1. O lenei fo‘i le mea ‘e te faia e fa‘apa‘iaina ai i latou, ‘ina ‘ia latou ‘au‘auna mai ‘iā te a‘u i le faiva o le ositaulaga; ‘e te ‘ave le povi po‘a ta‘anoa e tasi, ma mamoe po‘a e lua e sao ‘ona lelei;
2. ma le areto e lē fa‘afefeteina, ma pōtoi areto e lē fa‘afefeteina, e palua ma le u‘u, ma areto manifinifi e lē fa‘afefeteina, ‘ua nini i le u‘u; o le falaoa o le saito ‘e te fai ai ia mea.
3. ‘E te tu‘uina fo‘i ia mea i le ‘ato e tasi, ma e ‘aumai ai ma le ‘ato, ‘atoa ma le povi po‘a ta‘anoa, ma mamoe po‘a e lua.
4. O Arona fo‘i ma ona atali‘i, ‘e te fa‘alatalataina mai i latou i le faitoto‘a o le fale fetāfa‘i o le fa‘apotopotoga, ma ‘ia e fa‘atā‘ele ‘iā i latou i le vai.
5. ‘E te ‘ave fo‘i ‘ofu, ma fa‘a‘ofuina ai Arona i le ‘ofu tino, ma le ‘ofu talaloa o le efota, ma le efota, ma le ufifatafata, ma e fusi ‘iā te ia i le fusi fa‘alanu ‘ese‘ese o le efota.
6. ‘E te fa‘apulou fo‘i ‘iā te ia i le pulou ‘ie, ma e fusi le pale pa‘ia i le pulou ‘ie;
7. ‘ona e ‘ave lea o le u‘u e fa‘au‘u ai, ma liligi i luga o lona ulu, ma ‘ia e fa‘au‘uina ai o ia.
8. ‘E te fa‘alatalata mai fo‘i ona atali‘i, ma fa‘a‘ofuina i latou i ‘ofu tino.
9. ‘E te fusi ‘iā te i latou i fusi, o Arona ‘atoa ma ona atali‘i, ma fa‘amau o latou pulou; e fai fo‘i mo latou le faiva o ositaulaga, o le tulafono e fa‘avavau; ‘e te tofia fo‘i Arona ma ona atali‘i.
10. ‘E te ta‘ita‘iina mai fo‘i le povi po‘a ta‘anoa i luma o le fale fetāfa‘i o le fa‘apotopotoga; e fa‘ae‘e fo‘i e Arona ma ona atali‘i o latou lima i luga o le ulu o le povi po‘a ta‘anoa.
11. ‘Ona e fasi lea o le povi po‘a ta‘anoa i luma o le ALI‘I i le faitoto‘a o le fale fetāfa‘i o le fa‘apotopotoga.
12. ‘Ona e ‘ave lea nisi toto o le povi po‘a ta‘anoa, ma tu‘uina i luga o nifo o le fatafaitaulaga i lou tamatama‘i lima; a o le toto uma ‘e te sasa‘aina lea i lalo o le fatafaitaulaga.
13. ‘E te ‘ave fo‘i le ga‘o alo uma lava, ‘atoa ma le ga‘o punipū o i luga o le finagalo, ma ona fatuga‘o e lua, ma ga‘o o i ai, ma ‘ia e susunu ai i luga o le fatafaitaulaga;
14. a o le ‘a‘ano o le povi po‘a ta‘anoa ma lona pa‘u ma lona otaota, ‘ia e susunuina lava i le afi i tua o le toagalauapi; o le taulaga lea mo le agasala.
15. ‘Ona e ‘ave lea o le tasi mamoe po‘a; e fa‘ae‘e fo‘i e Arona ma ona atali‘i o latou lima i luga o le ulu o le mamoe po‘a.
16. ‘E te fasi fo‘i le mamoe po‘a, ma ‘ave lona toto, ma sausau ‘ia so‘o ai i le fatafaitaulaga.
