1. ‘Ua fetalai mai fo‘i le ALI‘I ‘iā Mose ma Arona, ‘ua fa‘apea mai:
2. ‘Āfai ‘ua i se tagata i le pa‘u o lona tino se ma‘i fulafula, po o se mea fa‘apa‘upa‘u, po o se lupe, ‘ua i le pa‘u o lona tino e pei o le ila lepela; ‘ona ‘aumaia lea o ia ‘iā Arona le ositaulaga, po o se tasi o ona atali‘i o ositaulaga.
3. ‘Ona matamata atu ai lea o le ositaulaga i le ila i le pa‘u o lona tino; a liua fo‘i fulufulu o i le ila, ‘ua sinasina, ‘ua peiseaī fo‘i ‘ua ‘omo ifo le ila i le pa‘u o lona tino; o le ila lepela lava lea; e matamata atu fo‘i le ositaulaga ‘iā te ia, ma fai atu ‘ua leaga o ia.
4. ‘Āfai fo‘i ‘ua sinasina le lupe i le pa‘u o lona tino, ‘ae peiseaī ‘ua lē ‘omo ifo i le pa‘u, ‘ua lē liua sinasina fo‘i fulufulu; ‘ona puipuia lea e le ositaulaga lē o i ai le ila se‘ia o‘o i le po fitu.
5. E matamata atu fo‘i le ositaulaga ‘iā te ia i le aso fitu, fa‘auta fo‘i, a iloa atu i le ila, ‘ua gata, ‘ua lē sosolo fo‘i le ila i le pa‘u, ‘ona toe puipui ai lea e le ositaulaga ‘iā te ia i nisi aso e fitu.
6. E toe va‘ai atu fo‘i le ositaulaga ‘iā te ia i le isi aso fitu; fa‘auta fo‘i, ‘ua sinasina fa‘anenefu le ila, ‘ua lē sosolo fo‘i le ila i le pa‘u, ‘ona ta‘umamā ai lea o ia e le ositaulaga, ‘ua na o le mea fa‘apa‘upa‘u lava; ‘ona ta ai lea e ia ona ‘ofu, ‘ona mamā ai lea o ia.
7. ‘Ae ‘āfai ‘ua sosolo tele le mea fa‘apa‘upa‘u i le pa‘u, ‘ina ‘ua uma ‘ona matamata ‘iā te ia o le ositaulaga e fa‘amamāina ai o ia, ‘ona toe matamata atu ai lea o le ositaulaga ‘iā te ia;
8. a iloa atu e le ositaulaga, fa‘auta fo‘i, o lo‘o sosolo le mea fa‘apa‘upa‘u i le pa‘u, ‘ona fai atu ai lea e le ositaulaga ‘ua leaga o ia; o le lepela lava o ia.
9. ‘Āfai o i ai le ila lepela i se tagata, ‘ona ‘aumai ai lea o ia i le ositaulaga.
10. A va‘aia e le ositaulaga; fa‘auta fo‘i, ‘ua sinasina le mea fulafula i le pa‘u, ‘ua liua fo‘i ‘ua sinasina fulufulu, o i ai fo‘i le ‘a‘ano totototo i le mea fulafula;
11. o le lepela lea ‘ua leva i le pa‘u o lona tino, e fai atu e le ositaulaga ‘ua leaga o ia, e lē puipui ‘iā te ia; auā ‘ua leaga o ia,
12. ‘Āfai fo‘i ‘ua tupu tele le lepela i le pa‘u, ‘ua liloia uma ai le pa‘u o lē ‘ua i ai le ila i le lepela, e āfua ifo i lona ulu e o‘o lava i ona vae, i mea uma o matamata atu ai le ositaulaga;
13. ‘ona va‘ava‘ai atu ai lea o le ositaulaga; fa‘auta fo‘i, ‘ua lilo lona tino uma i le lepela, na te ta‘umamāina o lē ‘ua i ai le ila; ‘ua liua uma ‘ua sinasina; ‘ua mama o ia.
14. ‘Ae peita‘i o le aso e iloa ai le ‘a‘ano totototo, e leaga ai o ia.
