1. ‘Ona fetalai mai lea o le ALI‘I ‘iā Mose ma Arona i le nu‘u o Aikupito, o lo‘o fa‘apea mai:
2. E ‘avea lenei masina ‘iā te ‘outou ma ulua‘i masina, o le masina muamua lava lea ‘iā te ‘outou i le tausaga.
3. ‘Ia ‘oulua fai atu i le fa‘apotopotoga uma o Isaraelu, ‘ia fa‘apea atu, o le aso e sefulu o lenei masina ‘ia ta‘itasi ai i latou ma lana tama‘i mamoe i ‘āiga o latou tamā, o le ‘āiga ma le tama‘i mamoe.
4. Pe ‘āfai fo‘i e to‘aitiiti le ‘āiga, e lē mafai ‘ona uma sa latou tama‘i mamoe, ‘ona la fa‘atasi ai lea ma lē ‘ua tuā‘oi o la ‘āiga, e tusa ma le faitau aofa‘i o tagata; ‘ia fa‘atatau le tama‘i mamoe ma tagata latou te ‘a‘ai ai.
5. ‘Ia sao ‘ona lelei la ‘outou tama‘i mamoe, o le po‘a, e tasi lona tausaga, tou te ‘aumai ai i le lafu mamoe, po o le lafu ‘oti.
6. Tou te tausi i ai se‘ia o‘o atu i le aso e sefulu ma le fa o lenei masina; ‘ona fasi ai lea e le fa‘apotopotoga ‘atoa uma o Isaraelu i le afiafi.
7. ‘Ia latou ‘ave fo‘i nisi toto, ma avatu i pou e lua o le faitoto‘a ma ona fa‘alava i luga i o latou fale latou te ‘a‘ai ai.
8. Latou te ‘a‘ai fo‘i le tino i lea lava po, ‘ua tunu i le afi, ‘atoa fo‘i ma areto e lē fa‘afefeteina, ma la‘au ‘o‘ona latou te ‘ina‘i ai.
9. ‘Aua tou te ‘a‘ai ai e fa‘alēvela po o tunua i le vai, a ‘ia tunua lava i le afi, o lona ulu, ma ona vae, ma ona tōtōga.
10. ‘Aua fo‘i ne‘i i ai se mea e toe, e o‘o i le taeao; a o se mea e toe, e o‘o i le taeao, ‘ia susunu lava ia i le afi.
11. ‘Ia fa‘apea fo‘i ‘ona ‘outou ‘a‘ai ai, o ‘outou sulugātiti ‘ia fusia, ma o ‘outou se‘e i o ‘outou vae, ma o ‘outou to‘oto‘o i o ‘outou lima, tou te ‘a‘ai ai fa‘ata‘alise; o le paseka lava lea i le ALI‘I.
12. Auā o le po nanei, ‘ou te ui ane ai i le nu‘u o Aikupito, ma ‘ou taia ulumatua uma lava i le nu‘u o Aikupito, o tagata ‘atoa ma manu; ‘ou te fa‘asala fo‘i i atua uma lava o Aikupito; o a‘u lava o le ALI‘I.
13. E fai fo‘i le toto ma fa‘ailoga ‘iā te ‘outou i fale tou te i ai, ‘ou te va‘ai atu fo‘i i le toto, ‘ona ‘ou sosopo ai lea ‘iā te ‘outou e lē o‘o fo‘i ‘iā te ‘outou le mala e fano ai, pe a ‘ou taia le nu‘u o Aikupito.
14. E fai fo‘i lenei aso ma fa‘amanatuga ‘iā te ‘outou, tou te fai ai fo‘i le tausamiga i le ALI‘I; e faia ‘iā ‘outou tupulaga amulī le tausamiga, o le tulafono e fa‘avavau.
15. E fitu aso tou le ‘a‘ai ai areto e lē fa‘afefeteina; o le aso muamua lava tou te ‘ave ‘ese ai mea e fa‘afefete a‘i i o ‘outou fale; auā ‘ai sē ‘ai le areto ‘ua fa‘afefeteina e āfua i le aso muamua e o‘o i le aso fitu, e vavae‘eseina lea tagata i Isaraelu.
16. Tou te faia fo‘i le fa‘apotopotoga pa‘ia i le aso muamua, ma le fa‘apotopotoga pa‘ia i le aso fitu; ‘aua le fai ai se galuega e tasi, tau lava o mea e ‘ai a tagata uma, na o lea tou te faia.
