1. ‘Aua tou te faia ni tupua mo ‘outou, ‘aua fo‘i tou te fa‘atūina se tupua ‘ua ta, po o se tupua ma‘a, ‘aua fo‘i tou te tu‘u se fa‘atagata ma‘a i lo ‘outou liliu, e ifo atu i ai; auā o a‘u o le ALI‘I lo ‘outou Atua.
2. ‘Ia ‘outou tausiusi i o‘u sapati, ma ‘outou matata‘u i lo‘u malumalu; o a‘u o le ALI‘I.
3. ‘Āfai tou te sāvavali i a‘u tulafono ma tausi i a‘u poloa‘iga, ma fai ai;
4. ‘ona ‘ou avatu ai lea le ‘ua ‘iā te ‘outou i ona po e tatau ai, e fua mai fo‘i le lau‘ele‘ele i ona lava fua, o la‘au fo‘i o i le fanua e fua mai ai i o latou fua.
5. E aulia le taugāvine e le soligāsaito; e aulia fo‘i le tau e lūlū ai saito e le taugāvine tou te ‘a‘ai fo‘i ‘iā ‘outou mea e ‘ai, ma mā‘o‘ona ai; tou te nonofo fo‘i i lo ‘outou nu‘u ma le filemū.
6. ‘Ou te avatu le filemū i le nu‘u, tou te ta‘o‘oto fo‘i, e leai se tasi e fa‘amata‘u ‘iā te ‘outou; ‘ou te fa‘aumatia fo‘i manu fe‘ai ai le nu‘u, e lē o‘o fo‘i le pelu i lo ‘outou nu‘u.
7. Tou te tulituliloa fo‘i i ē o fai ‘outou mo latou fili, latou te oti ai i o ‘outou luma i le pelu.
8. E tulia le to‘aselau e le to‘alima o ‘outou, e tulia fo‘i le sefulu o afe e le to‘aselau o ‘outou; o ē fai ‘outou mo latou fili e oti i latou i o ‘outou luma i le pelu.
9. Auā ‘ou te manatu alofa ‘iā te ‘outou, ‘ou te fa‘auluolaina ‘outou, ma fa‘ato‘ateleina, ‘ou te fa‘atumauina fo‘i la‘u feagaiga ‘iā te ‘outou.
10. Tou te ‘a‘ai i mea tuai, ma ‘outou ‘ave i fafo mea tuai ‘ona o mea fou.
11. ‘Ou te tu‘u fo‘i lo‘u malumalu i totonu ‘iā te ‘outou; e le ‘ino‘ino fo‘i a‘u ‘iā te ‘outou.
12. ‘Ou te fealua‘i fo‘i i totonu ‘iā te ‘outou, e fai fo‘i a‘u mo ‘outou Atua, e fai fo‘i ‘outou mo‘u nu‘u.
13. O a‘u o le ALI‘I lo ‘outou Atua, o lē na ‘aumai ‘iā te ‘outou nai le nu‘u o Aikupito, ‘ina ‘ia lē fai ‘outou mo latou pologa, na ‘ou gauia o a ‘outou amo, ma ‘ua fa‘asāvavali sasa‘o ai ‘outou.
14. ‘Ae ‘āfai tou te fa‘alogo mai ‘iā te a‘u ma ‘outou le faia ia poloa‘iga uma;
15. ‘āfai fo‘i tou te lafoa‘i i a‘u tulafono, ma ‘outou ‘ino‘ino i a‘u fa‘amasinoga, a ‘outou lē faia fo‘i a‘u poloa‘iga uma, ‘ae tu‘umavaega ‘outou i la‘u feagaiga;
16. ‘ona ‘ou faia lea e a‘u o nei mea ‘iā te ‘outou: ‘Ou te tu‘uina atu ‘iā te ‘outou le fefe, o le ma‘i fa‘aiiva, ma le ma‘i vevela e fole ai mata, ma fa‘avaivai ai loto; tou te lulufuaina a ‘outou saito, auā e ‘aina e i latou o ē fai ‘outou mo latou fili.
17. ‘Ou te faia ‘outou mo‘u fili, e fasia fo‘i ‘outou i luma o ē ita ‘iā te ‘outou, e pule fo‘i ‘iā te ‘outou e o ‘ino‘ino ‘iā te ‘outou; e sōsōla fo‘i ‘outou a o le tuliloaina e se tasi.
