1. ‘Ua fetalai mai fo‘i le ALI‘I ‘iā Mose, ‘ua fa‘apea mai:
2. Fai atu ia i le fa‘apotopotoga uma o le fānauga a Isaraelu, ‘ia fa‘apea atu ‘iā i latou: ‘Ia pa‘ia ‘outou; auā o a‘u o le ALI‘I lo ‘outou Atua e pa‘ia lava a‘u.
3. ‘Ia ta‘ito‘atasi ‘outou ma āva i lona tinā ma lona tamā, ma ‘ia ‘outou tausiusi i o‘u sapati: O a‘u o le ALI‘I lo ‘outou Atua.
4. ‘Aua tou te liliu atu i tupua, ‘aua fo‘i ne‘i faia atua u‘amea mo ‘outou: O a‘u o le ALI‘I lo ‘outou Atua.
5. ‘Āfai fo‘i tou te faia se taulaga fa‘afetai i le ALI‘I, ‘ia ‘outou fai taulaga ‘ina ‘ia alofagia ‘outou.
6. E ‘aina lava ia i lea lava aso na ‘outou fai taulaga ai, ‘atoa ma a taeao; ‘ae ‘āfai ‘ua toe sina mea i le aso tolu, ‘ia susunuina lea i le afi.
7. ‘Āfai fo‘i e ‘aina sina mea i le aso tolu, o le mea e ‘inosia lea; e lē talia lava.
8. O lē na te ‘aina e nofo sala o ia, auā ‘ua leaga ‘iā te ia le mea pa‘ia a le ALI‘I e vavae‘eseina lava lea tagata i lona nu‘u.
9. A ‘outou selesele fo‘i i le seleselegāsaito i o ‘outou fanua, ‘aua ‘e te selesele uma ou pito fanua, ‘aua fo‘i ‘e te ao ni saito ‘ua pa‘u‘ū i lau seleselega.
10. ‘Aua ‘e te fo‘i fa‘alua e tau vine o i lou tōvine, ‘aua fo‘i ‘e te fa‘aputu le fua ‘ua totoe i lou tōvine; a ‘ia tu‘u ai mo ē matitiva ma tagata ‘ese: O a‘u o le ALI‘I lo ‘outou Atua.
11. ‘Aua tou te gaoi, ‘aua fo‘i tou te fa‘a‘ole‘ole, ‘aua fo‘i tou te pelopelo le tasi i le tasi.
12. ‘Aua tou te tautō i lo‘u igoa ma le pepelo; ‘aua fo‘i ‘e te fa‘aleaga le igoa o lou Atua: O a‘u o le ALI‘I.
13. ‘Aua ‘e te fa‘asauā i lē lua te tuā‘oi, pe faoa ana mea; ‘aua ne‘i tu‘u pea ‘iā te oe se‘ia taeao o le taui o lē ‘ua faia lau galuega.
14. ‘Aua ‘e te fāifai i lē tutuli, ‘aua fo‘i ‘e te tu‘u se mea e tausuai ai i luma o le tauaso, a ‘ia e mata‘u i lou Atua: O a‘u o le ALI‘I.
15. ‘Aua tou te faia se mea lē tonu i le fa‘amasinoga; ‘aua ‘e te fa‘ailogaina le tagata mativa, ‘aua fo‘i fa‘aaloalo i le tagata mau‘oa; a ‘ia e fa‘amasino ma le tonu lē lua te tuā‘oi.
16. ‘Aua ‘e te fealua‘i i lou nu‘u ma fe‘ave‘avea‘i; ‘aua fo‘i ‘e te molimau pepelo i lē lua te tuā‘oi e oti ai o ia: O a‘u o le ALI‘I.
17. ‘Aua ‘e te ‘ino‘ino i lou uso i lou loto; ‘ia e a‘oa‘i lava i lē lua te tuā‘oi, ‘aua fo‘i ne‘i tu‘u ai pea le agasala ‘iā te ia.
18. ‘Aua ‘e te taui ma sui, ‘aua fo‘i le fa‘amoemoe lou ita i tagata o lou nu‘u, a ‘e te alofa atu i lē lua te tuā‘oi ia pei o oe lava ‘iā te oe: O a‘u o le ALI‘I.
19. ‘Ia ‘outou tausiusi i a‘u tulafono; ‘aua ne‘i fela‘aa‘i ona ofia o au manu uiga ‘ese‘ese; ‘aua fo‘i ‘e te totō fua uiga ‘ese‘ese i lou fanua; ‘aua fo‘i ‘e te ‘ofu i se ‘ofu i le ‘ie lalaga fefiloi i mea uiga ‘ese‘ese.
