalu.
28. E lua fo‘i laupapa ‘ua faia e ia i tulimanu o le malumalu i ona itū e lua.
29. ‘Ua fa‘aso‘oina fo‘i ia papa ‘ua fa‘agatasi i lalo, e fa‘aso‘oina fo‘i i luga i le fa‘amaumama e tasi ‘ua fa‘apea ‘ona faia ia mea e lua i tulimanu e lua.
30. O laupapa ia e valu, ma o latou lago ario e tasi le sefulu ma le ono, o lago ia ‘ua ta‘ilua i lalo o laupapa.
31. ‘Ua ia faia fa‘alava e lima i le la‘au o le setima, mo laupapa i le tasi itū o le malumalu;
32. e lima fo‘i fa‘alava mo laupapa i le isi itū o le malumalu; e lima fo‘i fa‘alava mo laupapa o le malumalu i ona itū e lua i sisifo.
33. ‘Ua ia faia fo‘i le fa‘alava vaeloto ‘ina ‘ia sulu i totonugalemū o laupapa, e gata mai i le tasi pito fale, e gata atu fo‘i i le tasi pito.
34. ‘Ua ia ufiufi fo‘i laupapa i le auro; ‘ua na faia fo‘i o latou fa‘amaumama i le auro, e sulu ai fa‘alava, ma na ufiufi fa‘alava i le auro.
35. ‘Ua ia faia fo‘i le puipui ‘ie uli, ma le pāuli, ma le mūmū, ma le ‘ie vavae ‘ua milo ona manoa; ‘ua ia fai i ai kerupi i le galuega a le tufuga poto.
36. ‘Ua ia faia fo‘i mo lea mea o pou setima e fa, ma na ufiufi ai i le auro, o le auro fo‘i ona fa‘amau; ‘ua ia tunu le ario ‘ua fai a‘i ona lago e fa.
37. ‘Ua ia faia fo‘i le puipui tautau mo le faitoto‘a o le fale fetāfa‘i i le ‘ie uli, ma le pāuli, ma le mūmū, ma le ‘ie vavae ‘ua milo ona manoa, o le galuega a le tufuga fai ‘ie lanu ‘ese‘ese;
38. ma ona pou e lima, ma o latou fa‘amau; ma na ufiufi fo‘i o latou pito i luga ma le amo pou i le auro; a o latou lago e lima, o le ‘apamemea ia.