15. E matamata atu fo‘i le ositaulaga i le ‘a‘ano totototo, ma fai atu ‘ua leaga o ia; o le mea leaga le ‘a‘ano totototo; o le lepela lea.
16. ‘Āfai fo‘i ‘ua toe liua le ‘a‘ano totototo, ‘ua liua ‘ua sinasina, ‘ona alu ane ai lea o ia i le ositaulaga.
17. ‘Ona matamata atu ai lea o le ositaulaga, fa‘auta fo‘i, ‘ua liua le ila ‘ua sinasina; ‘ona ta‘umamāina ai lea e le ositaulaga o ia o i ai le ila; ‘ua mamā o ia.
18. O le pa‘u, o le tino sa i ai se papala, a ‘ua mafu,
19. ‘ae ‘āfai o i le mea sa i ai le papala e i ai se mea fulafula sinasina, po o se lupe ‘ua sinasina fa‘amūmū, ‘ua va‘aia fo‘i e le ositaulaga;
20. ‘ua va‘aia fo‘i e le ositaulaga, fa‘auta fo‘i, ‘ua peiseaī ‘ua ‘omo ifo i le pa‘u, ‘ua liua fo‘i ‘ua sinasina fulufulu o i ai, ‘ona fai atu ai lea o le ositaulaga ‘ua leaga o ia; o le ila lepela lea, o le papala e tupu ai le manunu.
21. ‘Ae ‘āfai e iloa e le ositaulaga, fa‘auta fo‘i, ‘ua leai ni fulufulu sinasina, ‘ua lē ‘omo ifo fo‘i i le pa‘u, a ‘ua sinasina fa‘anenefu; ‘ona puipuia lea o ia e le ositaulaga i aso e fitu.
22. ‘Ae ‘āfai ‘ua sosolo tele i le pa‘u, ‘ona fai atu ai lea e le ositaulaga ‘ua leaga o ia; o le ila lava lea.
23. ‘Ae ‘āfai ‘ua gata le lupe i le mea sa i ai, ‘ua lē sosolo, o le papala vevela lea; e ta‘umamāina ai o ia e le ositaulaga.
24. ‘Āfai fo‘i e i le pa‘u o le tino mea ‘ua mū, ‘ua i ai fo‘i i le ‘a‘ano ‘ua mū se lupe ‘ua sinasina, na fa‘amūmū, pe fa‘asinasina.
25. ‘Ona matamata atu ai lea o le ositaulaga, fa‘auta fo‘i, ‘ua liua ‘ua sinasina fulufulu o i le lupe, ‘ua peiseaī ‘ua ‘omo ifo ia i le pa‘u; o le lepela lava lea ‘ua tupu ai i le mea sa mū; ‘ona fai atu ai lea e le ositaulaga ‘ua leaga o ia; o le ila lepela lava lea.
26. ‘Ae ‘āfai ‘ua iloa ai e le ositaulaga, fa‘auta fo‘i, ‘ua leai ni fulufulu sinasina i le lupe, ‘ua lē ‘omo ifo fo‘i i le pa‘u, a ‘ua sinasina fa‘anenefu; ‘ona puipuia ai lea o ia e le ositaulaga i aso e fitu.
27. ‘Ona matamata atu ai lea e le ositaulaga ‘iā te ia i le aso fitu; ‘āfai fo‘i ‘ua sosolo tele i le pa‘u, e fai atu e le ositaulaga ‘ua leaga o ia; o le ila lepela lava lea.
28. ‘Ae ‘āfai ‘ua gata le lupe i le mea sa i ai, ‘ua lē sosolo i le pa‘u, a ‘ua sinasina fa‘anenefu; o le ma‘i fulafula lea i le mea na mū, e ta‘umamāina ai o ia e le ositaulaga; auā o le ma‘i vevela lea i le mea na mū.
