1. ‘Ona latou ō lea nai Ailima, ‘ua o‘o fo‘i le fa‘apotopotoga ‘atoa uma o le fānauga a Isaraelu i le vao o Sina, o i le vā o Ailima ma Sinai, i le aso e tasi le sefulu ma le lima o lona lua o masina talu ‘ona latou tu‘ua le nu‘u o Aikupito.
2. ‘Ona muimui lea o le fa‘apotopotoga ‘atoa uma o le fānauga a Isaraelu ‘iā Mose ma Arona i le vao.
3. ‘Ua fai atu fo‘i le fānauga a Isaraelu ‘iā te i lā‘ua, “E! ‘ana oti i matou i le ‘a‘ao o le ALI‘I i le nu‘u o Aikupito, a o matou nonofo latalata i ‘ulo e tunu ai tufa‘aga, na matou ‘a‘ai fo‘i le mea e ‘ai ma mā‘o‘ona ai; auā ‘ua ‘oulua ‘aumai i matou i lenei vao ‘ina ‘ia fasiotia lenei fa‘apotopotoga ‘atoa uma i le fia ‘ai.”
4. ‘Ona fetalai mai lea o le ALI‘I ‘iā Mose, “Fa‘auta, ‘ou te fa‘atotōina ifo le mea e ‘ai mai le lagi mā ‘outou, e ō atu fo‘i le nu‘u ma latou fa‘aputuina, o le aso ma ana mea e tusa ai; ‘ina ‘ia ‘ou tofotofo ai ‘iā te i latou, pe latou te sāvavali i la‘u tulafono pe leai.
5. A o‘o fo‘i i le aso ono, latou te sauni le mea e ‘aumai ai, e ta‘ilua mea i mea e fa‘aputu ai i lea aso ma lea aso.”
6. ‘Ona fai atu lea o Mose ma Arona i le fānauga uma a Isaraelu, “A afiafi tou te iloa ai, o le ALI‘I lava na ‘aumaia ‘outou nai le nu‘u o Aikupito.
7. A taeao fo‘i, tou te va‘ai atu i le pupula o le ALI‘I, ‘ina ‘ua fa‘afofoga o ia i lo ‘outou muimui i le ALI‘I; o ai ‘ea fo‘i i mā‘ua nei, tou te muimui mai ai ‘iā te i mā‘ua?”
8. ‘Ua fai atu fo‘i Mose, “A afiafi e foa‘i mai ai e le ALI‘I ‘iā te ‘outou o manu tou te ‘a‘ai ai, o le taeao fo‘i e foa‘i mai ai le mea e ‘ai tou te mā‘o‘ona ai lava; ‘ina ‘ua fa‘afofogaina e le ALI‘I lo ‘outou muimui tou te muimui ai ‘iā te ia; auā o ai ‘ea i mā‘ua nei? E lē o i mā‘ua, a o le ALI‘I tou te muimui i ai.”
9. ‘Ua fai ane fo‘i Mose ‘iā Arona, “‘Ia e fai atu i le fa‘apotopotoga ‘atoa uma o le fānauga a Isaraelu, ‘‘Ia ‘outou fa‘alatalata mai i luma o le ALI‘I, auā ‘ua ia fa‘afofoga i lo ‘outou muimui.’”
10. ‘Ua o‘o fo‘i ‘ina o tautala atu Arona i le fa‘apotopotoga ‘atoa uma o le fānauga a Isaraelu, ‘ua latou va‘ai atu i le vao, fa‘auta, o le pupula o le ALI‘I ‘ua fa‘aali mai i le ao.
11. ‘Ona fetalai mai lea o le ALI‘I ‘iā Mose, ‘ua fa‘apea mai,
12. “‘Ua ‘ou fa‘alogo i le muimui o le fānauga a Isaraelu; ‘inā fai atu ia ‘iā te i latou, ‘ia fa‘apea atu, ‘O le afiafi tou te ‘a‘ai ai manu, o le taeao fo‘i tou te mā‘o‘ona ai i le mea e ‘ai, i le tou te iloa ai, o a‘u lava o le ALI‘I lo ‘outou Atua.’”
13. ‘Ua o‘o fo‘i i le afiafi ‘ona a‘e mai lea o salu, ‘ua ufitia ai le togālauapi, o le taeao fo‘i ‘ua totō ai le sau, ‘ua si‘oina ai le togālauapi,
14. ‘Ua alu a‘e fo‘i le sau sa totō, fa‘auta, o le fogā‘ele‘ele, ‘ua i ai ni mea iti fa‘alapotopoto, e la iti pei o le sauto‘a i luga o le ‘ele‘ele.
15. ‘Ua iloa e le fānauga Isaraelu, ‘ona latou fai ane lea le tasi i le tasi, “Se a ‘ea lenei?” Auā latou te le‘i iloa po o le a lea.A ‘ua fai atu Mose ‘iā te i latou, “O le mea e ‘ai lenei ‘ua foa‘iina mai e le ALI‘I ‘iā te ‘outou e ‘a‘ai ai.
16. O le mea lava lenei ‘ua poloa‘i mai ai le ALI‘I: ‘‘Ia fa‘aputu i ai e ta‘itasi le tagata e tusa ma lana e ‘ai ai, o le omera mā le tagata, e tusa ma o ‘outou tagata ‘ua faitauina, ‘ia ‘outou ta‘itasi ma ‘ave e fa‘atatau i ē o i lona fale ‘ie.’”