17. ‘E te pena fo‘i le mamoe po‘a i ona tufa‘aga, ma ia e mulumulu ona tōtōga ma ona ālaga, ‘ona tu‘uina ane lea i ona tufa‘aga, ma lona ulu.
18. ‘ia e susunu fo‘i le mamoe po‘a ‘atoa uma i le fatafaitaulaga; o le taulaga mū lea i le ALI‘I, o le mea manogi lelei, o le taulaga e fai i le afi i le ALI‘I.
19. ‘E te ‘ave fo‘i lona lua o mamoe po‘a; e fa‘ae‘e fo‘i e Arona ma ona atali‘i o latou lima i luga o le ulu o le mamoe po‘a.
20. ‘E te fasi le mamoe po‘a, ma ‘ia ‘ave sina ona toto, ma tu‘u i le tumutumu o le taliga taumatau o Arona, ma le tumutumu o taliga taumatau o ona atali‘i, o lima matua fo‘i o latou lima taumatau, ma vae matua o latou vae taumatau, ma ‘ia sausau ia so‘o le fatafaitaulaga i le toto.
21. ‘E te ‘ave fo‘i nisi toto o i luga o le fatafaitaulaga, ma nisi u‘u e fa‘au‘u ai, ma ‘ia e sausau ai i luga o Arona ma ona ‘ofu, ‘atoa ma ona atali‘i ma ‘ofu o ona atali‘i fa‘atasi ma ia ‘ona fa‘apa‘iaina lea o ia, ma ona ‘ofu ma ona atali‘i, ‘atoa ma ‘ofu o ona atali‘i fa‘atasi ma ia.
22. ‘Ia e ‘ave fo‘i tufa‘aga o le mamoe po‘a, o le ga‘o, ma le i‘u ma le ga‘o alo, ma le ga‘o punipū i luga o le finagalo, ma ona fatuga‘o e lua, ma ga‘o o i ai, ma le ālaga taumatau; auā o le mamoe po‘a ia o le tofiga;
23. ma le areto e tasi, ma le pōtoi areto e tasi, e fai i le u‘u, ma le areto manifinifi e tasi mai le ‘ato o le areto e lē fa‘afefeteina o i luma o le ALI‘I.
24. ‘E te fa‘ae‘e fo‘i ia mea uma i alofilima o Arona ma alofilima o ona atali‘i; ma ‘ia e lūlūina, o le taulaga lūlū lea i luma o le ALI‘I.
25. ‘E te talia fo‘i ia mea ai o latou lima, ma e susunuina i le fata e fai ai taulaga mū, e fai ma mea manogi lelei i luma o le ALI‘I; o le taulaga lea e fai i le afi i le ALI‘I.
26. ‘Ia e ‘ave fo‘i le fatafata o le mamoe po‘a i mea e tofia a‘i Arona, ma e lūlūina, o le taulaga lūlū lea i luma o le ALI‘I; e fai fo‘i lea ma ou tufa‘aga.
27. ‘E te fa‘apa‘ia fo‘i le fatafata o le taulaga lūlū, ma le ālaga o le taulaga si‘i, o lo‘o lūlūina ma si‘itia, o tufa‘aga ia o le mamoe po‘a i mea e tofia a‘i Arona ‘atoa ma ona atali‘i;
28. e fai ia mo Arona ma ona atali‘i, mai le fānauga a Isaraelu o le tulafono e fa‘avavau; auā o le taulaga si‘i lea; e fai fo‘i lea ma taulaga si‘i, mai le fānauga a Isaraelu ai o latou taulaga fa‘afetai, o la latou taulaga si‘i lea i le ALI‘I.
29. O ‘ofu sa fo‘i o Arona, e fai mōna atali‘i pe a mavae atu o ia, ‘ina ‘ia fa‘au‘uina ai i latou, ma tofia ai i latou.
30. O sona atali‘i e sui a‘i o ia i le faiva o ositaulaga, e ‘ofu ai o ia le fitu ona aso, pe a alu ia i le fale fetāfa‘i o le fa‘apotopotoga e ‘au‘auna ai i le mea pa‘ia.
