1. ‘Ua latou faia fo‘i i le ‘ie uli ma le pāuli ma le mūmū, o ‘ie o mea e fai a‘i le tapua‘iga e ‘au‘auna ai i le mea pa‘ia; ‘ua latou fai ai fo‘i ‘ofu sa mo Arona, fa‘apei ‘ona poloa‘i mai ai o le ALI‘I ‘iā Mose.
2. ‘Ua faia fo‘i e ia o le efota i le auro ma le ‘ie uli ma le pāuli ma le mūmū ma le ‘ie vavae ‘ua milo ona manoa.
3. ‘Ua latou tu‘itu‘i i le auro ‘ina se‘ia salafalafa ma manifinifi, ‘ua selesele ai e fai ma manoa, ‘ina ‘ia lalaga i le ‘ie uli ma le pāuli, ma le mūmū, ma le ‘ie vavae i le galuega a le tufuga poto.
4. ‘Ua latou fai ai fo‘i ona tau‘au ‘ua fa‘aso‘oina ai, ‘ua fa‘aso‘oina i ona tafatafa e lua.
5. O ia lava mea na fai a‘i le fusi fa‘alanu ‘ese‘ese o lona efota, o i ona luga, e pei o le galuega e i ai, o le auro, ma le ‘ie uli, ma le pāuli, ma le mūmū, ma le ‘ie vavae ‘ua milo ona manoa, e pei ‘ona poloa‘i mai ai le ALI‘I ‘iā Mose.
6. ‘Ua latou teu fo‘i ma‘a soama ‘ua fa‘amauina ai i ta‘ai auro, ‘ua togitogiina ai o igoa o atali‘i o Isaraelu, e pei o le togitogiga o le fa‘amaufa‘ailoga.
7. ‘Ua ia tu‘uina ai fo‘i ia ma‘a i tau‘au o le efota, o ma‘a e manatuaina ai le fānauga a Isaraelu, pei ‘ona poloa‘i mai ai o le ALI‘I ‘iā Mose.
8. ‘Ua ia faia fo‘i le ufifatafata i le galuega a le tufuga poto, e tusa ma le galuega o i le efota, i le auro, ma le ‘ie uli, ma le pāuli, ma le mūmū, ma le ‘ie vavae ‘ua milo ona manoa.
9. ‘Ua latou faia fa‘atafafā, ma ‘ua fa‘asautualua le ufifatafata; o le aga e tasi lona umi, ma le aga e tasi lona lau, ‘ua fa‘asautualua.
10. ‘Ua latou fa‘amau fo‘i i ai o atu ma‘a e fa, o le atu ma‘a, o le salikea, ma le topasi, ma le pereketa; o le atu ma‘a muamua lea.
11. O lona atu lua, o le nofeka, ma le safaira, ma le ialoma;
12. o lona atu tolu fo‘i, o le lesema, ma le sevo, ma le aselama;
13. o lona atu fa fo‘i, o le tasesa, ma le soama, ma le iasepi ‘ua fa‘amauina lava ia i le ta‘ai auro i o latou tu‘ugāma‘a.
14. ‘Ua tutusa fo‘i ia ma‘a ma igoa o atali‘i o Isaraelu, ‘ua sefulu ma le lua, e tusa ma o latou igoa, pei o le togitogiga o le fa‘amaufa‘ailoga, e ta‘itasi ma lona igoa, e tusa ma itū‘āiga e sefulu ma le lua.
15. ‘Ua latou faia fo‘i i luga o le ufifatafata o filifili auro lelei e tutusa, o le galuega fa‘afilifili u‘amea.
16. ‘Ua latou faia fo‘i ta‘ai auro e lua, ma mama auro e lua, ‘ua tu‘uina fo‘i ia mama e lua i pito e lua o le ufifatafata.
17. ‘Ua latou tu‘uina fo‘i ia filifili auro e lua i mama e lua i pito o le ufifatafata.
18. O pito fo‘i e lua o filifili auro e lua, ‘ua latou fa‘amauina i ta‘ai e lua, ‘ua tu‘uina fo‘i i tau‘au o le efota i ona luma.
19. ‘Ua faia fo‘i e i latou o mama auro e lua, ma tu‘uina i ona pito e lua o le ufifatafata i lona tafatafa lava o lo‘o fa‘asaga i le efota i totonu.
20. ‘Ua latou faia fo‘i o isi mama auro e lua, ma latou tu‘u ai i itū e lua i lalo o le efota, e lata ane i lona itū i luma, e felāta‘i ma le mea e fa‘aso‘o ai i luga o le fusi fa‘alanu ‘ese‘ese o le efota.
21. ‘Ua latou nonoa fo‘i le ufifatafata i ona mama, i mama o le efota i le manoa uli, ‘ina ‘ia i luga a‘e o le fusi fa‘alanu ‘ese‘ese o le efota, ‘ina ne‘i te‘a ‘ese le ufifatafata i le efota; fa‘apei ‘ona poloa‘i mai ai o le ALI‘I ‘iā Mose.