17. ‘Ua fa‘apea lava ‘ona faia o le fānauga a Isaraelu, ‘ua latou fa‘aputu lava, ‘ua tele a isi, a ‘ua itiiti a isi.
18. ‘Ona latou fuatia lea i le omera; o lē ‘ua tele ana mea e leai sana mea e toe, o lē ‘ua itiiti ana mea, e lē fa‘alēlava fo‘i ana mea, ‘ua latou ta‘itasi ma fa‘aputu e tusa ma lana mea e ‘ai ai.
19. ‘Ona fai atu lea o Mose ‘iā i latou, “‘Aua ne‘i tu‘u e se tagata sina toe mea i le taeao.”
20. ‘Ae le‘i fa‘alogo i latou ‘iā Mose, ‘ua tu‘u e nisi tagata toe mea i le taeao, i le ‘ua tupu ai ilo, ‘ua elosia; ‘ona ita ai lea o Mose ‘iā te i latou.
21. ‘Ua latou fa‘aputu ai fo‘i i lea taeao ma lea taeao, e ta‘itasi le tagata e tusa ma lana e ‘ai ai; a vevela fo‘i le lā, ‘ona usi ai lea.
22. ‘Ua o‘o fo‘i i le aso ono, ‘ona latou fa‘aputu ai lea e lua mai a latou mea e ‘ai, e ta‘ilua omera mā le tagata e to‘atasi; i le ‘ua ō ane ai o matai uma o le fa‘apotopotoga, ma fa‘aali atu ai ‘iā Mose.
23. ‘Ona fai atu lea o ia ‘iā te i latou, “O le mea lava lenei ‘ua fetalai mai ai le ALI‘I: ‘O le aso taeao o le mālōlōga lea o le sapati pa‘ia i le ALI‘I; o mea tou te fia tao, ‘inā tao ia, o mea fo‘i tou te fia tunuina, ‘inā tunu ia; o mea uma fo‘i ‘ua toe ‘ia ‘outou tu‘u lea mā ‘outou, ma teu ai se‘ia taeao.’”
24. ‘Ua latou tu‘ua fo‘i i le taeao, pei ‘ona poloa‘i mai ai o Mose; ‘ae le‘i elosia lava, e leai lava se ilo o i ai.
25. ‘Ona fai atu lea o Mose, “Tou te ‘a‘ai lea i le asō, auā o le sapati le aso nei i le ALI‘I, tou te lē maua se mea i le vao i le asō.
26. O aso e ono tou te fa‘aputu ai, a o aso fitu, o le sapati lea, e lē i ai se mea.”
27. ‘Ona o‘o lea i le aso fitu, ‘ua ō ane ai nisi tagata latou te fa‘aputu, ‘ae le‘i maua se mea e i latou.
28. ‘Ona fetalai mai lea o le ALI‘I ‘iā Mose, “Tou te lē mafafai se‘ia afea ‘ona tausi i a‘u poloa‘iga ma a‘u tulafono?
29. Fa‘auta ‘ea, ‘ua tu‘uina mai e le ALI‘I le sapati ‘iā te ‘outou, o le mea lea ‘ua ia foa‘iina mai ai i le aso ono o le mea e ‘ai mo aso e lua, ‘ina ‘ia ‘outou nonofo e ta‘itasi i le mea e nofo ai, ‘aua le alu i fafo se tagata i le mea e nofo ai i le aso fitu.”
30. ‘Ona mālōlō lea o le nu‘u i le aso fitu.
31. ‘Ua fa‘aigoa lea mea e le ‘āiga o Isaraelu, o le manai; e pei o le fatu koriano fo‘i ia, e sinasina, e tusa fo‘i lona manogi ma le fa‘apāpā areto ‘ua palu ma le meli.
32. ‘Ua fai atu fo‘i Mose, “O le mea lenei ‘ua fetalai mai ai le ALI‘I: ‘‘Ia ‘outou fa‘atumuina ai se omera, ‘ina ‘ia teu mo o ‘outou tupulaga amulī, ‘ina ‘ia latou iloa le mea e ‘ai na ‘ou fagaina ai ‘outou i le vao, ‘ina ‘ua ‘ou ‘aumaia ‘outou nai le nu‘u o Aikupito.’”
33. ‘Ua fai ane fo‘i Mose ‘iā Arona, “‘Ia e ‘ave se ‘ato ma tu‘u i ai le tumu o le omera o le manai, ma ‘ia e tu‘uina i luma o le ALI‘I, ‘ina ‘ia teu mo ‘outou tupulaga amulī.”
34. Fa‘apei ‘ona fetalai mai le ALI‘I ‘iā Mose, ‘ua fa‘apea lava ‘ona tu‘uina e Arona i luma o le ‘atola‘au o le tulafono, ‘ina ‘iā teu ai.
35. ‘Ua ‘a‘ai fo‘i le manai e le fānauga a Isaraelu i ona tausaga e fagafulu, ‘ina se‘ia latou o‘o atu i le nu‘u ‘ainā, ‘ua o‘o i tuā‘oi o le nu‘u o Kanana ‘ua latou ‘a‘ai ai le manai.
36. O le omera, o lona vaega e sefulu lea o le efa.