1. ‘Ua fetalai mai fo‘i le ALI‘I ‘iā Mose, ‘ua fa‘apea mai:
2. ‘Ia e fai atu i le fānauga a Isaraelu:‘Ai se tagata o le fānauga a Isaraelu, po o se tagata ‘ese e āumau ia Isaraelu, na te avatua so ana fānau ‘iā Moloka; e fasiotia lava o ia; e fetogi lava e tagata o le nu‘u ‘iā te ia i ma‘a.
3. ‘Ou te faia fo‘i lea tagata mo‘u fili, ma ‘ou vavae‘eseina o ia i lona nu‘u; auā ‘ua ia avatu lana fānau ‘iā Moloka, e fa‘aleaga ai lo‘u malumalu, ma fa‘aleaga ai lo‘u igoa pa‘ia.
4. ‘Āfai fo‘i e ufiufi lava e tagata o le nu‘u o latou mata i lea tagata i lona avatu o lana fānau ‘iā Moloka, ma latou lē fasioti ‘iā te ia;
5. ‘ona ‘ou faia lea mo‘u fili o lea tagata ‘atoa ma lona ‘āiga, ‘ou te vavae‘eseina i lo latou nu‘u o ia, ‘atoa ma i latou uma o ē mulimuli atu ‘iā te ia e mulilulua ai ma Moloka.
6. O le tagata fo‘i e liliu ane i ē o i ai aitu vavalo, ma ē taulāitu, e mulimuli atu i ai e mulilulua ai, ‘ou te faia mo‘u fili lea tagata, ‘ou te vavae‘eseina fo‘i o ia i lona nu‘u.
7. O lea ia fa‘apa‘iaina ai ‘outou e ‘outou, ma ia pa‘ia lava ‘outou; auā o a‘u o le ALI‘I lo ‘outou Atua.
8. Ma ‘ia ‘outou tausiusi i a‘u tulafono, ma ‘ia ‘outou faia; o a‘u o le ALI‘I o lē fa‘apa‘iaina ‘outou.
9. ‘Ai se tasi na te fetu‘u i lona tamā po o lona tinā e fasiotia lava o ia ‘ua ia fetu‘u i lona tamā po o lona tinā; e ‘iā te ia lava lona toto.
10. O le tagata fo‘i ‘ua la mulilua ma le avā a le tasi tagata, o lē ‘ua mulilua ma le avā a le la te tuā‘oi, o le tane mulilua ma le fafine mulilua, e fasiotia lava i lā‘ua.
11. O le tagata fo‘i la te momoe ma le avā a lona tamā, ‘ua fa‘atelenoa e ia i lona tamā; e fasiotia lava i lā‘ua; e ‘iā te i lā‘ua o la toto.
12. ‘Āfai fo‘i e momoe se tagata ma le avā a lona atali‘i, e fasiotia lava i lā‘ua; ‘ua la faia le mea matuā leaga lava; e ‘iā te i lā‘ua o la toto.
13. ‘Āfai fo‘i e momoe se tane ma le tasi tane, e pei ‘ona momoe o le tane ma le fafine, ‘ua la faia le mea leaga lava; e fasiotia lava i lā‘ua; e ‘iā te i lā‘ua o la toto.
14. ‘Āfai fo‘i e fai avā se tagata i le fafine ‘atoa ma le tinā o le fafine, o le mea leaga lava lea; e susunuina i latou i le afi, o ia ‘atoa ma i lā‘ua; ‘ina ne‘i i ai le amio leaga ‘iā te ‘outou.
15. ‘Āfai fo‘i e momoe se tane ma se manu, e fasiotia lava o ia; tou te fasimate fo‘i i le manu.
16. ‘Āfai fo‘i e fa‘alatalata atu se fafine i se manu la te momoe, ‘e te fasioti i le fafine ‘atoa ma le manu; e fasiotia lava i lā‘ua; e ‘iā te i lā‘ua o la toto.
17. ‘Āfai fo‘i e tago le tagata i lona tuafafine, o le afafine o lona tamā, po o le tama a lona tinā, ma iloa lona telenoa, ‘ua iloa fo‘i e le fafine lona telenoa; o le mea i leaga lava lea; ‘ia vavae‘eseina i lā‘ua i luma o tagata o lo la nu‘u; ‘ua ia fa‘atelenoa i lona tuafafine; e nofo sala lava o ia.
18. ‘Ai se tane ‘ua la momoe ma le fafine o lo‘o o na faia le ma‘i, ‘ua ia fa‘atelenoa fo‘i ‘iā te ia; ‘ua na su‘ena lona puna, o le fafine fo‘i ‘ua fa‘aaliali e ia le puna o lona toto e vavae‘eseina lava i lā‘ua i lo la nu‘u.
19. ‘Aua fo‘i ‘e te fa‘atelenoa i le uso o lou tinā, po o le tuafafine o lou tamā auā o le fa‘atelenoa lea e le tagata i lona lava ‘āiga; e nofo sala lava i lā‘ua.
20. ‘Ai se tagata la te momoe ma le avā a le uso o lona tamā, ‘ua fa‘atelenoa e ia i le uso o lona tamā; e nofo sala i lā‘ua; e leai ni a la fānau, e o‘o lava i le oti.
21. ‘Āfai fo‘i e fai avā se tagata i le avā a lona uso, o le mea leaga lea; ‘ua fa‘atelenoa e ia i lona uso; e leai ni a la fānau.
22. O lenei, ‘ia ‘outou tausiusi i a‘u tulafono uma, ma a‘u fa‘amasinoga uma, ma ‘outou faia, ‘ina ne‘i luai mai ‘iā te ‘outou e le lau‘ele‘ele ‘ou te fa‘ao‘o atu ai ‘outou e nonofo ai.
23. ‘Aua lava tou te usiusita‘i i tu a nu‘u ‘ou te tulia i o ‘outou luma; auā ‘ua latou faia ia mea uma, o le mea lea ‘ua ‘inosia ai lava i latou e a‘u.
24. A ‘ua uma ‘ona ‘ou fai atu ‘iā te ‘outou, E fai mo ‘outou lo latou lau‘ele‘ele, ‘ou te foa‘i atu ai lava ‘iā te ‘outou e fai mo ‘outou tofi, o le nu‘u o lo‘o tafe ai le suāsusu, ma le meli; o a‘u o le ALI‘I lo ‘outou Atua, ‘ua ‘ou vavae‘eseina ‘outou i nu‘u uma.
25. ‘Ia ‘outou fa‘ailogaina fo‘i manu vaefā mamā, ma ē leaga, o manu felelei fo‘i e leaga, ma mamā; ‘aua lava ne‘i leaga ‘outou ‘iā te ‘outou i se manu vaefā, po o se manulele, po o se isi mea lava e totolo i le ‘ele‘ele, ‘ua ‘ou fa‘ailogaina ‘iā te ‘outou e fai ma mea leaga.
26. A ‘ia pa‘ia lava ‘outou mo a‘u; auā o a‘u o le ALI‘I, o lo‘o pa‘ia lava a‘u, ‘ua ‘ou vavae‘eseina fo‘i ‘outou i nu‘u uma, ‘ina ‘ia fai lava ‘outou mo a‘u.
27. O se tane fo‘i po o se fafine o i ai se aitu vavalo, po o ‘ua fai ma taulāitu, ‘ia fasiotia lava ia; latou te fetogi ‘iā i latou i ma‘a; e ‘iā te i latou o latou toto.#