17. ‘Ia ‘outou tausi fo‘i i le tausamiga o areto e lē fa‘afefeteina, auā o lenei lava aso ‘ua ‘ou ‘aumai ai a ‘outou ‘au nai le nu‘u o Aikupito, o le mea lea tou te tausi ai lenei aso ‘iā ‘outou tupulaga amulī, o le tulafono lea e fa‘avavau.
18. O le ulua‘i masina, o le aso e sefulu ma le fa o le masina, o le afiafi, tou te ‘a‘ai ai areto e lē fa‘afefeteina, se‘ia o‘o i le afiafi o le aso e luafulu ma le tasi o le masina.
19. O ona aso ia e fitu ‘aua ne‘i iloa ai i o ‘outou fale se mea e fa‘afefete a‘i; auā ai se ‘ai le areto e fa‘afefeteina, e vavae‘eseina lea tagata nai le fa‘apotopotoga o Isaraelu, o le tagata ‘ese ‘atoa ma le tama a le ‘ele‘ele.
20. ‘Aua ne‘i ‘outou ‘a‘ai sina areto e fa‘afefeteina; ‘ia ‘outou ‘a‘ai areto e lē fa‘afefeteina i mea uma tou te nonofo ai.
21. ‘Ona ‘a‘ami lea e Mose le ‘au toeaina uma o Isaraelu, ma na fai atu ‘iā te i latou, “‘Ia ‘outou pupu‘e ma ‘ave mamoe mo ‘outou ‘āiga, ‘ona ‘outou fasi ai lea o le paseka.
22. Tou te ‘ave fo‘i se fusi isopo, ma fufui i le toto ‘ua i le ipu, ma ta a‘i le la‘au fa‘alava i luga ma pou e lua o le faitoto‘a i le toto i le ipu; ‘aua fo‘i ne‘i ‘ai so ‘outou e ulufafo atu i le faitoto‘a o lona fale se‘ia o‘o i le taeao.
23. A afio ane fo‘i le ALI‘I na te fasia Aikupito, pe a silafia e ia le toto i le la‘au fa‘alava i luga ma pou e lua o le faitoto‘a, ‘ona sosopo ane lea o le ALI‘I i lea faitoto‘a, na te lē tu‘uina atu lē na te fasiotia e ulu atu i o ‘outou fale e fasi ‘iā te ‘outou.
24. Tou te tausia fo‘i lenei mea, o le tulafono ‘iā te oe ‘atoa ma au fānau e fa‘avavau lava.
25. A ‘outou o‘o atu i le nu‘u e foa‘iina mai e le ALI‘I ‘iā te ‘outou, fa‘apei ‘ona ia fetalai mai, ‘ona ‘outou tausia lava lea lenei sauniga.
26. Pe a fai mai fo‘i a ‘outou fānau ‘iā te ‘outou, ‘O le a ‘ea le uiga ‘iā te ‘outou o lenei sauniga?’
27. ‘Ona ‘outou tali atu ai lea, ‘O le taulaga o le paseka lenei i le ALI‘I, o lē na sosopo ane i fale o le fānauga a Isaraelu i Aikupito, ‘ina ‘ua fasia e ia o Aikupito, a ‘ua fa‘asao mai e ia i o tatou ‘āiga.’”‘Ona punonou lea o le nu‘u ma ifo.
28. ‘Ona ō atu lea o le fānauga a Isaraelu, ma latou faia e pei ‘ona poloa‘i le ALI‘I ‘iā Mose ma Arona; sa fa‘apea lava ‘ona latou faia.
29. ‘Ua o‘o i le tulua o po ma ao, ‘ona fasi ai lea e le ALI‘I o ulumatua uma lava i le nu‘u o Aikupito, o le ulumatua a Farao, o lē na ti‘eti‘e i le nofoāli‘i, ‘atoa ma le ulumatua a lē ‘ua fa‘atagataotau‘aina i le fale puipui, ‘atoa uma ma ulumatua a manu.
30. ‘Ona tula‘i lea o Farao i le po, o ia ma ana ‘au‘auna uma lava, ‘atoa ma Aikupito uma, sa tele fo‘i le tagiauē i Aikupito; auā sa leai lava se fale e aunoa ma le oti.
31. ‘Ona ia ‘a‘ami atu lea ‘iā Mose ma Arona i le po, ‘ua ia fai atu i ai, “‘Inā tutū ia, ō ‘ese atu ia i lo‘u nu‘u, ‘oulua ‘atoa ma le fānauga a Isaraelu, ō atu ia ‘outou, ma ‘au‘auna i le ALI‘I, fa‘apei ‘ona ‘oulua fai mai na.