18. ‘Āfai fo‘i tou te lē āu fa‘alogo mai ‘iā te a‘u ‘ona o ia mea, ‘ona ‘ou fa‘aopoopo fa‘afitu ai lea ‘ona a‘oa‘i atu ‘iā te ‘outou ‘ona o a ‘outou agasala.
19. ‘Ou te nutipalaina lo ‘outou malosi ‘ua ‘outou mitamita ai; ‘ou te liliu ai lo ‘outou lagi e pei o le u‘amea, ma lo ‘outou lau‘ele‘ele e pei o le ‘apamemea.
20. E fa‘amaumau fua fo‘i lo ‘outou malosi; auā e lē fua mai ni ona fua i lo ‘outou lau‘ele‘ele, o la‘au fo‘i i lo ‘outou fanua e le fua mai ai ni o latou fua.
21. ‘Āfai fo‘i tou te tete‘e mai ‘iā te a‘u, ma ‘outou lē fa‘alogo mai lava ‘iā te a‘u, ‘ona ‘ou fa‘aopoopo fa‘afitu ai lea o mala ‘iā te ‘outou e tusa ma a ‘outou agasala.
22. ‘Ou te ‘a‘auina atu fo‘i o manu fe‘ai ‘iā te ‘outou, e āufānaua ai ‘outou, ma fa‘aumatia a ‘outou manu, ma fa‘ato‘aitiiti ‘iā te ‘outou; e gaogao fo‘i o ‘outou ala.
23. ‘Āfai fo‘i e lē mafai ‘ona a‘oa‘iina ‘outou e a‘u i mea ia, ‘ae tete‘e mai ‘outou ‘iā te a‘u;
24. ‘ona ‘ou tete‘e atu ai lea ‘iā te ‘outou, ma ‘ou a‘oa‘i fa‘afituina atu ‘iā te ‘outou ‘ona o a ‘outou agasala.
25. ‘Ou te fa‘ao‘o fo‘i le pelu ‘iā te ‘outou, e taui atu ai lo ‘outou tu‘umavaega i le feagaiga; a fa‘apotopotoina ‘outou ‘iā ‘outou ‘a‘ai, ‘ou te au atu ai le fa‘ama‘i ‘iā te ‘outou, e tu‘uina atu fo‘i ‘outou i lima o ē fai ‘outou mo latou fili.
26. A uma ‘ona ‘ou gauia le to‘oto‘o o a ‘outou mea e ‘ai, ‘ona tao ai lea e fafine e to‘asefulu a ‘outou mea e ‘ai i le ‘ogāumu e tasi, latou te toe avatu fo‘i a ‘outou mea e ‘ai ‘ua uma ‘ona fuatia, tou te ‘a‘ai fo‘i, ‘ae lē mā‘o‘ona ai.
27. ‘Ae ‘āfai tou te lē fa‘alogo mai lava ‘iā te a‘u ‘ona o ia mea, ‘ae tete‘e mai pea ‘iā te a‘u;
28. ‘ona ‘ou tete‘e atu ai lea ‘iā te ‘outou ma le ita; o a‘u lava ‘ou te a‘oa‘i fa‘afitu ‘iā te ‘outou ‘ona o a ‘outou agasala.
29. Tou te ‘a‘ai fo‘i i tino o ‘outou atali‘i, ma tino o ‘outou afafine tou te ‘a‘ai ai.
30. ‘Ou te fa‘aumatia a ‘outou mea maualuluga, ma vavae i lalo a ‘outou tupua o le la, ma a‘u lafo o ‘outou tino ‘ua oti i luga o tino o a ‘outou tupua, e ‘inosia fo‘i ‘outou e a‘u.
31. ‘Ou te fa‘atafunaina fo‘i a ‘outou ‘a‘ai, ma fa‘atafunaina o ‘outou malumalu, e lē o‘o mai fo‘i ‘iā te a‘u le manogi o a ‘outou mea manogi lelei.
32. ‘Ou te fa‘atafunaina le nu‘u; e taufaiofo o ē nonofo ai, e fai ‘outou mo latou fili.
