1. ‘Ua fetalai mai fo‘i le ALI‘I ‘iā Mose, ‘ua fa‘apea mai:
2. ‘Inā ‘aumai ia o Arona ma ona atali‘i fa‘atasi ma ia, o ‘ofu fo‘i ma le u‘u e fa‘au‘uina ai ma se povi po‘a ta‘anoa e fai ma taulaga mo le agasala, ma mamoe po‘a e lua ma se ‘ato o areto e lē fa‘afefeteina.
3. Ma ‘ia e fa‘apotopoto le fa‘apotopotoga uma i le faitoto‘a o le fale fetāfa‘i o le fa‘apotopotoga.
4. ‘Ua faia fo‘i e Mose, e pei ‘ona fetalai mai ai le ALI‘I ‘iā te ia, sa fa‘apotopotoina le fa‘apotopotoga i le faitoto‘a o le fale fetāfa‘i o le fa‘apotopotoga.
5. ‘Ona fai atu ai lea o Mose i le fa‘apotopotoga, “O le mea lenei ‘ua poloa‘i mai ai le ALI‘I ‘ia faia.”
6. ‘Ona ‘aumai ai lea e Mose o Arona ma ona atali‘i, ma na fa‘atā‘ele ‘iā i latou i le vai.
7. ‘Ua na fa‘a‘ofu fo‘i ‘iā te ia i le ‘ofu tino, ma fusi ‘iā te ia i le fusi, ma fa‘a‘ofu ‘iā te ia i le ‘ofu talaloa, ma fa‘a‘ofu ‘iā te ia i le efota, ma fusi ‘iā te ia i le fusi fa‘alanu ‘ese‘ese o le efota, ma na fusi ai ‘iā te ia.
8. ‘Ua ia avane ai fo‘i le ufifatafata ma tu‘u i le ufifatafata le Urima ma le Tumema.
9. ‘Ua ia fa‘ae‘e ai fo‘i le pulou i lona ulu; ‘ua ia tu‘u ai le mea pupula ‘ua faia i le auro i luga o le pulou ‘ie i lona muaulu, o le pale pa‘ia lea; e pei ‘ona poloa‘i mai ai le ALI‘I ‘iā Mose.
10. ‘Ona ‘ave ai lea e Mose le u‘u e fa‘au‘uina ai; ‘ua na fa‘au‘uina fo‘i le malumalu ma mea uma ‘ua i ai, ma na fa‘apa‘iaina ai.
11. ‘Ua ia sausau fa‘afitu ai i luga o le fatafaitaulaga, ma fa‘au‘u ai le fatafaitaulaga ma ana mea uma, o le tanoa e mulumulu ai fo‘i ma lona tulaga e fa‘apa‘iaina ai.
12. ‘Ua ia liligi fo‘i le u‘u e u‘u a‘i i le ulu o Arona, ma fa‘au‘uina o ia, e fa‘apa‘iaina ai o ia.
13. ‘Ua ‘aumai fo‘i e Mose o atali‘i o Arona, ma fa‘a‘ofu ‘iā i latou i ‘ofu tino ma na fusi ‘iā i latou i fusi, ma na fa‘amau i o latou pulou; e pei ‘ona poloa‘i mai ai o le ALI‘I ‘iā Mose.
14. ‘Ua ia ‘aumai fo‘i le povi po‘a ta‘anoa e fai ma taulaga mo le agasala; ‘ua fa‘ae‘e fo‘i e Arona ma ona atali‘i o latou lima i le ulu o le povi po‘a ta‘anoa e fai ma taulaga mo le agasala.
15. ‘Ua ia fasi ai ‘ona ‘ave ai lea e Mose o le toto, ma na tu‘u ai i nifo o le fatafaitaulaga ‘ua so‘o ai i lona tamatama‘i lima, ma fa‘amamāina ai le fatafaitaulaga, ma na sasa‘a ifo le toto i lalo o le fatafaitaulaga, ‘ua ia fa‘apa‘iaina ai fo‘i, ‘ina ‘ia faia le togiola i ona luga.
16. ‘Ua ia avatu ai fo‘i ga‘o alo uma, ma le ga‘o punipū i luga o le finagalo, ma fatuga‘o e lua, ma ga‘o o i ai, ‘ona susunuina ai lea e Mose i le fatafaitaulaga.
17. A o le povi po‘a ta‘anoa, ma lona pa‘u, ma lona tino, ma lona otaota, ‘ua ia susunu ai i le afi i tua o le toagalauapi e pei ‘ona poloa‘i mai ai o le ALI‘I ‘iā Mose.
18. ‘Ua ia ‘aumai fo‘i le mamoe po‘a e fai ma taulaga mū, ‘ua, fa‘ae‘e ai fo‘i e Arona ma ona atali‘i o latou lima i luga o le ulu o le mamoe po‘a.
19. ‘Ua ia fasia fo‘i, ‘ona sausau lea e Mose le toto i luga o le fatafaitaulaga ‘ua so‘o ai.
