Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24
  25. 25
  26. 26
  27. 27

Feagaiga Tuai

Feagaiga Fou

Levitiko 7 O LE TUSI PA'IA - Ekalesia Katoliko Roma (RSCB)

O le Tulafono i Taulaga mo le Sesē

1. O le tulafono fo‘i lenei i taulaga mo le sesē; e sili ‘ona pa‘ia ia.

2. O le mea ‘ua latou fasi ai le taulaga mū, latou te fasi ai fo‘i le taulaga mo le sesē, o lona toto fo‘i na te sausauina i luga o le fatafaitaulaga e so‘o ai.

3. Na te avatua ona ga‘o lima, o le i‘u, ma le ga‘o alo,

4. o fatuga‘o fo‘i e lua ma ga‘o o i ai o lo‘o i luga o lāgotua, o le ga‘o punipū ‘ua i luga o le finagalo, ‘atoa ma fatuga‘o, na te ‘ave‘eseina ia.

5. E susunuina ia mea e le ositaulaga i le fatafaitaulaga e fai ma taulaga e fai i le afi i le ALI‘I; o le taulaga mo le sesē lea.

6. O tane uma o i le ‘au ositaulaga latou te ‘a‘ai ai; e ‘aina lava i le mea pa‘ia; e sili ‘ona pa‘ia lea.

7. E tusa le taulaga mo le agasala ma le taulaga mo le sesē; e tasi lava le tulafono i nei mea e lua; o le ositaulaga na te faia le togiola e fai ai māna.

8. O le ositaulaga fo‘i na te avatua le taulaga mū a se tasi, o le ositaulaga lava lea na te fai māna le pa‘u o le taulaga mū ‘ua ia avatua.

9. O taulaga uma fo‘i i mea e ‘ai na tao i le umu, ma mea uma fo‘i ‘ua faia i le ‘ulo ma le u‘amea salafa, o le ositaulaga ‘ua ia avatua e faia lava ia māna.

10. A o taulaga uma i mea e ‘ai ‘ua palua ma le u‘u, ‘atoa ma ē mamago, e fai ia ma atali‘i uma o Arona, e fai ma lea ma lea.

O Taulaga Fa‘afetai

11. O le tulafono lenei i taulaga fa‘afetai na te avatua i le ALI‘I.

12. ‘Āfai na te avatua ma taulaga fa‘ane‘ene‘e, ‘ona avatu ai lea fa‘atasi ma le taulaga fa‘ane‘ene‘e ni pōtoi areto e lē fa‘afefeteina ‘ua palua ma le u‘u, ma ni fa‘apāpā e lē fa‘afefeteina, ‘ua nini i le u‘u, ma ni pōtoi falaoa lelei ‘ua palua ma le u‘u.

13. Na te avatua o fa‘apāpā areto ‘ua fa‘afefeteina fa‘atasi ma lana taulaga; ‘atoa ma le taulaga fa‘ane‘ene‘e o lana taulaga fa‘afetai.

14. Na te avatua se tasi mai taulaga uma e fai ma taulaga si‘i i le ALI‘I, o le ositaulaga fo‘i o lē na te sausau le toto o le taulaga fa‘afetai e fai māna.

15. O le tino fo‘i o le taulaga fa‘ane‘ene‘e o lana taulaga fa‘afetai lea e ‘aina i lea lava aso na te avatu ai lana taulaga; ‘aua na te fa‘atotoeina se mea i le taeao.

16. ‘Ae ‘āfai o se tautoga, po o se mea ‘ua fai fua i le loto, o lea taulaga na te faia, e ‘aina i lea lava aso na te avatu ai lana taulaga; o mea o totoe i ai e ‘aina a taeao.

17. A o mea o totoe o tufa‘aga o lana taulaga, o le aso tolu e susunuina ai i le afi.

18. ‘Āfai fo‘i e ‘aina i le aso tolu sina mea o le tino o le taulaga o lana taulaga fa‘afetai, e lē talia ia, e lē ta‘ua fo‘i ‘iā te ia o le na avatua; e ‘avea ma mea e ‘inosia, e nofo sala fo‘i lē na te ‘aina.

19. O le tufa‘aga fo‘i e papa‘i i se mea leaga e lē ‘aina lea; e susunuina i le afi; a o le tino o le taulaga e ‘aina lea o i latou uma e mamā.