32. ‘Ia ‘ave fo‘i o ‘outou lafu mamoe ma o ‘outou lafu povi, pei ‘ona ‘oulua fai mai na, ma ‘ia ‘outou ō; ia ‘oulua fa‘amanuia mai fo‘i ‘iā te a‘u lava.”
33. ‘Ua nanati fo‘i Aikupito i le nu‘u ‘ina ‘ia vave ‘ona tu‘uina atu i latou e ō ‘ese i le nu‘u; auā ‘ua latou fa‘apea ane, “O le a uma lava i tatou i le oti.”
34. ‘Ona ‘ave ai lea e le nu‘u o a latou paluga falaoa, a o le‘i fa‘afefeteina, ‘atoa ma a latou mea e palu ai falaoa ‘ua afifī i o latou ‘ofu i luga i o latou ‘ua.
35. ‘Ua fai fo‘i e le fānauga a Isaraelu fa‘apei ‘ona fai mai ai Mose, ‘ua latou fai atu ‘iā Aikupito i mea ario, ma mea auro, ‘atoa ma ‘ofu.
36. ‘Ua fa‘atupuina, e le ALI‘I le alofa o Aikupito i le nu‘u; ‘ua latou ‘aumaia mea na fai atu ai; ‘ua latou fa‘amatitivaina ai Aikupito.
37. ‘Ona ō malaga lea o le fānauga a Isaraelu nai Ramese i Sukota, pe ‘atoa le ono galau o afe o tagata malolosi o sāvavali, e le‘i faitaulia tama.
38. ‘Ua ō a‘e fo‘i fa‘atasi ma i latou tagata ‘ese e to‘atele, ‘atoa ma lafu mamoe ma povi, o mea e tele lava.
39. ‘Ua latou tunu fo‘i le paluga falaoa na latou ‘aumaia nai Aikupito, o pōtoi areto e lē fa‘afefeteina; auā e le‘i fa‘afefeteina, auā na tulia i latou nai Aikupito, e lē mafai ‘ona fa‘atuatuai, e le‘i saunia fo‘i sa latou oso.
40. O ona po fo‘i sa nonofo ai le fānauga a Isaraelu i Aikupito, ‘ua fa selau ma le tolusefulu o tausaga.
41. ‘Ua o‘o ‘ina ‘ua ‘atoa o tausaga e fa selau ma le tolusefulu, o lea lava aso, na ō ‘ese atu ai o ‘au uma lava a le ALI‘I nai le nu‘u o Aikupito.
42. O le po lava lea e tausiusia mo le ALI‘I, ‘ina ‘ua na ‘aumai ai i latou nai le nu‘u o Aikupito; o le po lava lenei e tausiusia mo le ALI‘I e le fānauga uma lava a Isaraelu i o latou tupulaga amulī.
43. ‘Ua fetalai mai fo‘i le ALI‘I ‘iā Mose ma Arona: O le tulafono lenei i le paseka: ‘aua le ‘ai i ai se tagata ‘ese.
44. A o ‘au‘auna uma lava a tagata ‘ua fa‘atauina i tupe pe a peritomeina so latou, ‘ona ‘ai ai lava lea o ia.
45. O lē āumau ma galue i le totogi, ‘aua ne‘i ‘a‘ai ai.
46. E tasi le fale e ‘a‘ai ai, ‘aua ne‘i ‘ave i fafo sina tufa‘aga nai le fale; ‘aua fo‘i ne‘i ‘outou gagau sona ivi.
47. E fai lava lenei mea e le fa‘apotopotoga ‘atoa uma o Isaraelu.
48. Pe ‘āfai fo‘i e āumau ‘iā te oe se tagata ‘ese, a mana‘o ia e fai le paseka i le ALI‘I, ‘ia peritomeina o tane uma lava ‘ua ‘iā te ia, ‘ona fa‘alatalata ane lea o ia e fai ai; e tusa fo‘i o ia ma tama a le ‘ele‘ele; ‘ae ‘aua ne‘i ‘ai ai se tasi e lē peritomeina.
49. E tasi le tulafono mo le tama a le ‘ele‘ele, ma le tagata ‘ese na te āumau ‘iā te ‘outou.
50. ‘Ona fai lea e le fānauga uma lava a Isaraelu fa‘apei ‘ona poloa‘i mai ai le ALI‘I ‘iā Mose ma Arona, ‘ua fa‘apea ‘ona latou faia.
51. O lea lava aso na ‘aumai ai e le ALI‘I o le fānauga a Isaraelu nai le nu‘u o Aikupito ‘iā latou lava ‘au.