22. ‘Ua ia faia fo‘i le ‘ofu talaloa o le efota, ‘ua ‘ato‘atoa i le ‘ie uli ‘ua lalagaina.
23. ‘Ua i ai fo‘i i le ‘ofu talaloa se ‘ua i totonu, e pei o le ua o le ‘ofutau, ma le mea na afei fa‘ata‘ali‘oli‘o ai le ‘ua ne‘i māsae.
24. ‘Ua latou faia fo‘i i tafatafa o le ‘ofu o rimoni i le ‘ie uli, ma le pāuli, ma le mūmū, ‘ua milo ona manoa.
25. ‘Ua latou faia fo‘i tagitagi i le auro lelei, ma tu‘uina i vā o rimoni i le tafatafa o le ‘ofu, ‘ua fa‘ata‘ali‘oli‘oina ai i le vā o rimoni.
26. O le tagitagi ma le rimoni, o le tagitagi ma le rimoni i tafatafa o le ‘ofu talaloa, o lo‘o fa‘ata‘ali‘oli‘oina ai, ‘ina ‘ia ‘au‘auna ai; fa‘apei ‘ona poloa‘i mai ai o le ALI‘I ‘iā Mose.
27. ‘Ua latou faia fo‘i ‘ofu tino i le ‘ie vavae ‘ua lalagaina, mo Arona ‘atoa ma ona atali‘i;
28. ma le pulou o le ‘ie vavae, ma pulou matagofie o le ‘ie vavae, ma ‘ofuvae i le ‘ie vavae ‘ua milo ona manoa;
29. ma le fusi i le ‘ie vavae ‘ua milo ona manoa, ma le ‘ie uli, ma le pāuli, ma le mūmū, o le galuega a le tufuga fai ‘ie lanu ‘ese‘ese; e pei ‘ona poloa‘i mai ai o le ALI‘I ‘iā Mose.
30. ‘Ua latou faia fo‘i le mea pupula i le pale pa‘ia i le auro lelei; ma latou tusi ai le ‘upu, pei o togitogiga o le fa‘amaufa‘ailoga, “E PA‘IA I LE ALI‘I.”
31. ‘Ua latou tu‘u fo‘i i ai le manoa uli, e fa‘amauina ai i luga i le pulou; e pei ‘ona poloa‘i mai ai o le ALI‘I ‘iā Mose.
32. ‘Ona uma lea o le galuega uma lava o le malumalu o le fale fetāfa‘i o le fa‘apotopotoga. ‘Ua faia fo‘i e le fānauga a Isaraelu e pei o mea uma na poloa‘i mai ai le ALI‘I ‘iā Mose, ‘ua fa‘apea lava ‘ona latou faia.
33. ‘Ua latou avane fo‘i le malumalu ‘iā Mose, o le fale fetāfa‘i ma ana mea uma, o ona fa‘amau, ma ona laupapa, o ona fa‘alava, ma ona pou, ma ona lago;
34. ma le ufiufi o pa‘u mamoe po‘a ‘ua fa‘alanu ulaula, ma le ufiufi o pa‘u takesa, ma le ‘ie puipui e ufiufi a‘i.
35. O le ‘atola‘au o le tulafono ma ona amo; ma le nofoa o le alofa;
36. o le la‘o‘ai ma ana mea uma, ma le areto e laulauina i luma.
37. O le tu‘ugālamepa auro lelei ma ona lamepa, o lamepa e teuteua ia lelei, ma ana mea uma, ‘atoa ma le suāu‘u e mū a‘i le afi;
38. ma le fata auro, ma le u‘u e fa‘au‘u ai, ma mea manogi e mū, ma le ‘ie puipui mo le faitoto‘a o le fale fetāfa‘i,
39. o le fata ‘apamemea ma lona ta‘igaafi ‘apamemea, o ona amo, ma ana mea uma, o le tanoa e mulumulu ai ma lona tulaga.
40. O ‘ie puipui o le lotoā, o ona pou ma ona lago, ma le ‘ie puipui mo le faitoto‘a o le lotoā, o ona maea ma ona fa‘amau; ‘atoa ma mea uma lava e fai a‘i le sauniga o le malumalu mo le fale fetāfa‘i o le fa‘apotopotoga.
41. O ‘ie o mea e fai a‘i le tapua‘iga i le mea pa‘ia, ‘atoa ma ‘ofu pa‘ia mo le ositaulaga o Arona, ma ‘ofu o ona atali‘i e fai ai le faiva o ositaulaga.
42. ‘Ua faia e le fānauga a Isaraelu le galuega uma lava, a pei o mea uma na poloa‘i mai ai le ALI‘I ‘iā Mose.
43. ‘Ona va‘ava‘ai lea o Mose i le galuega uma lava; fa‘auta lava, ‘ua latou faia e pei ‘ona poloa‘i mai ai o le ALI‘I, ‘ua fa‘apea lava ‘ona latou faia; ‘ona fa‘amanuia lea o i latou e Mose.