20. A o le tagata na te ‘aina se tufa‘aga o le taulaga fa‘afetai o le mea a le ALI‘I, a o lo‘o ‘iā te ia se mea e leaga ai o ia, e vavae‘eseina lea tagata ai lona nu‘u.

21. O se tagata na te papa‘i ane i se mea leaga, o se mea a se tagata e leaga ai, po o se manu leaga, po o se isi mea leaga e leaga ai, ma ‘ai o ia i se tufa‘aga o le taulaga fa‘afetai o le mea a le ALI‘I, e vavae‘eseina lea tagata i lona nu‘u.

22. ‘Ua fetalai mai fo‘i le ALI‘I ‘iā Mose, ‘ua fa‘apea mai:

23. ‘Inā fai atu ia i le fānauga a Isaraelu, ‘ia fa‘apea atu, ‘Aua ne‘i ‘outou ‘a‘ai sina ga‘o o le povi, po o le mamoe, po o le ‘oti.

24. O ga‘o o se manu e mate fua, ma ga‘o o le mea ‘ua saeia, e fai a‘i se isi mea; ‘ae tou te lē ‘a‘ai ai lava.

25. Auā ai se ‘ai i se ga‘o o se manu e avatua ai taulaga e fai i le afi i le ALI‘I, o sē ‘ai ai e vavae; ‘eseina lea tagata i lona nu‘u.

26. O mea uma tou te nonofo ai ‘aua tou te ‘a‘ai i toto o manu felelei, po o manu vaefā.

27. ‘Ai se tagata na te ‘aina ni toto e vavae‘eseina lea tagata i lona nu‘u.

28. ‘Ua fetalai mai fo‘i le ALI‘I ‘iā Mose, ‘ua fa‘apea mai:

29. ‘Inā fai atu ia i le fānauga a Isaraelu, ‘ia fa‘apea atu, ‘Ai sē na te avatua lana taulaga fa‘afetai i le ALI‘I, ‘ia ‘aumai lana taulaga i le ALI‘I a‘i lana taulaga fa‘afetai.

30. E ‘aumai e ona lava lima o taulaga e fai i le afi i le ALI‘I; o ga‘o fa‘atasi ma le fatafata na te ‘aumaia ‘ina ‘ia lūlūina le fatafata, o le taulaga lūlū lea i luma o le ALI‘I.

31. E susunuina fo‘i ga‘o e le ositaulaga i le fatafaitaulaga; a o le fatafata e ia Arona ma ona atali‘i lea.

32. O le ālagalima taumatau tou te avatua i le ositaulaga e fai ma taulaga si‘i o a ‘outou taulaga fa‘afetai.

33. O se atali‘i o Arona na te avatua le toto o le taulaga fa‘afetai ‘atoa ma ga‘o, e ‘iā te ia le ālagalima taumatau, o lona tufa‘aga lea.

34. Auā o le fatafata o lūlūina ma le ālagalima e si‘i, ‘ua ‘ou faia lea mo‘u i le fānauga a Isaraelu mai a latou taulaga fa‘afetai, ma ‘ou tu‘uina atu ‘iā Arona le ositaulaga ma ona atali‘i, e fai ma tulafono e fa‘avavau i le fānauga a Isaraelu.

35. O le tufa‘aga lenei o le fa‘au‘uga o Arona, ma le fa‘au‘uga o ona atali‘i, i taulaga e fai i le afi i le ALI‘I, i le aso na ia fa‘alatalataina mai ai i latou e fai ai le faiva o ositaulaga i le ALI‘I.

36. Na poloa‘i mai ai le ALI‘I ‘ia ‘aveina atu ‘iā i latou e le fānauga a Isaraelu, i le aso na ia fa‘au‘uina ai i latou, o le tulafono e fa‘avavau i o latou tupulaga amulī.

37. O le tulafono lenā i le taulaga mū, o le taulaga i mea e ‘ai, ma le taulaga mo le agasala, ma le taulaga mo le sesē, ma le taulaga o le tofiga ma le taulaga fa‘afetai.

38. Na poloa‘i mai ai le ALI‘I ‘iā Mose i le mauga o Sinai i le aso na ia fetalai mai ai i le fānauga a Isaraelu, e avatu ai a latou taulaga i le ALI‘I i le vao o Sinai.