1. ‘Ua fetalai mai fo‘i le ALI‘I ‘iā Mose, ‘ua fa‘apea mai:
2. ‘Ia e fai atu i le fānauga a Isaraelu, ‘ia latou ‘aumai le taulaga ‘iā te a‘u, e ta‘itasi le tagata ma le mea ‘ua manatu fua i ai i lona loto, tou te talia mai ai le taulaga ‘iā te a‘u.
3. O le taulaga fo‘i lenei tou te talia mai ‘iā i latou, o le auro, ma le ario, ‘atoa ma le ‘apamemea;
4. ma ‘ie uli, ma le pāuli, ma le mūmū, ma le ‘ie vavae, ma fulufulu ‘oti,
5. ma pa‘u mamoe po‘a ‘ua fa‘alanu ulaula, ma pa‘u takesa, ma le la‘au o le setima;
6. o le suāu‘u e mū a‘i le afi, o mea manogi e manogi a‘i ‘ie u‘u e u‘u a‘i, e fai a‘i fo‘i le mea manogi lelei e mū;
7. o ma‘a soama, ma ma‘a e teu ai i le efota, ‘atoa ma le ufifatafata.
8. ‘Ia latou faia fo‘i mo a‘u se malumalu, ‘ou te nofo ai fa‘atasi ma i latou.
9. E tusa ma mea uma lava ‘ou te fa‘aali ai ‘iā te oe, pei o le fa‘atusa o le malumalu, ma le fa‘atusa o ana mea uma lava; ‘ia fa‘apea ‘ona ‘outou faia.
10. ‘Ia latou fai fo‘i le ‘atola‘au i le la‘au o le setima; e lua kupita ma le vaeluagalemū o le kupita lona umi, o le kupita ma le vaeluagalemū o le kupita lona lau, o le kupita fo‘i ma le vaeluagalemū o le kupita lona maualuga.
11. ‘Ia e ufiufi fo‘i i ai i le auro lelei i totonu ma tua ‘e te ufiufi ai; ‘ia e fai fo‘i i ona luga o le pale auro e si‘osi‘oina ai.
12. ‘Ia e tunu le auro i le fai a‘i o mama e fa, ma ‘ia e tu‘uina i ona tuli ‘ato e fa, e lua mama i le tasi ona itū, e lua fo‘i mama i le tasi ona itū.
13. ‘Ia e fai fo‘i amo o le la‘au o le setima, ma ‘ia e ufiufi ai i le auro;
14. ‘ona e sulu atu lea o amo i totonu o mama i ona itū o le ‘atola‘au e amo a‘i le ‘atola‘au.
15. ‘Ia tu‘u pea lava amo i mama o le ‘atola‘au, ‘aua le ‘ave‘eseina ai.
16. ‘Ia e tu‘u fo‘i i totonu o le ‘atola‘au le tulafono ‘ou te avatu ai ‘iā te oe.
17. ‘Ia e fai fo‘i le nofoa o le alofa i le auro lelei; e lua kupita ma le vaeluagalemū o le kupita lona umi, o le kupita fo‘i e tasi ma le vaeluagalemū o le kupita lona lau.
18. ‘Ia e fai fo‘i kerupi auro e lua ‘ia e togitogi fa‘amamanuina i pito e lua o le nofoa o le alofa.
19. ‘Ia e fai le tasi kerupi i le tasi pito nofoa, o le tasi fo‘i kerupi i le tasi pito nofoa; o le mea e fai a‘i le nofoa o le alofa tou te fai ai fo‘i kerupi i ona pito nofoa e lua.
20. E fālō fo‘i e kerupi o la ‘apa‘au i luga, ‘ia fa‘amalumalu ifo le nofoa o le alofa i o la ‘apa‘au; e fesagai fo‘i o la mata; ‘ia fa‘asaga fo‘i o mata o kerupi i le nofoa o le alofa.