29. ‘Ai se tane po o se fafine ‘ua i ai se ila i le ulu po o le ‘ava;
30. ‘ona matamata atu ai lea o le ositaulaga i le ila; fa‘auta fo‘i, ‘ua peiseaī ‘ua ‘omo ifo i le pa‘u; ‘ua i ai fo‘i lauulu se‘ea fa‘asamasama; e fai atu e le ositaulaga ‘ua leaga o ia; o le ma‘i pa‘upa‘ua, o le lepela lava lea i le ulu po o le ‘ava.
31. ‘Āfai fo‘i ‘ua iloa e le ositaulaga i le ila o le ma‘i pa‘upa‘ua, fa‘auta fo‘i, ‘ua peiseaī ‘ua lē ‘omo ifo i le pa‘u, ‘ua leai ni lauulu uliuli o i ai; ‘ona puipuia ai lea o ia ‘ua i ai le ila o le ma‘i pa‘upa‘ua e le ositaulaga, i aso e fitu.
32. O le aso fitu e matamata atu ai le ositaulaga i le ila; fa‘auta fo‘i, ‘ua lē sosolo le ma‘i pa‘upa‘ua, ‘ua leai fo‘i ni lauulu fa‘asamasama, ‘ua peiseaī ‘ua lē ‘omo ifo le ma‘i pa‘upa‘ua i le pa‘u;
33. ‘ona tafi ai lea e ia o lona lauulu, ‘ae ‘aua ne‘i tafi le ma‘i pa‘upa‘ua; ‘ona toe puipuia ai lea o ia e le ositaulaga i nisi aso e fitu;
34. a o‘o i le aso fitu ‘ona matamata atu ai lea o le ositaulaga i le ma‘i pa‘upa‘ua, fa‘auta fo‘i, ‘ua lē sosolo le ma‘i pa‘upa‘ua i le pa‘u, ‘ua peiseaī ‘ua lē ‘omo ifo fo‘i i le pa‘u; ‘ona ta‘umamāina ai lea o ia e le ositaulaga; na te ta fo‘i ona ‘ofu, ‘ona mamā ai lea o ia.
35. ‘Ae ‘āfai ‘ua sosolo tele le ma‘i pa‘upa‘ua i le pa‘u, a ‘ua uma ‘ona fa‘amamāina o ia;
36. ‘ona matamata atu ai lea o le ositaulaga ‘iā te ia; fa‘auta fo‘i, ‘ua sosolo le ma‘i pa‘upa‘ua i le pa‘u, ‘ona lē sā‘ili lea e le ositaulaga ni lauulu samasama; ‘ua leaga o ia.
37. ‘Ae ‘āfai ‘ua peiseaī ‘ua gata le ma‘i pa‘upa‘ua, ‘ua tupu ai fo‘i ni lauulu uliuli; ‘ua mafu le ma‘i pa‘upa‘ua, ‘ua mamā o ia; e ta‘umamāina fo‘i o ia e le ositaulaga.
38. ‘Ai se tane po o se fafine ‘ua i ai i le pa‘u o le tino le lupe, o le lupe ‘ua sinasina;
39. ‘ona va‘ai atu ai lea o le ositaulaga, fa‘auta fo‘i, o i ai le lupe ‘ua sinasina i le pa‘u o lona tino ‘ua nenefu fa‘asinasina; o le ila sinasina lea ‘ua tupu i le pa‘u; ‘ua mamā o ia.
40. O le tagata fo‘i ‘ua to‘ulu lona lauulu ma ulu tula o ia; ‘ua mamā o ia.
41. ‘Ae ‘āfai ‘ua to‘ulu le lauulu i lona muaulu, ‘ua tula lava lona muaulu; ‘ua mamā o ia.
42. ‘Āfai fo‘i ‘ua i le ulu tula, po o le muaulu tula se ila fa‘asinasina fa‘amūmū; o le lepela lea ‘ua tupu i lona ulu tula, po o lona muaulu tula.
43. ‘Ona va‘ai atu ai lea o le ositaulaga; fa‘auta fo‘i, ‘ua sinasina fa‘amūmū le ma‘i fulafula o i ai le ila i lona ulu tula, po o lona muaulu tula, e peiseaī e lepela i le pa‘u o le tino,
44. o le tagata lava lea ‘ua lepela, ‘ua leaga o ia; e fai atu e le ositaulaga ‘ua leaga lava o ia; o i ai lona ila i lona ulu.
