1. ‘Ona fetalai mai lea o le ALI‘I ‘iā Mose, “O le a e iloa le mea ‘ou te faia ‘iā Farao; auā o le lima malosi na te tu‘uina atu ai i latou e ō, o le lima malosi fo‘i na te tuli ai ‘iā te i latou ai lona nu‘u.”
2. ‘Ua fetalai mai fo‘i le Atua ‘iā Mose, o lo‘o fa‘apea mai ‘iā te ia, “O a‘u nei o le ALI‘I:
3. na iloa a‘u e Aperaamo, ma Isaako, ma Iakopo i lo‘u igoa o le Atua e ona le malosi uma lava; ‘ae peita‘i o lo‘u igoa o le ‘ALI‘I,’ na le‘i iloa ai a‘u e i latou.
4. ‘Ua ‘ou fa‘atumauina fo‘i la‘u feagaiga ma i latou, e avatu ‘iā te i latou le nu‘u o Kanana, o le nu‘u sa latou fa‘atagata‘ese ai, sa latou āumau ai.
5. O a‘u fo‘i na ‘ou fa‘alogo i le feoi o le fānauga a Isaraelu, o ē ‘ua fa‘apologaina e Aikupito, ‘ua ‘ou manatua fo‘i la‘u feagaiga.
6. O lenei, fai atu i le fānauga a Isaraelu, ‘O a‘u o le ALI‘I, ‘ou te ‘aumaia ‘outou i lalo o avega mamafa a Aikupito; ‘ou te lavea‘i mai fo‘i ‘iā te ‘outou a‘i a latou galuega, ‘ou te fa‘aolaina mai fo‘i ‘outou i le lima fa‘aloaloa ma sala tetele.
7. ‘Ou te faia ‘outou mo‘u nu‘u, e fai fo‘i a‘u mo ‘outou Atua; tou te iloa fo‘i o a‘u lava o le ALI‘I, o lo ‘outou Atua, o lē ‘aumaia ‘outou i lalo o avega mamafa a Aikupito.
8. ‘Ou te fa‘ao‘oina atu fo‘i ‘outou i le nu‘u na ‘ou si‘itia ai lo‘u lima, ‘ou te avatu ‘iā Aperaamo, ma Isaako, ma Iakopo, ‘ou te avatu ai ‘iā te ‘outou ma tofi; o a‘u nei o le ALI‘I.’”
9. ‘Ua fa‘apea lava ‘ona tautala atu Mose i le fānauga a Isaraelu, ‘ae le‘i fa‘alogo i latou ‘iā Mose ‘ona o lo latou loto tigā ma le galuega mamafa.
10. ‘Ua fetalai mai fo‘i le ALI‘I ‘iā Mose, o lo‘o fa‘apea mai.
11. “Alu ia, fai atu ‘iā Farao le tupu o Aikupito, ‘ia tu‘u mai e ia o le fānauga a Isaraelu e ō ‘ese i lona nu‘u.”
12. A ‘ua fai atu Mose i luma o le ALI‘I, ‘ua fa‘apea atu, “Silasila mai ia, e le‘i fa‘alogo mai ‘iā te a‘u le fānauga a Isaraelu, pe fa‘apefea ‘ona fa‘alogo mai o Farao ‘ia te a‘u, o a‘u fo‘i ‘ua lē matala la‘u gagana?”
13. ‘Ua fetalai mai fo‘i le ALI‘I ‘iā Mose ma Arona, ma ‘a‘auina atu i lā‘ua i le fānauga a Isaraelu ‘atoa ma Farao le tupu o Aikupito, ‘ina ‘ia la ‘aumaia le fānauga a Isaraelu mai le nu‘u o Aikupito.
14. O tupuga nei o ‘āiga o latou tamā. O atali‘i nei o Reupena, o le ulumatua lea a Isaraelu; o Enoka, ma Falu, ma Esarona, ma Karame; o ‘āiga ia o Reupena.
15. O atali‘i nei o Simeona; o Iemuelu, ma Iaminu, ma Oata ma Iakinu, ma Soaro, ma Saulo, o le tama lea a le fafine Kanana; o ‘āiga ia o Simeona.
16. O igoa nei o atali‘i o Levi i o latou tupulaga; o Keresoma, ma Koato, ma Merari. O tausaga fo‘i na ola ai Levi, e tasi le selau ma le tolugafulu ma le fitu.
17. O atali‘i nei o Keresoma i o la ‘āiga; o Lepeni ma Semi.
18. O atali‘i fo‘i nei o Koato; o Amaramo, ma Isara, ma Heperona, ma Usialu. O tausaga fo‘i na ola ai Koato e tasi le selau e tolugafulu ma le tolu.
19. O atali‘i fo‘i nei o Merari; o Maali ma Muse; o i latou nei o ‘āiga o Levi i o latou lava tupulaga.
20. ‘Ua fai avā fo‘i Amaramo ‘iā Iokapeta o le tuafafine lea o lona tamā; na ia fānau mai fo‘i ‘iā te ia o Arona ma Mose. O tausaga fo‘i ia na ola ai Amaramo, e tasi le selau e tolugafulu ma le fitu.
21. O atali‘i fo‘i nei o Isara; o Koru, ma Nefeku, ma Sekari.
22. O atali‘i fo‘i nei o Usialu; o Mesalu, ma Elisafano ma Seteri.
23. ‘Ua fai avā Arona ‘iā Elisapeta, o le afafine o Aminatapu, o le tuafafine o Naasona; na ia fānau mai ai fo‘i ‘iā te ia o Natapu, ma Aviu, o Eleasaro, ma Itamaro.
24. O atali‘i nei o Koru; o Asiro, ma Elekana, ma Aviasafo; o ‘āiga ia o sa Korū.
25. ‘Ua fai avā fo‘i Eleasaro le atali‘i o Arona i le tasi afafine o Potialu; na ia fānau mai fo‘i ‘iā te ia o Fineaso o tupuga nei o tamā o sa Levī i o latou ‘āiga.
26. O Arona ma Mose ia na fetalai mai i ai le ALI‘I, “La te ‘aumaia le fānauga a Isaraelu nai le nu‘u o Aikupito ‘iā latou lava ‘au.”
27. O i lā‘ua nei na fai atu ‘iā Farao le tupu o Aikupito, la te ‘aumaia le fānauga a Isaraelu nai Aikupito; o Mose lenei ma Arona.
28. ‘Ua o‘o i le aso na fetalai mai ai le ALI‘I ‘iā Mose i le nu‘u o Aikupito;
29. ‘ua fetalai mai ai le ALI‘I ‘iā Mose, o fa‘apea mai, “O a‘u nei o le ALI‘I; fai atu ia i le tupu o Aikupito o Farao, o mea uma lava ‘ou te fai atu ai ‘ia te oe.”
30. Na fai atu fo‘i Mose i luma o le ALI‘I, “Silasila mai, o a‘u e lē matala la‘u gagana pe fa‘apefea ‘ea ‘ona fa‘alogo mai o Farao ‘ia te a‘u?”