1. ‘Ua fetalai mai fo‘i le ALI‘I ‘iā Mose, ‘ua fa‘apea mai:
2. Fai atu ia ‘iā Arona ma ona atali‘i: ‘Ia latou fa‘amamao i mea pa‘ia a le fānauga a Isaraelu, ‘ina ne‘i fa‘aleagaina lo‘u igoa pa‘ia e i latou i mea ‘ua latou fa‘asāina mo a‘u; O a‘u o le ALI‘I.
3. Fai atu ia ‘iā i latou, ‘Ai se tagata o lo ‘outou ‘āiga uma i o ‘outou tupulaga amulī, e alu ane o ia i mea pa‘ia ‘ua fa‘asāina e le fānauga a Isaraelu i le ALI‘I, a o lo‘o ‘iā te ia se mea e leaga ai o ia, e vavae‘eseina lava lea tagata i o‘u luma: O a‘u o le ALI‘I.
4. ‘Ai se tagata o le fānau a Arona ‘ua lepela, po o ‘ua ‘iā te ia se gau, e lē ‘ai lava o ia i mea pa‘ia, ‘ina se‘ia mamā o ia; ‘ai sē pa‘i atu fo‘i i se mea ‘ua leaga ‘ona o le tagata ‘ua oti, po o se tagata ‘ua alu le sua o lona tino;
5. ‘ai se tagata fo‘i na te pa‘i atu i se mea totolo e leaga ai o ia, po o se tagata e leaga ai o ia i se mea leaga o ‘iā te ia;
6. o le tagata lava na te pa‘i atu i ai, e leaga o ia se‘ia o‘o i le afiafi, e lē ‘ai fo‘i o ia i mea pa‘ia se‘ia tā‘elea lava lona tino i le vai.
7. A goto le lā, ‘ona mamā ai lea o ia; e mulimuli ane ‘ona ‘ai lava lea o ia i mea pa‘ia, auā o ana lava mea e ‘ai ia.
8. ‘Ai se mea ‘ua mate fua, po o ‘ua saeia, ‘aua le ‘aina lava e ia ne‘i leaga ai o ia ‘iā te ia i lea mea: O a‘u o le ALI‘I.
9. ‘Ia latou tausiusi i a‘u sauniga, ‘ina ne‘i nofo sala ai i latou, ma oti ai, pe ‘āfai latou te soli ai: O a‘u o le ALI‘I o lē fa‘apa‘iaina i latou.
10. E lē ‘ai lava se tasi tagata ‘ese i le mea pa‘ia; o le tagata ‘ese ‘ua ia mafuta ma le ositaulaga, po o sē ‘ua galue i le totogi, e lē ‘ai lava o ia i le mea pa‘ia.
11. ‘Ae ‘āfai o fa‘atauina e le ositaulaga se tagata i ana tupe, e ‘ai ai lava o ia, ‘atoa ma lē ‘ua fānau mai i lona ‘āiga; latou te ‘a‘ai i ana lava mea e ‘ai.
12. ‘Āfai fo‘i ‘ua nofo tane le afafine o le ositaulaga i le tagata ‘ese, ‘aua ne‘i ‘ai o ia i se taulaga i mea pa‘ia.
13. ‘Ae ‘āfai ‘ua oti le tane a le afafine o le ositaulaga, po ‘ua fa‘ate‘a e lana tane o ia, ‘ua leai fo‘i sana tama, a ‘ua fo‘i mai o ia i le ‘āiga o lona tamā, e pei ‘ona i ai ‘ina o teine o ia, e ‘ai lava o ia i le mea e ‘ai a lona tamā; ‘ae leai se tagata ‘ese na te ‘ai ai.
14. ‘Āfai fo‘i e ‘aina e se tagata le mea pa‘ia, ma le lē iloa, ‘ona fa‘aopoopo atu ai lea e ia lona vaega e lima o mea, ma avatu ai i le ositaulaga, ‘atoa ma le mea pa‘ia.
15. ‘Aua fo‘i ne‘i leaga ‘iā te i latou o mea pa‘ia a le fānauga a Isaraelu, ‘ua latou fai taulaga ai i le ALI‘I;
16. ma latou fa‘anofo sala ‘iā i latou ‘ona o le sesē, ‘ina ‘ua latou ‘a‘ai ‘iā latou mea pa‘ia: auā o a‘u o le ALI‘I o lē fa‘apa‘iaina i latou.
