1. ‘Ua o‘o fo‘i i le pō valu, ‘ona vala‘au atu ai lea o Mose ‘iā Arona ma ona atali‘i, ma toeaina o Isaraelu;
2. ‘ua ia fai atu fo‘i ‘iā Arona, “‘Inā ‘ave ia se tama‘i povi e fai ma taulaga mo le agasala, ma se mamoe po‘a e fai ma taulaga mū, ia sao ‘ona lelei i lā‘ua, ma avatu ai i luma o le ALI‘I;
3. ma ‘ia e fai atu i le fānauga a Isaraelu, ‘ia fa‘apea atu, ‘‘Ia ‘outou ‘ave se ‘oti po‘a e fai ma taulaga mo le agasala, o se tama‘i povi fo‘i ma se tama‘i mamoe e tasi lo la tausaga, ‘ia sao ‘ona lelei i lā‘ua, e fai ma taulaga mū.
4. O se povi po‘a fo‘i ma se mamoe po‘a e fai ma taulaga fa‘afetai, e fai ai le taulaga i luma o le ALI‘I, ma se taulaga i mea e ‘ai ‘ua palua ma le u‘u; auā o le asō e fa‘aali mai ai le ALI‘I ‘iā te ‘outou.’”
5. ‘Ua latou ‘aumai i luma o le fale fetāfa‘i o le fa‘apotopotoga o mea na poloa‘i atu ai e Mose; ‘ona fa‘alatalata ane ai lea o le fa‘apotopotoga uma, ma latou tutū i luma o le ALI‘I.
6. ‘Ona fai atu ai lea o Mose, “O lenei le mea ‘ua poloa‘i mai ai le ALI‘I tou te faia, e fa‘aali mai ai fo‘i le pupula o le ALI‘I ‘iā te ‘outou.”
7. ‘Ua fai atu fo‘i Mose ‘iā Arona, “‘Inā fa‘alatalata atu ia oe i le fatafaitaulaga, ma e fai ai lau taulaga mo le agasala, ma lau taulaga mū, ma fai ai se togiola mo oe lava, ‘atoa ma le nu‘u, ma fai ai le taulaga mo le nu‘u, ‘ia fai fo‘i se togiola mo i latou; pei ‘ona poloa‘i mai ai o le ALI‘I.”
8. ‘Ona fa‘alatalata atu ai lea o Arona i le fatafaitaulaga, ma na fasi le tama‘i povi o le taulaga mo le agasala, mo ia lava lea.
9. ‘Ona ‘aumai lea e atali‘i o Arona le toto ‘iā te ia; ona fufui ai lea o lona tamatama‘i lima i le toto, ma tu‘u ai i nifo o le fatafaitaulaga, ma sasa‘a ai le toto i lalo o le fatafaitaulaga.
10. A o ga‘o, ma fatuga‘o, ma le ga‘o punipū i luga o le finagalo o le taulaga mo le agasala ‘ua ia susunu ai i le fatafaitaulaga, e pei ‘ona poloa‘i mai ai o le ALI‘I ‘iā Mose.
11. A o le tino ma le pa‘u ‘ua ia susunu ai i le afi i tua o le toagalauapi.
12. ‘Ua ia fasi fo‘i le taulaga mū ‘ona avatu ai lea e atali‘i o Arona le toto ‘iā te ia; na ia sausau fo‘i ‘ua so‘o ai i luga o le fatafaitaulaga.
13. ‘Ona avatu ai lea e i latou o le taulaga mū ‘iā te ia, o ona tufa‘aga ‘atoa ma le ulu; ‘ua ia susunu ai fo‘i i luga o le fatafaitaulaga.
14. ‘Ua ia mulumulu fo‘i i tōtōga ma vae, ma susunu ai i luga o le taulaga mū i le fatafaitaulaga.
15. ‘Ona ia avatu ai lea o le taulaga a le nu‘u; ‘ua ia ‘ave fo‘i le ‘oti po‘a o le taulaga mo le agasala lea mo le nu‘u, ‘ua ia fasia fo‘i ma fai ai le taulaga mo le agasala, e pei o le na muamua.
16. ‘Ua ia avatua fo‘i le taulaga mū ma na sauni ai e tusa ma le tu.
17. ‘Ua ia avatu fo‘i le taulaga i mea e ‘ai, ma lulu‘u mai ai le lu‘utaga, ma susunuina ai i luga o le fatafaitaulaga, ‘atoa lava ma le taulaga mū o le taeao.
18. ‘Ua ia fasi fo‘i le povi po‘a ma le mamoe po‘a o le taulaga mo le nu‘u ‘ua avatu fo‘i e atali‘i o Arona le toto ‘iā te ia; ‘ua ia sausau i luga o le fatafaitaulaga ‘ua so‘o ai.
19. A o ga‘o o le povi po‘a ma le mamoe po‘a, ma le i‘u ma le ga‘o alo ma fatuga‘o, ma le ga‘o punipū i luga o le finagalo;
20. ‘ua latou fa‘ae‘e ga‘o i luga o le fatafata, ‘ua ia susunu fo‘i ga‘o i le fatafaitaulaga.
21. ‘Ua lūlūina fo‘i e Arona o fatafata ma le ālagalima taumatau, o le taulaga lūlū i luma o le ALI‘I; e pei ‘ona poloa‘i atu ai o Mose.
22. ‘Ona sisi‘i ai lea e Arona ona lima i luga o le nu‘u ma fa‘amanuia atu ai ‘iā i latou; ‘ona alu ifo ai lea o ia ma ‘ua uma ‘ona fai o le taulaga mo le agasala, ma le taulaga mū, ma le taulaga fa‘afetai.
23. ‘Ua ulufale atu Mose ma Arona i le fale fetāfa‘i o le fa‘apotopotoga, ‘ona ulufafo ai lea, ma fa‘amanuia atu i le nu‘u; ‘ona fa‘aali mai ai lea o le pupula o le ALI‘I i le nu‘u uma.
24. ‘Ona alu ane ai lea o le afi mai luma o le ALI‘I, ma susunu ai le taulaga mū i luga o le fatafaitaulaga, ‘atoa ma ga‘o; ‘ua iloa e le nu‘u uma ‘ona latou ‘alalaga ai lea ma fa‘apa‘u‘ū faō.#