1. ‘Ona pepese ai lea o Mose ma le fānauga a Isaraelu i lenei pese i le ALI‘I, ‘ua latou fai ane, o lo‘o fa‘apea,“‘Ou te pese i le ALI‘I, auā ‘ua matuā manumālō o ia;o le solofanua ‘atoa ma lē na ti‘eti‘e ai, ‘ua ia lafoina i le sami.
2. O le ALI‘I, o lo‘u malosi ia ma la‘u pese,‘ua fai fo‘i o ia mo‘u olataga.O lo‘u Atua lenei, ‘ou te fa‘ane‘ene‘e i ai;o le Atua o lo‘u tamā, ‘ou te vivi‘i lava ‘iā te ia.
3. O le ALI‘I, o le toa lava ia,o le ALI‘I o lona suafa lea.
4. “O kariota o Farao ma lana itū tau‘a ‘ua ia lafoina i le sami,o ona toa silisili fo‘i ‘ua gōgoto i le sami Ulaula.
5. O le moana ‘ua ufitia ai i latou,‘ua latou ō ifo i le mea loloto pei o se ma‘a.
6. Le ALI‘I e, ‘ua mamalu lou ‘a‘ao taumatau i le malosi;le ALI‘I e, o lou ‘a‘ao taumatau ‘ua nutipalaina ai lē ‘ua ita mai.
7. O le tele o lou malosi ‘ua e lepetia ai ē na tula‘i mai ‘iā te oe;‘ua e tu‘uina atu lou to‘asā, ‘ua ‘aina ai i latou pei o le tagutugutu o saito.
8. O le savili fo‘i mai lou fofoga na faupu‘e ai le sami;na tula‘i ona tafe pei o se mea mauti‘eti‘e,na to‘a le moana i totonu lava o le sami.
9. Sa fa‘apea ane lē na ita mai, ‘‘Ou te tuliloaina, ‘ou te maua atu;‘ou te tufatufa le vete, e malie ai lava lo‘u loto;‘ou te tō a‘e la‘u pelu, e fasiotia i latou i lo‘u lima.’
10. Na e fa‘aagi mai lou matagi, ‘ona ufitia ai lea o i latou i le sami;‘ua gōgoto i latou pei o le pulu i le moana sausau.
11. “Le ALI‘I e, o ai ‘ea sē ‘ua tusa ma oe i le vao atua?O ai sē ‘ua tusa ma oe, o lē silisili ‘ona pa‘ia,o lē mata‘utia i vi‘iga, o lē fai vāvega?
12. Na e fa‘aloaloa lou ‘a‘ao taumatau,na foloina i latou e le ‘ele‘ele.
13. “O lou alofa ‘ua e ta‘ita‘iina mai ai lenei nu‘u, ‘ua e togiolaina ai lava;o lou malosi ‘ua e ta‘ita‘iina ai i latou i lou afio‘aga pa‘ia.
14. E fa‘alogologo i ai le vao nu‘u, e gatete ai;o ē nonofo i Filisitia e maua i latou i le tigā.
15. ‘Ona atuatuvale lea o matai o Etoma;o ali‘i o Moapi e maua i latou i le gatete;e fa‘avaivaia lava o i latou uma ‘ua nonofo i Kanana.
16. E o‘o ‘iā i latou le fefe tele lava ma le mata‘u.O lou ‘a‘ao malosi e le gāoioi ai i latou, pei o le ma‘a;se‘ia ō ane lou nu‘u, le ALI‘I e,se‘ia ō ane lenei nu‘u ‘ua e fa‘atauina.
17. ‘E te fa‘ao‘o atu, ma e totōina i latou i le mauga o lou tofi,le ALI‘I e, o le mea ‘ua e saunia ‘e te afio ai;o le mea pa‘ia, le Ali‘i e, ‘ua e fa‘atumauina i ou ‘a‘ao.
18. ‘E fai le ALI‘I ma tupu e fa‘avavau fa‘avavau lava.”
19. Auā na alu le solofanua a Farao, ma ona kariota, ma ana ‘au e ti‘eti‘e i solofanua i le sami, ‘ona fa‘afoisia lea e le ALI‘I o le suāsami i luga ‘iā i latou; a o le fānauga a Isaraelu na sāvavali i latou i le ‘iliti tai matūtū i totonu o le sami.
20. O Miriama, o le perofeta fafine, o le tuafafine o Arona ‘ua ‘ave e ia le topa i lona lima, ‘ua ō atu fo‘i fafine uma lava ‘ua mulimuli atu ‘ia te ia ma topa ma siva.
21. ‘Ua tali atu Miriama ‘iā te i latou,“‘Ia ‘outou pepese i le ALI‘I, auā ‘ua matuā manumālō o ia;o le solofanua ma lē na ti‘eti‘e ai, ‘ua ia lafoina i le sami.”
22. ‘Ona tu‘ua lea e Mose ma Isaraelu le sami Ulaula, ‘ua latou o‘o atu i le vao o Sura; ‘ua aso tolu la latou malaga i le vao, ‘ae le‘i maua se vai.
23. ‘Ua latou o‘o fo‘i i Mara; ‘ae le‘i mafai ‘ona latou inu i le vai i Mara, auā ‘ua ‘o‘ona; o le mea lea na igoa ai lea mea o Mara.
24. ‘Ona muimui ai lea o le nu‘u ‘iā Mose, o lo‘o fai mai, “Se a se mea a matou inu ai?”
25. ‘Ona ia ‘alaga atu lea i le ALI‘I, ‘ona fa‘aali lea o le ALI‘I ‘iā te ia o le la‘au; ‘ua na lafoina i le vai, ‘ona māgalo ai lea o le vai.‘Ua ia tu‘uina atu i lea mea o le tulafono ma le fa‘amasinoga ‘iā te i latou, ‘ua ‘ia tofotofo fo‘i ‘iā te i latou i lea lava mea.
26. ‘Ua ia fetalai mai fo‘i, “‘Āfai ‘e te matuā fa‘alogo i le leo o le ALI‘I lou Atua, ma e fai le amio tonu i ona luma, ma ‘ia e ua‘i mai ou taliga i ana poloa‘iga, ma e tausi i ana sauniga uma lava, ‘ou te lē tu‘uina atu ‘iā te oe se tasi o ia ma‘i na ‘ou tu‘uina atu ‘iā Aikupito; auā o a‘u o le ALI‘I, o lē na te fa‘amālōlōina oe.”
27. ‘Ona latou o‘o lea i Ailima, ‘ua i ai vaipuna e sefulu ma le lua, ma pama e fitugafulu; ‘ua latou tolauapi e lata ane i le atu vai.