20. ‘Ua ia pena le mamoe po‘a i ona tufa‘aga; ‘ua susunu fo‘i e Mose le ulu, ma tufa‘aga, ma ga‘o.
21. ‘Ua ia mulumulu fo‘i tōtōga ma vae i le vai; ‘ua susunuina fo‘i e Mose o le mamoe po‘a uma lava i le fatafaitaulaga, o le taulaga mū lea, o le mea manogi lelei, o le taulaga e fai i le afi i le ALI‘I; e pei ‘ona poloa‘i mai ai o le ALI‘I ‘iā Mose.
22. ‘Ua ia ‘aumai fo‘i lona lua o mamoe po‘a, o le mamoe po‘a o le tofiga, ‘ua fa‘ae‘e fo‘i e Arona ma ona atali‘i o latou lima i le ulu o le mamoe po‘a.
23. ‘Ua ia fasia fo‘i, ‘ona ‘ave ai lea e Mose nisi ona toto, ma tu‘u ai i le tumutumu o le taliga taumatau o Arona, ma le lima matua o lona lima taumatau, ma le vae matua o lona vae taumatau.
24. ‘Ua ia ‘aumai fo‘i atali‘i o Arona; ‘ua tu‘uina atu e Mose nisi o le toto i le tumutumu o latou taliga taumatau, ma lima matua o latou lima taumatau, ma vae matua o latou vae taumatau; ‘ua sausau fo‘i e Mose le toto i luga o le fatafaitaulaga ‘ua so‘o ai.
25. ‘Ua ia ‘ave fo‘i ga‘o, ma le i‘u, ma le ga‘o alo uma, ma le ga‘o punipū i luga o le finagalo, ma fatuga‘o e lua, ma ga‘o o i ai, ma le ālagalima taumatau.
26. ‘Ua ia ‘ave le pōtoi areto e lē fa‘afefeteina e tasi, ma le pōtoi areto ‘ua u‘uina e tasi, ma le fa‘apāpā e tasi nai le ‘ato areto e lē fa‘afefeteina ‘ua i luma o le ALI‘I, ma tu‘u ai i luga o ga‘o, ma luga o le ālagalima taumatau.
27. ‘Ua ia fa‘ae‘e ia mea uma i alofilima o Arona ma alofilima o ona atali‘i, ma na lūlūina ai, e fai ma taulaga lūlū i luma o le ALI‘I.
28. ‘Ona ‘ave‘eseina ai lea e Mose nai o latou lima, ma susunu ai i le fatafaitaulaga, i luga o le taulaga mū, o le taulaga o le tofi lea, o le mea manogi lelei, o le taulaga e fai i le afi i le ALI‘I.
29. ‘Ua ‘ave fo‘i e Mose le fatafata, ma na lūlūina ai, o le taulaga lūlū i luma o le ALI‘I; o le tufa‘aga lea e fai mā Mose i le mamoe po‘a o le tofi; e pei ‘ona poloa‘i mai ai o le ALI‘I ‘iā Mose.
30. ‘Ua ‘ave fo‘i e Mose nisi u‘u e fa‘au‘u ai, ma nisi o le toto sa i luga o le fatafaitaulaga, ma sausau ai i luga o Arona ma ona ‘ofu, i luga fo‘i o ona atali‘i ma o latou ‘ofu fa‘atasi ma ia; ‘ua ia fa‘apa‘iaina ai fo‘i Arona ma ona ‘ofu, o ona atali‘i fo‘i ma o latou ‘ofu fa‘atasi ma ia.
31. ‘Ua fai atu fo‘i Mose ‘iā Arona ma ona atali‘i, “‘Inā tunu ia tufa‘aga o le manu i le faitoto‘a o le fale fetāfa‘i o le fa‘apotopotoga, ma ‘outou ‘a‘ai ai i lea mea, ‘atoa ma le areto o i le ‘ato a le taulaga o le tofi; e pei ‘ona ‘ou poloa‘i atu, ‘ua fa‘apea atu, ‘E ‘aina lava ia e Arona ma ona atali‘i.’
32. O mea fo‘i e totoe i tufa‘aga ma areto, tou te sunua lea i le afi.
33. Tou te lē ulufafo lava i le faitoto‘a o le fale fetāfa‘i o le fa‘apotopotoga i ona pō e fitu, se‘ia ‘atoa po o le tofia o ‘outou; auā o pō lava e fitu na te fai ai le tofia o ‘outou.
34. E pei ‘ona faia e ia i le aso nei, ‘ua fa‘apea lava ‘ona poloa‘i mai ai o le ALI‘I ‘ona fai, e fai se togiola mo ‘outou.
35. Tou te nonofo ai i le faitoto‘a o le fale fetāfa‘i o le fa‘apotopotoga i le ao ma le pō i aso e fitu, ma tausiusi i le sauniga a le ALI‘I ‘ina ne‘i oti ‘outou; auā ‘ua fa‘apea lava ‘ona poloa‘i mai ai ‘iā te a‘u.”
36. ‘Ona faia lava lea e Arona ma ona atali‘i mea uma lava na poloa‘i mai ai le ALI‘I ‘iā Mose.