Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24
  25. 25
  26. 26
  27. 27

Feagaiga Tuai

Feagaiga Fou

Levitiko 6 O LE TUSI PA'IA - Ekalesia Katoliko Roma (RSCB)

O Tulafono i Taulaga ‘Ese‘ese

1. ‘Ua fetalai mai fo‘i le ALI‘I ‘iā Mose, ‘ua fa‘apea mai,

2. ‘Āfai e agasala se tasi ma soli tulafono a le ALI‘I ma pelopelo atu i lē la te tuā‘oi i se mea sa tu‘uina atu ‘iā te ia e tausi, po o se feagaiga, po o se mea ‘ua faoa, po ‘ua na fa‘asauā i lē la te tuā‘oi,

3. po ‘ua maua se mea sa lē iloa, ma fa‘afiti ai, ‘ua tautō pepelo ai; a faia e se tagata se isi mea o ia mea uma, ‘ua agasala ai.

4. ‘Ua agasala ia ma ‘ua nofo sala ai, o le mea lea na te toe avatu ai le mea na ia faoa, po o le mea na ia maua i le fa‘asauā, po o le mea sa tu‘uina atu ‘iā te ia e tausi, po o le mea sa lē iloa na ia maua,

5. po o mea uma na ia tautō pepelo ai, na te toe avane le mea ‘ato‘atoa ma fa‘aopoopo i ai e tusa ma lona vaega e lima, ma avatu ‘iā te ia e ana le mea, i lea lava aso e nofo sala ai o ia.

6. Na te ‘aumai i le ALI‘I lana taulaga mo le sesē, o se mamoe po‘a mai le lafu mamoe e sao ‘ona lelei, e tusa ma lou lava fa‘atatau, e fai ma taulaga mo le sesē i le ositaulaga.

7. E faia fo‘i e le ositaulaga se togiola mo ia i luma o le ALI‘I, ‘ona fa‘amāgaloina ai lea o ia i se mea o ia mea uma ‘ua ia faia, sa nofo sala ai o ia.

O le Taulaga Mū

8. ‘Ua fetalai mai fo‘i le ALI‘I ‘iā Mose, ‘ua fa‘apea mai:

9. ‘Inā fai atu ia ‘iā Arona ma ona atali‘i, ‘ia fa‘apea atu, o le tulafono lenei o le taulaga mū; o le taulaga mū lea e mū i le ta‘igaafi i luga o le fatafaitaulaga ‘ia aoina lava, e mū ai fo‘i le afi i le fatafaitaulaga.

10. E ‘ofu fo‘i le ositaulaga i lona ‘ofu ‘ie vavae, e ‘ofu fo‘i lona tino i lona ‘ofuvae ‘ie vavae, na te ‘ava‘e le lefulefu o le afi fa‘atasi ma le lefulefu o le taulaga mū i le fatafaitaulaga, na te tu‘uina atu fo‘i i tafatafa o le fatafaitaulaga.

11. ‘Ona tu‘u‘eseina ai lea ona ‘ofu ma ‘ofu o ia i nisi ‘ofu ma ‘ave i fafo le lefulefu i tua o le toagalauapi i se mea mamā.

12. O le afi fo‘i i luga o le fatafaitaulaga e mū pea lava i ai; ‘aua ne‘i mate lava ia; e fa‘amū ai fo‘i e le ositaulaga o fafie i lea taeao ma lea taeao, na te teu ai le taulaga mū, na te susunuina ai fo‘i ga‘o o le taulaga fa‘afetai.

13. ‘Ia mū pea lava le afi i luga o le fatafaitaulaga; ‘aua ne‘i mate lava ia.

O le Taulaga i Mea e ‘Ai

14. O le tulafono fo‘i lenei o le taulaga i mea e ‘ai; e avatu lava e atali‘i o Arona i luma o le ALI‘I i luma o le fatafaitaulaga.