45. O le tagata lepela fo‘i ‘ua i ai le ila, e saeia ona ‘ofu, e tō fo‘i lona pulou, na te ufitia fo‘i lona laugutu aupitoaluga ma ‘alaga atu, “‘Ua leaga, ‘ua leaga.”
46. O aso uma o i ai le ila ‘iā te ia e leaga ai o ia; ‘ua leaga lava o ia; e nofo to‘atasi o ia, e nofo ai o ia i tua o le toagalauapi.
47. O se ‘ofu fo‘i ‘ua i ai le ila lepela, po o se ‘ofu fulufulu mamoe, po o se ‘ofu lino;
48. po o le ala, po o le fausa; o le ‘ie lino, po o le ‘ie fulufulu mamoe, po o le pa‘u, po o se mea lava e faia i le pa‘u;
49. ‘āfai fo‘i ‘ua fa‘asamasama, po o fa‘amūmū le ila i le ‘ofu, po o le pa‘u, (o le ala, po o le fausa) po o se mea lava ‘ua faia i le pa‘u; o le ila lepela lava lea; e fa‘aali atu ai i le ositaulaga.
50. ‘Ona va‘ai atu ai lea o le ositaulaga i le ila, ‘ona puipui atu ai lea o le mea o i ai le ila i aso e fitu.
51. E matamata atu fo‘i o ia i le mea ‘ua i ai le ila i le aso fitu; ‘āfai ‘ua sosolo le ila i le ‘ofu (i le ala, po o le fausa,) po o se pa‘u, po o se mea lava ‘ua faia i le pa‘u; o le lepela ‘a‘ati lea ila; ‘ua leaga lea mea.
52. ‘Ona susunuina ai lea e ia o le ‘ofu, o le ala, po o le fausa i le ‘ie fulufulu mamoe, po o le ‘ie lino, po o se mea ‘ua faia i le pa‘u ‘ua i ai le ila; auā o le lepela ‘a‘ati lea; e susunuina ai lava i le afi.
53. ‘Ae ‘āfai ‘ua va‘ai e le ositaulaga, fa‘auta fo‘i, ‘ua lē sosolo le ila i le ‘ofu, (o le ala, po o le fausa,) po o se mea lava ‘ua faia i le pa‘u.
54. ‘ona fai atu ai lea o le ositaulaga, latou te taia le mea o i ai le ila, na te puipuia fo‘i i nisi aso e fitu.
55. ‘Ona matamata atu ai lea o le ositaulaga i le mea ‘ua i ai le ila, ‘ina ‘ua uma ‘ona taia; fa‘auta fo‘i, ‘ua lē liua le lanu o le ila, ‘ua lē sosolo fo‘i le ila; e leaga lava lea; ‘e te susunuina ai i le afi; o le mea ‘a‘ati lea, ‘ua au fulufulua i totonu po o tua.
56. ‘Ae ‘āfai ‘ua va‘ai e le ositaulaga, fa‘auta fo‘i, ‘ua sinasina fa‘anenefu le ila ‘ina ‘ua uma ‘ona taia, ‘ona sasa‘e ‘ese lea e ia i le ‘ofu, po o le pa‘u, po o le ala, po o le fausa.
57. ‘Ae ‘āfai e iloa pea i le ‘ofu, po o le ala, po o le fausa, po o se mea lava ‘ua faia i le pa‘u; o le mea sosolo lava lea ‘e te susunuina ai le mea o i ai le ila i le afi.
58. O le ‘ofu fo‘i, po o le ala, po o le fausa, po o se mea lava ‘ua faia i le pa‘u, pe a uma ‘ona taia, ‘āfai ‘ua te‘a ai ma le ila, e toe taia, ‘ona mamā ai lea.
59. O le tulafono lenā i le ila lepela i le ‘ofu fulufulu mamoe, po o le lino, (o le ala, po o le fausa) po o se mea lava ‘ua faia i le pa‘u, e ta‘umamāina ai, pe fai atu ‘ua leaga.