17. ‘Ua fetalai mai fo‘i le ALI‘I ‘iā Mose, ‘ua fa‘apea mai:
18. ‘Inā fai atu ‘iā Arona, ma ona atali‘i, ‘atoa ma le fānauga uma a Isaraelu, ‘ia fa‘apea atu ‘iā i latou: ‘Ai se tagata o le ‘āiga o Isaraelu, po o se tagata ‘ese e i Isaraelu ‘ua fia avatu sana taulaga i mea uma na ia tautō ai, ma mea uma e fai fua i le loto i mea latou te faitaulaga ai i le ALI‘I e fai ma taulaga mū;
19. tou te faia ma le loto i ai o se manu po‘a e sao ‘ona lelei, o se povi, po o se mamoe, po o se ‘oti.
20. ‘Ai se manu ‘ua i ai se mea leaga, ‘aua tou te avatu ai; auā e lē talia lea mo ‘outou.
21. ‘Ai sē avatu se taulaga fa‘afetai i le ALI‘I, e fa‘ataunu‘u ai le mea na ia tautō ai, po o le taulaga na te faia fua, i lona loto, po o se povi, po o se mamoe, ‘ia sao ‘ona lelei, ‘ina ‘ia talia; ‘aua ne‘i i ai se mea e tasi e ponā ai.
22. O se mea ‘ua tauaso, po ‘ua gau se vae, po ‘ua mutu, po ‘ua i ai se papala, po o se ma‘i pa‘upa‘ua, po o se ma‘i mageso ‘ua po‘upo‘ua, ‘aua tou te avatu mea ia i le ALI‘I, ‘aua fo‘i tou te fai a‘i taulaga e fai i le afi i luga o le fatafaitaulaga i le ALI‘I.
23. O se povi, po o se tama‘i mamoe ‘ua i ai se mea fa‘alēgatusa, po ‘ua avilu, faitalia lava oe ‘ona fai taulaga ai e fai ma taulaga ‘ua e loto lava ‘ona fai, ‘ae lē talia lava lea i le mea na e tautō ai.
24. ‘Aua tou te avatu i le ALI‘I se manu ‘ua tu‘itu‘ia, po ‘ua momomo, po ‘ua ‘omia, po ‘ua seleseleina ona fua manava; tou te lē faia fo‘i lea i lo ‘outou nu‘u.
25. ‘Aua fo‘i ne‘i avatua mai le lima o le tagata ‘ese le mea e ‘ai a lo ‘outou Atua i se tasi o ia mea; auā o i ai lo latou leaga, e i ai mea e ponā ai i latou; e lē talia ia mo ‘outou.
26. ‘Ua fetalai mai fo‘i le ALI‘I ‘iā Mose, ‘ua fa‘apea mai:
27. A fānaua mai se povi po‘a, po o se mamoe, po o se ‘oti, ‘ona i ai lea o ia i lona tinā i aso e fitu; ‘ae amata i le aso valu ma aso ‘ua lumana‘i ‘ona talia ma taulaga e fai i le afi i le ALI‘I.
28. ‘Aua tou te fasia se povi, po o se mamoe ‘atoa ma lana tama i le aso e tasi.
29. ‘Āfai fo‘i tou te loto e fai se taulaga fa‘ane‘ene‘e i le ALI‘I, ‘inā fai taulaga lava ia ma le loto.
30. E ‘aina lava ia i lea lava aso; ‘aua ne‘i totoe sina mea ‘iā te ‘outou se‘ia taeao. O a‘u o le ALI‘I.
31. ‘Ia ‘outou tausiusi i a‘u poloa‘iga, ma ‘ia ‘outou faia; o a‘u o le ALI‘I.
32. ‘Aua fo‘i tou te fa‘aleagaina lo‘u igoa pa‘ia; ‘ia fa‘apa‘iaina lava a‘u i le fānauga a Isaraelu; o a‘u o le ALI‘I o lē fa‘apa‘iaina ‘outou;
33. o lē ‘aumai ‘iā te ‘outou nai le nu‘u o Aikupito, e fai mo ‘outou Atua; o a‘u o le ALI‘I.