31. ‘E te ‘ave fo‘i le mamoe po‘a o le tofiga, ma tunu lona tino i le mea pa‘ia.
32. E ‘a‘ai fo‘i Arona ma ona atali‘i le tino o le mamoe po‘a, ma le areto ‘ua i le ‘ato, i le faitoto‘a o le fale fetāfa‘i o le fa‘apotopotoga.
33. Latou te ‘a‘ai fo‘i ia mea ‘ua fai a‘i le togiola, e tofia ai ma fa‘apa‘iaina ai i latou; ‘ae ‘aua le ‘ai ai se tagata ‘ese, auā e pa‘ia lava ia mea.
34. Pe ‘āfai fo‘i e toe sina ‘a‘ano i taulaga o le tofiga, po o le areto, e o‘o i le taeao, ‘ona e susunu ai lea, o le mea e toe i le afi; e lē ‘aina, auā e pa‘ia lava lea mea.
35. ‘Ia e fai fa‘apea lava ia Arona ma ona atali‘i, e pei o mea uma lava na ‘ou fai atu ai ‘iā te oe; o aso e fitu ‘ia e fai ai le tofia o i latou.
36. ‘Ia e saunia fo‘i povi po‘a ta‘anoa i lea aso ma lea aso, e fai ma taulaga ‘ona o le agasala e togiola a‘i ‘ia e fa‘amamā fo‘i le fatafaitaulaga, pe a e faia le togiola i ona luga, ‘e te fa‘au‘u ai ia fa‘apa‘iaina a‘i.
37. E fitu aso ‘e te fai ai le togiola le fatafaitaulaga, ma fa‘apa‘iaina ai, e fai ai ma fatafaitaulaga e sili ‘ona pa‘ia; o mea uma fo‘i e papa‘i ane i le fatafaitaulaga e pa‘ia lava ia.
38. O lenei fo‘i le mea ‘e te faia i luga o le fatafaitaulaga, e ta‘ilua tama‘i mamoe e tasi lo la tausaga i lea aso ma lea aso, e lē aunoa.
39. O le tasi tama‘i mamoe ‘e te saunia i le taeao o le tasi fo‘i tama‘i mamoe ‘e te saunia i le afiafi.
40. O le tama‘i mamoe e tasi ma le omera e tasi o falaoa lelei, e palua ma lona vaega e fa o le sinu o u‘u ‘ua tu‘ia. O lona vaega e fa fo‘i o le sinu o uaina mo le taulaga i mea e inu.
41. O le tasi fo‘i tama‘i mamoe ‘e te saunia i le afiafi, e tusa ma le taulaga i mea e ‘ai i le taeao, e tusa fo‘i ma le taulaga i mea e inu ‘e te faia; o le mea manogi lelei lea, o le taulaga e fai i le afi i le ALI‘I.
42. E faia lenei ma taulaga mū e lē aunoa i o ‘outou tupulaga amulī i le faitoto‘a o le fale fetāfa‘i o le fa‘apotopotoga i luma o le ALI‘I o le mea tatou te fetaia‘i ai ma ‘outou ‘ina ‘ia ‘ou tautala atu ‘iā te oe i lea mea.
43. Tatou te fetaia‘i ai ma le fānauga a Isaraelu i lea mea; e fa‘apa‘iaina ai fo‘i i lo‘u mamalu.
44. ‘Ou te fa‘apa‘iaina fo‘i le fale fetāfa‘i o le fa‘apotopotoga ma le fatafaitaulaga; o Arona fo‘i ma ona atali‘i ‘ou te fa‘apa‘iaina i latou e fai le faiva o ositaulaga ‘iā te a‘u.
45. ‘Ou te nofo fa‘atasi ma le fānauga a Isaraelu, e fai a‘u mo latou Atua;
46. latou te iloa fo‘i, o a‘u o le ALI‘I o lo latou Atua, o lē na ‘aumaia i latou nai le nu‘u o Aikupito, ‘ina ‘ia ‘ou nofo ma i latou; o a‘u o le ALI‘I lo latou Atua.