1. ‘Ona fetalai mai lea o le Atua i nei ‘upu uma lava, ‘ua fa‘apea mai:
2. O a‘u o le ALI‘I lou Atua, o lē na ‘aumaia oe nai le nu‘u o Aikupito, o le mea sa nofo pologa ai.
3. ‘Aua ne‘i e fai mo oe ni atua ‘ese i o‘u luma.
4. ‘Aua ‘e te fai mo oe se tupua ‘ua tā po o se fa‘atusa lava o se mea o i le lagi i lugā, po o i le fanua i lalō, po o i le sami o i lalo o le fanua;
5. ‘aua ‘e te ifo i ai, ‘aua fo‘i ‘e te ‘au‘auna i ai; auā o a‘u o le ALI‘I lou Atua, o le Atua fuā, o lē taui atu i fānau o le amioletonu a o latou mātua, e o‘o i le tupulaga e tolu ma le fa o ē ‘ino‘ino mai ‘iā te a‘u.
6. A ‘ou te alofa i afe o tupulaga o ē alolofa mai ‘iā te a‘u ma tausi mai i a‘u poloa‘iga.
7. ‘Aua ‘e te ta‘u fua le suafa o le ALI‘I lou Atua; auā e lē fa‘asaoina e le ALI‘I o lē ta‘u fua i lona suafa.
8. ‘Ia e manatua le aso sapati ‘e te fa‘apa‘iaina.
9. O aso e ono ‘e te galue ai, ma fai ai au galuega uma lava;
10. a o le aso fitu o le sapati lea i le ALI‘I lou Atua; ‘aua ‘e te fai ai se galuega e tasi, o oe, ma lou atali‘i, ma lou afafine, o lau ‘au‘auna tane, ma lau ‘au‘auna fafine, o au manu fo‘i, ma le tagata ‘ese o lo‘o mau ma oe.
11. Auā na faia e le ALI‘I i aso e ono o le lagi ma le lalolagi, ‘atoa ma le sami, ma mea uma lava o i ai, ‘ona mālōlō ai lea o ia i le aso fitu; o le mea fo‘i lea na fa‘amanuia ai e le ALI‘I le aso sapati, ma na fa‘apa‘iaina ai.
12. ‘Ia e āva i lou tamā ma lou tinā, ‘ina ‘ia fa‘alevaleva ai ou aso i le nu‘u o le a foa‘iina mai e le ALI‘I lou Atua ‘iā te oe.
13. ‘Aua ‘e te fasioti tagata.
14. ‘Aua ‘e te mulilua.
15. ‘Aua ‘e te gaoi.
16. ‘Aua ‘e te molimau pepelo i lē lua te tuā‘oi.
17. ‘Aua ‘e te mana‘o i le fale o lē lua te tuā‘oi, ‘aua ‘e te mana‘o i le avā a lē lua te tuā‘oi, po o lana ‘au‘auna tane, po o lana ‘au‘auna fafine, po o lana povi, po o lana asini, po o se tasi mea a lē lua te tuā‘oi.
18. ‘Ua iloa e le nu‘u uma lava le faititili, ma le uila, ma le ta‘alili o le pū, ma le mauga ‘ua pusa, ‘ona fefefe lea o le nu‘u ‘ua gatete lava i latou ma tutū mamao atu.
19. ‘Ua latou fa‘apea mai fo‘i ‘iā Mose, “‘Ia e tautala mai oe ‘ia te i matou, matou te fa‘alogo i ai; ‘ae ‘aua le fetalai mai le Atua ‘iā te i matou, ne‘i matou oti.”
20. ‘Ua tali atu Mose i le nu‘u, “‘Aua tou te fefefe; auā ‘ua afio mai le Atua ‘ina ‘ia tofotofo ‘iā te ‘outou, ‘ina ‘ia mata‘utia fo‘i o ia e ‘outou, ‘ina ne‘i ‘outou agasala.”
21. ‘Ona tutū mamao atu lea o le nu‘u a o Mose ‘ua ia fa‘alatalata atu i le mea pogisā ‘ua i ai le Atua.
22. ‘Ua fetalai mai fo‘i le ALI‘I ‘iā Mose: ‘Ia e fai atu i le fānauga a Isaraelu, ‘ia fa‘apea atu, “‘Ua ‘outou iloa ‘ua ‘ou tautala atu ‘iā te ‘outou mai le lagi;
23. ‘aua tou te faia atua ario e fa‘aopoopo mai ‘iā te a‘u, ‘aua fo‘i ne‘i faia atua auro mo ‘outou.
24. ‘ia e faia le fata ‘ele‘ele e fai a‘i taulaga ‘iā te a‘u, ma ‘ia e fai taulaga i ona luga, o au taulaga mū, ma au taulaga fa‘afetai, o au mamoe, ma au povi; o mea uma lava ‘ou te fa‘ailoa atu ai lo‘u igoa, ‘ou te alu atu ai ‘iā te oe, ma ‘ou fa‘amanuia ai ‘iā te oe.
25. ‘Āfai fo‘i ‘e te faia se fata ma‘a e fai a‘i taulaga ‘iā te a‘u, ‘aua le faia i ma‘a talai, auā pe a e talai i se to‘i, ‘ona leaga ai lava lea ‘iā te oe.
26. ‘Aua fo‘i ‘e te alu a‘e i se ala fa‘a‘apefa‘i i lo‘u fatafaitaulaga ne‘i aliali ai lou tino.”