33. ‘Ou te fa‘ata‘ape‘ape fo‘i ‘iā te ‘outou i nu‘u ‘ese, ‘ou te tō a‘e le pelu e mulimuli atu ‘iā te ‘outou; e fa‘agaogao lo ‘outou fanua, e fa‘atafunaina fo‘i a ‘outou ‘a‘ai.
34. ‘Ona fa‘a‘ato‘atoaina lea o sapati o le lau‘ele‘ele i aso uma e gaogao ai, a o i ai ‘outou i le nu‘u o ē fai ‘outou mo latou fili; o ona po ia e mapu ai le lau‘ele‘ele, ma fa‘a‘ato‘atoa ai ona sapati.
35. O aso uma e gaogao ai e mapu ai ia; auā na lē mapu o ‘outou sapati ‘ina ‘ua ‘outou nonofo ai.
36. O ē ‘ua totoe fo‘i ‘ou te fa‘ao‘o ai le vaivai i o latou loto i nu‘u o ē fai i latou mo latou fili; e tulia i latou i le gasē o le lau mea e lelea; latou te sōsōla ai e pei ‘ona sōsōla tagata a‘i le pelu; latou te pa‘u‘ū fo‘i a o le‘i tuliloaina e se tasi.
37. E pa‘u‘ū fo‘i i latou le tasi i luga o le tasi, e peiseaī o i luma o le pelu a o le‘i tuliloaina e se tasi; e leai fo‘i so ‘outou malosi e tete‘e atu ai i ē o fai ‘outou mo latou fili.
38. E fano fo‘i ‘outou i nu‘u ‘ese, e ‘aina fo‘i ‘outou e le lau‘ele‘ele o ē fai ‘outou mo latou fili.
39. O ē totoe ‘iā te ‘outou e fa‘aumatia ai i latou ‘ona o a latou amio leaga i nu‘u o ē fai ‘outou mo latou fili; ‘ona o le amio leaga fo‘i a o latou tamā e fa‘aumatia ai i latou.
40. ‘Āfai latou te fa‘aali ai ‘iā latou amio leaga, ma amio leaga a o latou tamā ‘atoa ma lo latou solitulafono ‘ua latou soli ai la‘u tulafono, ma latou tete‘e mai ‘iā te a‘u;
41. ma ‘ou tete‘e atu ‘iā i latou, ‘ua ‘avea fo‘i i latou e a‘u i le nu‘u o ē fai i latou mo latou fili, pe ‘āfai e i‘u ‘ina fa‘amaulalo ai o latou loto e le peritomeina, ma ‘ua latou fa‘a‘ato‘atoaina le totogi o a latou amio leaga;
42. ‘ona ‘ou manatua ai lea o la‘u feagaiga ma Iakopo, ma la‘u feagaiga ma Isaako, ‘atoa fo‘i ma la‘u feagaiga ma Aperaamo ‘ou te manatua ai, ‘ou te manatua ai fo‘i le nu‘u.
43. E tu‘ua le lau‘ele‘ele e i latou, e fa‘a‘ato‘atoa ai fo‘i ona sapati, ‘ina o tu‘ufua e lē o i ai i latou; ma ‘ua latou fa‘a‘ato‘atoaina le totogi o a latou amio leaga; ‘ona o lenei lava mea ‘ina ‘ua latou lafoa‘i a‘u fa‘amasinoga, auā fo‘i na latou ‘ino‘ino i a‘u tulafono.
44. ‘Ae ui lava i nei mea, a o i ai i latou i le nu‘u o ē fai i latou mo latou fili, ‘ou te lē lafoa‘i ‘iā i latou, ‘ou te lē ‘ino‘ino fo‘i ‘iā i latou, ‘ia matuā fa‘aumatia, ma tatalaina ai la‘u feagaiga ma i latou; auā o a‘u o le ALI‘I lo latou Atua.
45. ‘Ae peita‘i ‘ona o i latou ‘ou te manatua ai le feagaiga ma o latou tamā, na ‘ou ‘aumaia nai le nu‘u o Aikupito i luma o nu‘u ‘ese ‘ina ‘ia fai a‘u mo latou Atua: O a‘u o le ALI‘I.
46. O sauniga ma fa‘amasinoga ma tulafono ia, na tu‘uina ai e le ALI‘I i lo latou vā ma le fānauga a Isaraelu i le mauga o Sinai i le lima o Mose.#