1. ‘Ua alu ane fo‘i le tasi tagata o le ‘āiga o Levi ‘ua fai avā i le afafine o Levi.
2. ‘Ona tō lea o le fafine, ‘ua fānau mai le tama, tane; ‘Ua ia iloa o ia ‘ua lālelei, ‘ona ia nā lava lea ‘iā te ia i masina e tolu.
3. ‘Ua lē toe mafai ‘ona nā ‘iā te ia, ‘ona ia ‘ave lea mo ia o le ‘ato kome, na ia puluti ai i le pulu emeri, ma le pulu safeta; na ia tu‘u ai le tama, ‘ona tu‘uina ai lea i le vao utuutu i le ‘auvai o le vaitafe.
4. A ‘ua tu mamao atu lona tuafafine ‘ina ‘ia iloa pe i‘u ‘ina fa‘apefea o ia.
5. ‘Ona alu ifo lea o le afafine o Farao e tā‘ele i le vaitafe, o sāvavali ane fo‘i lona galu teine i le ‘auvai o le vaitafe; ‘ua iloa atu e ia le ‘ato o lo‘o i le vao utuutu, ‘ona ‘auina atu lea e ia o lana ‘au‘auna fafine na te ‘aumaia.
6. ‘Ua ia tatalaina, ‘ua iloa ai le tama, fa‘auta fo‘i, ‘ua tagi le tama; ‘ona alofa lea i ai, ‘ua fa‘apea ane, “O so le fānau a sa Eperū lenei.”
7. ‘Ona fai mai lea a lona tuafafine i le afafine o Farao, “‘Ou te alu ‘ea e ‘a‘ami se fafine failele o sa Eperū e sau ‘iā te oe, na te tausia le tama ma oe?”
8. ‘Ua fai atu le afafine o Farao ‘iā te ia, “‘Inā alu ia;” i le ‘ua alu ane le teine ma vala‘au i le tinā o le tama.
9. ‘Ona fai atu lea o le afafine o Farao ‘iā te ia, “‘Ia e ‘ave lenei tama ma tausi i ai ma a‘u, ‘ou te avatu ai fo‘i ‘iā te oe le totogi;” ‘ona ‘ave lea o le tama e le fafine ma na tausia.
10. ‘Ua matua le tama, ‘ona ia avatu lea i le afafine o Farao, i le ‘ua fai ai māna tama; ‘ua ia fa‘aigoa ‘iā te ia, o Mose, “auā” o lo‘o fa‘apea ana, “Na ‘ou tōina a‘e o ia nai le vai.”
11. ‘Ua o‘o i ona po na matua ai Mose, ‘ona alu atu lea o ia i ona uso, ‘ua na va‘ai atu fo‘i ‘iā latou avega mamafa; ‘ua ia iloa fo‘i le tagata Aikupito ‘ua fasi le tagata sa Eperū o so lona ‘au uso.
12. ‘Ua ia feva‘ava‘aia‘i i lea itū ma lea itū, ‘ua iloa e ia e leai se tagata, ‘ona fasi loa e ia le Aikupito ma ‘ua natia i le oneone.
13. ‘Ona alu atu lea o ia i le aso a taeao, fa‘auta, o tagata sa Eperū e to‘alua o lo‘o femisa‘i; ‘ona fai atu lea o ia i lē ‘ua sesē, “Se a ‘ea le mea ‘e te fasi ai i lē lua te to‘alua?”
14. ‘Ona fai mai lea o ia, “O ai ‘ea na tofia mai oe e fai ma ali‘i ma fa‘amasino ‘iā te i mā‘ua. ‘Ua e manatu ‘ea e fasioti ‘iā te a‘u fa‘apei ‘ona e fasiotia le Aikupito?” ‘Ona fefe ai lea o Mose, ‘ua fa‘apea ana, “E moni lava ‘ua iloa lea mea.”
15. ‘Ua fa‘alogo Farao i lenā mea, ‘ona fia fasioti lea o ia ‘iā Mose; ‘ona sola ‘ese lea o Mose ‘iā Farao, ‘ua nofo i le nu‘u o Mitiana; ‘ua ia nofo fo‘i i luga o le vai‘eli.
16. Sa i le ositaulaga i Mitiana o afafine e to‘afitu; na latou ō e utu ai vai, ‘ua fa‘atūtūmuina fo‘i o mea e inu ai e fa‘ainu ai le lafu mamoe o lo latou tamā;
17. A ‘ua ō mai leoleo mamoe, ma tutuli ‘iā te i latou; ‘ona tula‘i lea o Mose ma lavea‘i ‘iā te i latou, ma fa‘ainu lo latou lafu mamoe.
18. ‘Ua latou ō atu i lo latou tamā o Reuelu, ‘ona fai mai lea o ia, “Se a ‘ea le mea ‘ua ‘outou vave mai ai i lenei aso?”
19. ‘Ona latou fai atu lea, “O le tagata Aikupito na lavea‘i mai ‘iā i matou i lima o leoleo mamoe ma na utu mai le vai ma matou, ma na fa‘ainu le lafu mamoe.”
20. ‘Ona fai mai lea o ia i ona afafine, “Po o fea o i ai o ia? Se a le mea ‘ua ‘outou tu‘una ai le tagata? ‘Inā vala‘au lava ‘iā te ia, ‘ina ‘ia ‘ai sina ana mea.”
21. ‘Ua lelei fo‘i ‘iā Mose la te nonofo ma lea tagata; ‘ua ia avatu fo‘i lona afafine o Sepora ‘iā Mose e fai māna avā.
22. ‘Ua ia fānauina ai le tama tane; ‘ua fa‘aigoa e Mose ‘iā te ia, o Keresoma, Auā sa fa‘apea ana, “‘Ua ‘ou āumau i le nu‘u ‘ese.”
23. ‘Ua mavae atu ia aso e tele, ‘ona oti lea o le tupu o Aikupito; a ‘ua mapuitigā le fānauga a Isaraelu ‘ona o le galuega; ‘ua ‘alalaga fo‘i, ‘ua o‘o a‘e lava i le Atua lo latou ‘alaga ‘ona o la latou galuega.
24. ‘Ua fa‘afofoga fo‘i le Atua i lo latou feoi, ‘ua manatua fo‘i e le Atua i lana feagaiga na na faia ma Aperaamo, ma Isaako, ‘atoa ma Iakopo.
25. ‘Ua silasila mai fo‘i le Atua i le fānauga a Isaraelu ma ‘ua silafia i latou e le Atua.