1. ‘Ia e fa‘alatalata mai fo‘i ‘iā te oe o lou uso o Arona ‘atoa ma ona atali‘i fa‘atasi ma ia, ai le fānauga a Isaraelu, ‘ina ‘ia fai ma ositaulaga ‘iā te a‘u, o Arona, o Natapu, ma Aviu, o Eleasaro, ma Itamaro, o atali‘i o Arona.
2. ‘E te faia fo‘i ‘ofu sa mo lou uso o Arona e mamalu a‘i ma matagofie a‘i.
3. ‘E te tautala atu i tagata popoto uma lava, o ē ‘ua ‘ou fa‘atumuina i le loto e poto, ‘ia latou faia ‘ofu mo Arona e fa‘apa‘iaina ai o ia, ‘ina ‘ia fai o ia ma ositaulaga ‘iā te a‘u.
4. O ‘ofu nei latou te faia, o le ufifatafata, ma le efota, ma le ‘ofu talaloa, ma le ‘ofu tino fa‘alalelei ma le pulou ‘ie, ma le fusi; ‘ia latou faia fo‘i ‘ofu sa mo lou uso o Arona, ‘atoa ma ona atali‘i, ‘ina ‘ia fai ma ositaulaga ‘iā te a‘u.
5. ‘Ia latou ‘ave le auro, ma le ‘ie uli ma le pāuli, ma le mūmū, ma le ‘ie vavae.
6. ‘Ia latou faia le efota i le auro, ma le ‘ie uli, ma le pāuli, ma le mūmū, ma le ‘ie vavae ‘ua milo ona manoa i le galuega a le tufuga poto.
7. ‘Ia fa‘aso‘oina ona tau‘au e lua i ona tafatafa, ‘ia fa‘atasia.
8. O le fusi fa‘alanu ‘ese‘ese fo‘i o le efota o i ona luga, e pei o le galuega e i ai, e faia i ia lava mea, o le auro, ma le ‘ie uli, ma le pāuli, ma le mūmū, ma le ‘ie vavae ‘ua milo ona manoa.
9. ‘Ia e ‘ave fo‘i ma‘a soama e lua, ma togitogi ai igoa o atali‘i o Isaraelu;
10. e ono o latou igoa i le tasi ma‘a, ma igoa o le isi to‘aono i le tasi ma‘a, e fa‘atatau i o latou fānau mai.
11. O le galuega a le tufuga togitogi ma‘a, e pei o le togitogiga o le ma‘a o fa‘amaufa‘ailoga, ‘e te togitogiina igoa o atali‘i o Isaraelu i ia ma‘a e lua; ‘ia e faia, ‘ia fa‘amau i ta‘ai auro.
12. ‘E te tu‘u fo‘i ma‘a e lua i tau‘au o le efota, o ma‘a e manatuaina ai le fānauga a Isaraelu; e ‘ave fo‘i e Arona o latou igoa i luma o le ALI‘I, i ona lava tau‘au e lua e manatuaina ai i latou.
13. ‘E te faia fo‘i ta‘ai auro.
14. E lua fo‘i filifili auro lelei ‘e te faia ia tutusa i le galuega fa‘afilifili u‘amea, ‘ia fa‘amauina, fo‘i o filifili auro i ta‘ai.
15. ‘E te faia fo‘i le ufifatafata o le fa‘amasinoga i le galuega a le tufuga poto, e pei o le galuega i le efota ‘e te fai ai; ‘e te faia i le auro, ma le ‘ie uli, ma le pāuli, ma le mūmū, ma le ‘ie vavae ‘ua milo ona manoa.
16. E faia fa‘atafafā ma fa‘asautualua; o le aga lona umi, o le aga fo‘i lona lau.
17. ‘E te tu‘uina fo‘i i tu‘ugāma‘a o atu ma‘a e fa; o le ulua‘i atu ma‘a, o le salikea, ma le topasi, ma le pereketa, o le atu ma‘a muamua lea.
18. O lona atu lua, o le nofeka, ma le safaira, ma le ialoma.
19. O lona atu tolu fo‘i, o le lesema, ma le sevo, ma le aselama.
20. O lona atu fa fo‘i, o le tasesa, ma le soama, ma le iasepi; ‘ia fa‘amauina lava ia i totonu o le ta‘ai auro i o latou tu‘ugāma‘a.
21. ‘Ia i ai i na ma‘a o igoa o atali‘i o Isaraelu e sefulu ma le lua, e fa‘atatau i o latou igoa, pei o le togitogiga o le fa‘amaufa‘ailoga e ta‘itasi ma lona igoa, e tusa ma itū‘āiga e sefulu ma le lua.
22. ‘E te faia fo‘i i luga o le ufifatafata, o filifili auro lelei ia tutusa, o le galuega fa‘afilifili u‘amea.
23. ‘E te faia fo‘i i luga o le ufifatafata o mama auro e lua ma ‘ia e tu‘u ia mama e lua i pito e lua o le ufifatafata.
24. ‘E te tu‘u fo‘i filifili auro e lua i mama e lua i pito o le ufifatafata.