15. Na te avane ai fo‘i lana lu‘utaga o le falaoa lelei o le taulaga i mea e ‘ai, ma nisi ona suāu‘u, ma le pulu lipano uma ‘ua i luga o le taulaga i mea e ‘ai, na te susunuina ai fo‘i i le fatafaitaulaga, o le mea manogi lelei lea, o lona fa‘amanatuga i le ALI‘I.

16. O mea fo‘i o totoe e ‘a‘ai ai Arona ma ona atali‘i; e ‘aina lava ia ma areto e lē fa‘afefeteina i le mea pa‘ia; o le lotoā o le fale fetāfa‘i o le fa‘apotopotoga latou te ‘a‘ai ai.

17. ‘Aua ne‘i tunu ai ma ni mea e fa‘afefete a‘i. ‘Ua ‘ou avatu ai e fai ma latou i taulaga ‘iā te a‘u e fai i le afi; ‘ua matuā pa‘ia lava ia, e pei o le taulaga mo le agasala, e pei o le taulaga fo‘i mo le sesē.

18. O tane uma o le fānau a Arona latou te ‘a‘ai ai. O le tulafono lea e fa‘avavau i o ‘outou tupulaga amulī i taulaga i le ALI‘I e fai i le afi; e pa‘ia ta‘ito‘atasi uma o ē papa‘i atu i ai.

19. ‘Ua fetalai mai fo‘i le ALI‘I ‘iā Mose, ‘ua fa‘apea mai:

20. O le taulaga lenei a Arona ma ona atali‘i latou te avatua i le ALI‘I i le aso e fa‘au‘uina ai o ia; o lona vaega e sefulu o le efa o le falaoa lelei, e fai ma taulaga i mea e ‘ai i aso faiso‘o, o lona vaelua, i le taeao, ma lona vaeluaga i le afiafi.

21. ‘E te faia ‘ia palua ma le u‘u i luga o le u‘amea salafa; ‘e te ‘aumai ai; o fasi mea tunu o le taulaga i mea e ‘ai ‘e te avatu ai, o le mea manogi lelei lea i le ALI‘I.

22. O sona atali‘i ‘ua fa‘au‘uina e fai ma ositaulaga e sui a‘i o ia na te faia; o le tulafono lea e fa‘avavau i le ALI‘I; ‘e te susunuumaina.

23. Auā o taulaga uma i mea e ‘ai a le ositaulaga, e susunuumaina ai; ‘aua ne‘i ‘aina.

O Taulaga Agasala

24. ‘Ua fetalai mai fo‘i le ALI‘I ‘iā Mose, ‘ua fa‘apea mai,

25. ‘Inā fai atu ia ‘iā Arona ma ona atali‘i, ‘ia fa‘apea atu, O le tulafono lenei o le taulaga mo le agasala; o le mea ‘ua fasi ai le taulaga mū e fasi ai fo‘i le taulaga mo le agasala i luma o le ALI‘I, e sili ‘ona pa‘ia lea.

26. O le ositaulaga na te faia le taulaga mo le agasala, o ia lava na te ‘ai ai; e ‘ai ai i le mea pa‘ia i le lotoā o le fale fetāfa‘i o le fa‘apotopotoga.

27. ‘Ai se mea fo‘i ‘ua papa‘i ane i ona tufa‘aga e pa‘ia lava lea; a sausauina atu ai fo‘i nisi ona toto i se ‘ofu, ‘e te taia le mea sa sausauina ai i le mea pa‘ia.

28. A o le ipu ‘omea sa tunu ai, ‘ia ta‘ei lea; ‘āfai fo‘i ‘ua tunu i se ipu ‘apamemea, ‘ia oloina lea, ma fufuluina i le vai.

29. O tane uma o le ‘au ositaulaga latou te ‘a‘ai ai; e sili ‘ona pa‘ia lea.

30. E lē ‘aina lava se taulaga mo le agasala ‘ua ‘aumai nisi ona toto i le fale fetāfa‘i e le fa‘apotopotoga e fai ma togiola i le mea pa‘ia; ‘ae susunuina ia i le afi.#