21. ‘Ia e fa‘ae‘e fo‘i le nofoa o le alofa i luga o le ‘atola‘au, ‘e te tu‘u fo‘i i le ‘atola‘au o le tulafono ‘ou te avatu ai ‘iā te oe.
22. Tā te fetaia‘i ma a‘u i lea mea, ma ‘ou tautala atu ‘iā te oe a‘i luga o le nofoa o le alofa, a‘i le vā o kerupi e lua i luga o le ‘atola‘au o le tulafono, i mea uma lava ‘ou te fai atu ai ‘iā te oe, ‘e te fai atu i le fānauga a Isaraelu.
23. ‘Ia e fai fo‘i le la‘o‘ai i le la‘au o le setima, e lua kupita lona umi, o le kupita e tasi lona lau, o le kupita ma le vaeluagalemū o le kupita lona maualuga.
24. ‘E te ufiufi ai fo‘i i le auro lelei, ma fai ai le pale auro e si‘osi‘oina ai.
25. ‘E te fai ai fo‘i o lona tafatafa i lalo e si‘osi‘oina ai, o le lautele o le alofilima e tasi lona lau ma ‘ia e fai le pale auro mo le tafatafa i lalo e si‘osi‘oina ai.
26. ‘Ia e fai ai fo‘i mama auro e fa ma tu‘u ta‘itasi mama i ona tuli la‘o‘ai e fa i ona vae e fa;
27. ‘ia felāta‘i mama ma le tafatafa i lalo, e fai ma mea e tu‘u ai amo, e amo a‘i le la‘o‘ai.
28. ‘E te fai ona amo i le la‘au o le setima, ma ufiufi ai i le auro, e amo a‘i le la‘o‘ai.
29. ‘E te fai fo‘i ona tanoa salalafa ma ona ipu, o ona tanoa, ma ona ipu e asu a‘i, e liligi i ai; ‘e te faia ia mea i le auro lelei.
30. ‘E te laulauina fo‘i i luga o le la‘o‘ai o le areto e laulauina i luma, ‘ia lē aunoa i o‘u luma.
31. ‘E te fai fo‘i le tu‘ugālamepa i le auro lelei, ‘e te fai ai le tu‘ugālamepa e togitogi fa‘amamanuina, e faia i lea lava mea o lona ‘au ma ona maga, ma ona ipu fa‘a‘ofu‘ofu o ona pona, ma ona fuga.
32. E ō atu maga e ono i ona itū, e tolu maga o le tu‘ugālamepa i le tasi itū, e tolu fo‘i maga o le tu‘ugālamepa i le tasi itū.
33. E tolu ipu fa‘a‘ofu‘ofu e pei o sekati, o le pona fo‘i ‘atoa ma le fuga i le maga e tasi, e tolu fo‘i ipu fa‘a‘ofu‘ofu e pei o sekati i le tasi maga, o le pona ma le fuga; ‘ia fa‘apea i maga e ono e ō atu nai le tu‘ugālamepa.
34. E i le tu‘ugālamepa fo‘i o ipu fa‘a‘ofu‘ofu e fa e pei o sekati, o ona pona ‘atoa ma ona fuga,
35. o le pona i lalo o isi ona maga e lua ma le pona i lalo o isi ona maga e lua, ma le pona i lalo o isi ona maga e lua; e fa‘atatau i maga e ono e ō atu nai le tu‘ugālamepa.
36. O lea lava mea e fai a‘i ona pona ma ona maga; e faia ‘atoa uma i le auro lelei e tasi e togitogi fa‘amamanuina.
37. ‘E te fai ai fo‘i ona lamepa e fitu, na te fa‘ae‘e i luga fo‘i ona lamepa e fa‘amalamalama a‘i i ona lava luma.
38. E fai fo‘i ona selelamepa ma ona tu‘ugāmatapa‘u o le afi i le auro lelei,
39. e fai ai i le taleni o le auro lelei ‘atoa ma ia mea uma lava.
40. ‘Ia oe lava, ‘ia e faia e pei o le fa‘atusa sa fa‘aali atu ‘iā te oe i le mauga.#