25. ‘E te tu‘u fo‘i isi pito e lua o filifili auro e lua i ta‘ai e lua, ma tu‘u i tau‘au o le efota i ona luma.
26. ‘E te faia fo‘i mama auro e lua, ma e tu‘uina ai i pito e lua o le ufifatafata i ona tafatafa lava, o lo‘o fa‘asaga i le efota i totonu.
27. E lua fo‘i mama auro ‘e te faia, ma tu‘u ai i itū e lua i lalo o le efota, e lata ane i lona itū i luma, e felāta‘i ma le mea e fa‘aso‘oina i luga o le fusi fa‘alanu ‘ese‘ese o le efota.
28. ‘Ia latou nonoa fo‘i le ufifatafata i ona mama i mama o le efota i le manoa uli, ‘ina ‘ia i luga a‘e o le fusi fa‘alanu ‘ese‘ese o le efota, ‘ina ne‘i te‘a ‘ese le ufifatafata i le efota.
29. E ‘ave fo‘i e Arona o igoa o atali‘i o Isaraelu i le ufifatafata o le fa‘amasinoga i lona fatafata, pe a ulu atu ia i le mea pa‘ia, e fai ma fa‘amanatuga e lē aunoa i luma o le ALI‘I.
30. ‘E te tu‘u fo‘i le Urima ma le Tumema i le ufifatafata o le fa‘amasinoga, ‘ina ‘ia i luga lava o le fatafata o Arona, pe a ulu atu o ia i luma o le ALI‘I; e ‘ave fo‘i e Arona le fa‘amasinoga mo le fānauga a Isaraelu i luga o lona fatafata i luma o le ALI‘I e lē aunoa.
31. ‘E te faia le ‘ofu talaloa o le efota, ‘ia ‘ato‘atoa i le ‘ie uli.
32. E faia fo‘i se ‘ua i lona pito i luga i totonu, e fai ai se mea lalagaina e afei fa‘ata‘ali‘oli‘o ai i le ua, e pei o le ua o le ‘ofutau ‘ina ‘ia lē māsae.
33. ‘E te faia fo‘i i ona tafatafa o rimoni i le ‘ie uli, ma le pāuli, ma le mūmū, e fa‘ata‘ali‘oli‘oina ai ona tafatafa; ma tagitagi auro e vāvā a‘i e fa‘atali‘oli‘oina ai;
34. o le tagitagi auro ma le rimoni, o le tagitagi auro ma le rimoni i tafatafa o le ‘ofu talaloa e fa‘ata‘ali‘oli‘oina ai.
35. E ‘ofu ai Arona pe a ‘au‘auna o ia, ‘ina ‘ia lagona lona tagitagi pe a ulu atu ia i le mea pa‘ia i luma o le ALI‘I, pe a toe alu fo‘i i fafo, ne‘i oti o ia.
36. ‘E te faia fo‘i le mea pupula i le auro lelei, ma e togitogi ai, pei o le togitogi i le fa‘amaufa‘ailoga, o lenei ‘upu, “E PA‘IA I LE ALI‘I.”
37. ‘E te tu‘uina fo‘i i le manoa uli, ‘ia i ai lava i le pulou ‘ie i luma lava o le pulou ‘ie.
38. ‘Ia i ai fo‘i i le muaulu o Arona, ‘ia ‘ave e Arona le agasala i mea sa, e fa‘asāina e le fānauga a Isaraelu ‘iā latou taulaga sa uma lava, ‘ia i ai pea lava i lona muaulu, ‘ina ‘ia alofagia i latou i luma o le ALI‘I.
39. ‘E te lalaga manui fo‘i le ‘ofu tino i le ‘ie vavae, ‘e te faia le pulou i le ‘ie vavae, ‘e te fai fo‘i le fusi i le galuega a le tufuga fai ‘ie lanu ‘ese‘ese.
40. ‘Ia e faia fo‘i ‘ofu tino mo atali‘i o Arona; ‘e te faia fo‘i mo i latou o fusi, ‘atoa ma pulou ‘e te faia mo i latou, ‘ina ‘ia mamalu ai ma matagofie ai.
41. ‘E te fa‘a‘ofu ai fo‘i lou uso, o Arona, ma ona atali‘i fa‘atasi ma ia; ‘e te fa‘au‘u fo‘i ‘iā i latou, ma e tofia i latou, ma fa‘apa‘iaina i latou e fai le faiva o ositaulaga ‘iā te a‘u.
42. ‘E te faia fo‘i mo i latou le ‘ofu vae i ‘ie vavae, e ufiufi ai o latou tino, e gata mai i o latou sulugātiti ‘ia o‘o i o latou ‘ogāvae;
43. e ‘o‘ofu ai Arona ma ona atali‘i, pe a latou ulufale i le fale fetāfa‘i o le fa‘apotopotoga, pe fa‘alatalata atu i le fatafaitaulaga e ‘au‘auna i le mea pa‘ia, ‘ina ne‘i nofo sala i latou, ma oti ai; e fai lea ma tulafono e fa‘avavau ‘iā te ia, ‘atoa ma ana fānau pe a mavae atu o ia.