1. O ona masina e tolu talu ‘ona tu‘ua e le fānauga a Isaraelu le nu‘u o Aikupito, o lea lava aso na latou o‘o ai i le vao o Sinai.
2. Auā na latou ō ‘ese i Refiti ma latou o‘o atu i le vao o Sinai; ‘ona latou tolauapi lea i le vao, ‘ua tolauapi ai Isaraelu i le laulata o le mauga.
3. ‘Ona alu a‘e lea o Mose i le Atua; ‘ona vala‘au mai lea o le ALI‘I ‘iā te ia a‘i le mauga, ‘ua fa‘apea mai, “‘E te fai atu i le ‘āiga o Iakopo, ma e fa‘aali atu i le fānauga a Isaraelu, ‘ia fa‘apea atu,
4. Na ‘outou va‘ai atu i mea na ‘ou faia i Aikupito, na ‘ou ‘ava‘e ‘iā te ‘outou i luga o ‘apa‘au o aeto, na ‘ou ‘aumai fo‘i ‘iā te ‘outou ‘iā te a‘u nei.
5. O lenei fo‘i ‘āfai tou te matuā fa‘alogo mai i lo‘u leo ma tausiusi i la‘u feagaiga, ‘ona fai lea ‘outou ma ‘oloa tāua mo‘u, e sili i nu‘u uma; auā o lo‘u lava le lalolagi uma.
6. E fai fo‘i ‘outou ma mālō o ositaulaga, ma nu‘u pa‘ia mo a‘u; o ‘upu ia ‘e te tautala atu ai i le fānauga a Isaraelu.”
7. ‘Ona alu lea o Mose, ‘ua ia ‘a‘ami atu toeaina o le nu‘u, ‘ua ia tu‘uina atu fo‘i i o latou luma o ‘upu nei uma lava na fetalai mai ai le ALI‘I.
8. ‘Ona tali fa‘atasi mai lea o le nu‘u uma, “Matou te faia lava mea uma ‘ua fetalai mai ai le ALI‘I;” ‘ona momoli atu lea e Mose o le ‘upu a le nu‘u i le ALI‘I.
9. ‘Ona fetalai mai lea o le ALI‘I ‘iā Mose, “Fa‘auta, o le a a‘u alu atu ‘iā te oe i le ao uliuli, ‘ina ‘ia lagona mai e le nu‘u pe a ‘ou tautala atu ‘iā te oe, ‘ina ‘ia latou talitonu pea lava ‘iā te oe.” ‘Ua ta‘u atu fo‘i e Mose o ‘upu a le nu‘u i le ALI‘I.
10. ‘Ua fai mai fo‘i le ALI‘I ‘iā Mose, “‘Inā alu atu ia oe i le nu‘u, ma ‘ia e fa‘apa‘iaina i latou i le asō ma taeao, ma ‘ia latou ta o latou ‘ofu;
11. ma ‘ia latou nofo sauniuni i le aso i e luā; auā o le aso i e luā e alu ifo ai le ALI‘I i luma o le nu‘u ‘atoa uma i luga o le mauga o Sinai.
12. ‘E te faia fo‘i le tuā‘oi mo le nu‘u, e fa‘asi‘osi‘oina ai, ma ‘ia e fai atu, ‘‘Ia ‘outou, ne‘i tou ō a‘e i le mauga, ne‘i ‘outou papa‘i atu fo‘i i ona vae mauga; ai se papa‘i atu i le mauga, e matuā oti lava ia,
13. ‘Aua ne‘i papa‘i ‘iā te ia se lima; ‘ae fetogia lava o ia i ma‘a, pe fana i le u, po o se manu po se tagata, e lē ola lava ia.’ Pe fa‘alevaleva le pū ona ili, i le a‘e ai i latou i le mauga.”
14. ‘Ona alu ifo lea o Mose nai le mauga i le nu‘u, ‘ua ia fa‘apa‘iaina fo‘i le nu‘u, ‘ua latou ta fo‘i o latou ‘ofu.
15. ‘Ua ia fai atu fo‘i i le nu‘u, “‘Ia ‘outou nofo sauniuni i le asō i e luā; ‘aua ne‘i ‘outou ō ane ‘iā ‘outou avā.”
16. ‘Ona o‘o lea i le aso tolu i le taeao, ‘ua i luga o le mauga o faititili, ma uila, ma le ao uliuli, o le leo fo‘i o le pū ‘ua matua tele; ‘ona gatete ai lea o le nu‘u uma lava sa i le togālauapi.
17. ‘Ona ‘aumai lea e Mose o le nu‘u nai le togālauapi, latou te fetaia‘i ma le Atua; ‘ona latou laulaututū ai lea i lalo o le mauga.
18. O le mauga o Sinai fo‘i ‘ua pusa ‘atoa uma auā na afio ifo ai le ALI‘I i le afi, ‘ua alu a‘e fo‘i ona asu pei o le asu o se umu; ‘ua lūlūteleina lava le mauga ‘atoa uma.
19. O le leo o le pū ‘ua alualu ‘ona tele lava; ‘ua tautala atu Mose, ‘ona talia mai lea e le Atua ‘iā te ia i le si‘ufofoga.
20. ‘Ona afio ifo lea o le ALI‘I i luga o le mauga o Sinai, i le tumutumu o le mauga; ‘ua vala‘au fo‘i le ALI‘I ‘iā Mose e alu a‘e i le tumutumu o le mauga, ‘ona alu a‘e ai lea o Mose.
21. ‘Ona fetalai lea o le ALI‘I ‘iā Mose, “‘Inā alu ia oe i lalo, fai atu lava i le nu‘u ne‘i latou sofaia mai e maimoa i le ALI‘I, ‘ona oti ai lea o i latou e to‘atele.
22. O ositaulaga fo‘i o ē fa‘alatalata i le ALI‘I, ‘ia fa‘apa‘iaina i latou e i latou, ne‘i osofa‘i atu le ALI‘I ‘iā i latou.”
23. A ‘ua tali atu Mose i le ALI‘I, “E lē mafai le nu‘u ‘ona a‘e mai i le mauga o Sinai, auā o oe na e fetalai mai ‘iā te i matou, ‘ua fa‘apea mai, ‘‘Ia ‘outou fai le tuā‘oi, ma ‘ia tapu le mauga ‘iā te ‘outou.’”
24. ‘Ona fetalai lea o le ALI‘I ‘iā te ia, “‘Inā alu ia i lalō, i le ō mai ai ‘oulua ma Arona fa‘atasi ma oe; a o le ‘au ositaulaga ma le nu‘u, ‘aua ne‘i sofaia mai i latou e a‘e mai i le ALI‘I, ne‘i osofa‘i atu o ia ‘iā te i latou.”
25. ‘Ona alu ifo lea o Mose i le nu‘u ma na fai atu ai ‘iā te i latou.