20. ‘Ai se la te momoe ma le fafine ‘ua nofo pologa, ‘ua faufautane ‘ua lē fa‘atauina lava, pe fa‘asa‘olotoina; ‘ona sasaina lea, ‘ae lē fasiotia i lā‘ua, auā na lē sa‘oloto o ia.
21. E ‘aumaia fo‘i e le tane lana taulaga mo le sesē i le ALI‘I i le faitoto‘a o le fale fetāfa‘i o le fa‘apotopotoga, o le mamoe po‘a e fai ma taulaga mo le sesē.
22. ‘Ona fai ai lea e le ositaulaga se togiola mo ia i le mamoe po‘a o le taulaga mo le sesē i luma o le ALI‘I ‘ona o lana agasala ‘ua ia agasala ai; ‘ona fa‘amāgaloina ai lea o ia ai le agasala ‘ua ia agasala ai.
23. A ‘outou o‘o i le nu‘u, a uma fo‘i ‘ona ‘outou totōina o la‘au ‘ese‘ese e fai ma mea e ai, ona ta‘uleperitomeina ai lea e ‘outou o latou fua; o tausaga e tolu e fai ma mea e le‘i peritomeina ‘iā te ‘outou; e lē ‘aina lava.
24. A o lona fa o tausaga e pa‘ia uma o latou fua e fa‘afetai ai i le ALI‘I.
25. O lona lima o tausaga tou te ‘a‘ai ai i o latou fua, ‘ina ‘ia fua mai ai ‘iā te ‘outou i o latou fua: O a‘u o le ALI‘I lo ‘outou Atua.
26. ‘Aua tou te ‘a‘ai ma le toto; ‘aua fo‘i le fai togafiti fa‘ataulāitu, ‘aua fo‘i tou te ‘i‘ite i ao o le lagi.
27. ‘Aua tou te sele fa‘ata‘ali‘oli‘o i o ‘outou lauulu, ‘aua fo‘i ‘e te fa‘asaunoa i ou pito ‘ava.
28. ‘Aua tou te saei o ‘outou tino ‘ona o lē ‘ua oti, ‘aua fo‘i ne‘i ta tatau ‘iā te ‘outou: O a‘u o le ALI‘I.
29. ‘Aua ‘e te fa‘aleaga i lou afafine e fai ma fafine talitane; ‘ina ne‘i masani le nu‘u ma le faita‘aga, ‘ona tumu ai lea o le nu‘u i le amio leaga.
30. ‘Ia ‘outou tausiusi i o‘u sapati, ma ia matata‘u i lo‘u malumalu: O a‘u o le ALI‘I.
31. ‘Aua tou te fa‘asaga atu ‘iā i latou o i ai aitu vavalo, ‘aua fo‘i ‘e te sā‘ili i taulāitu e leaga ai ‘outou: O a‘u o le ALI‘I lo ‘outou Atua.
32. ‘Ia e tula‘i atu i luma o lē ‘ua ulu sinā, ‘ia e āva fo‘i i luma o le toeaina, ma ‘ia e mata‘u i lou Atua: O a‘u o le ALI‘I.
33. A āumau ‘iā te oe se tagata ‘ese i lo ‘outou nu‘u, ‘aua tou te fa‘atigā ‘iā te ia.
34. O le tagata ‘ese o lo‘o āumau ‘iā te ‘outou, ‘ia tusa lava ia ‘iā te ‘outou ma le tama a le ‘ele‘ele, ‘e te alofa atu ‘iā te ia e pei o oe lava ‘iā te oe; auā sa āumau ‘outou i le nu‘u o Aikupito: O a‘u o le ALI‘I lo ‘outou Atua.
35. ‘Aua tou te faia se mea le tonu i le fa‘amasinoga, i le fua fa‘aloloa, po o le fua fa‘atautau, po o le fua fa‘a‘ofu‘ofu.
36. ‘Ia ‘iā te ‘outou le fua fa‘atautau ‘ua tatau, o ma‘a e tatau, o le efa e tatau, ma le sinu e tatau: O a‘u o le ALI‘I lo ‘outou Atua, na ‘ou ‘aumai ‘iā te ‘outou nai le nu‘u o Aikupito.
37. O lenei ‘ia ‘outou tausiusi i a‘u tulafono uma, ma a‘u fa‘amasinoga uma, ma ‘ia ‘outou faia: O a‘u o le ALI‘I.