1. ‘Ua vala‘au mai le ALI‘I ‘iā Mose, ‘ua fetalai mai ‘iā te ia, ai le fale fetāfa‘i o le fa‘apotopotoga, ‘ua fa‘apea mai:
2. Na fai atu ia i le fānauga a Isaraelu, ‘ia fa‘apea atu ‘iā i latou: ‘Ai so ‘outou na te ‘aumai se taulaga i le ALI‘I, ‘ia ‘outou ‘aumaia la ‘outou taulaga i manu vaefā, o povi, po o mamoe.
3. ‘Āfai o se taulaga mū ai le lafu povi lana taulaga, ‘inā fai taulaga ia i se manu po‘a e sao ‘ona lelei; na te ‘aumaia i le faitoto‘a o le fale fetāfa‘i o le fa‘apotopotoga ‘ina ‘ia talia o ia i luma o le ALI‘I.
4. Na te fa‘ae‘e lona lima i le ulu o le taulaga mū, ‘ona talia lea mo ia, e fai ma togiola mōna.
5. Na te fasia fo‘i le tama‘i povi po‘a i luma o le ALI‘I; o ositaulaga, o atali‘i o Arona, latou te ‘aumai le toto, ma sausau le toto ‘ia so‘o ai i luga o le fatafaitaulaga o lo‘o i le faitoto‘a o le fale fetāfa‘i o le fa‘apotopotoga.
6. Na te sae‘eseina fo‘i le pa‘u o le taulaga mū, ma pena i ona tufa‘aga.
7. ‘Ona tu‘uina atu ai lea o le afi i luga o le fatafaitaulaga e atali‘i o Arona le ositaulaga, e fa‘aafu ai fo‘i fafie i le afi.
8. O ositaulaga fo‘i o atali‘i o Arona, latou te teua tufa‘aga, o le ulu, ‘atoa fo‘i ma le ga‘o i luga o fafie, ‘ua i luga o le afi ‘ua i luga o le fatafaitaulaga.
9. A o ona tōtōga ma ona ālaga na te mulumuluina i le vai; ‘ona susunuina ai lea ‘atoa uma e le ositaulaga i luga o le fatafaitaulaga, o le taulaga mū lea, o le taulaga e fai i le afi, o le mea manogi lelei i le ALI‘I.
10. ‘Ae ‘āfai na te faia sana taulaga a‘i le lafu, po o se mamoe, po o se ‘oti, e fai ma taulaga mū, na te ‘aumai ai se po‘a e sao ‘ona lelei.
11. Na te fasi ai fo‘i i le itū i matū o le fatafaitaulaga i luma o le ALI‘I; o ositaulaga fo‘i, o atali‘i o Arona, latou te sausau ai lona toto ‘ia so‘o ai i luga o le fatafaitaulaga.
12. Na te penaina ona tufa‘aga, ‘atoa ma lona ulu, ma ona ga‘o, e teuteu e le ositaulaga i luga o fafie ‘ua i luga o le afi, ‘ua i luga o le fatafaitaulaga.
13. A o tōtōga ma ālaga na te mulumuluina i le vai; e ‘aumai mea uma e le ositaulaga, ‘ona susunuina ai lea e le ositaulaga i luga o le fatafaitaulaga, o le taulaga mū lea, o le taulaga e fai i le afi, o le mea manogi lelei i le ALI‘I.
14. ‘Ae ‘āfai na te faia se taulaga mū i le ALI‘I i se manulele, ‘ona ‘aumai ai lea e ia o lana taulaga i manutagi, po o tama‘i lupe.
15. ‘Ona ‘aumai lea e le ositaulaga i le fatafaitaulaga, ma gagau ‘ese lona ulu, ma susunu ai i luga o le fatafaitaulaga; ona tatauina ai lea o lona toto i le itū o le fatafaitaulaga.
16. Na te tō‘eseina fo‘i lona tagā‘ai ma mea o i ai, ma lafo ai i tafatafa o le fatafaitaulaga i le itū i sasa‘e, i le mea o i ai lefulefu.
17. Na te vaeluaina le manu ma ona ‘apa‘au, ‘ae lē motu ‘ese; ‘ona susunu ai lea e le ositaulaga i luga o le fatafaitaulaga i luga o fafie ‘ua i luga o le afi, o le taulaga mū lea, o le taulaga e fai i le afi, o le mea manogi lelei i le ALI‘I.#