1. ‘Ua fetalai mai le ALI‘I ‘iā Mose, ‘ua fa‘apea mai:
2. O lenei le tulafono i le lepela i le aso o lona fa‘amamāina:E ‘aumaia o ia i le ositaulaga;
3. ‘ona alu atu ai lea o le ositaulaga i tua o le toagalauapi; e matamata atu ai le ositaulaga, fa‘auta fo‘i, ‘ua mālōlō le ila lepela i le tagata lepela;
4. ‘ona fai atu ai lea e le ositaulaga ‘ia ‘aumaia mo le tagata o le a fa‘amamāina nai manu ola e lua ‘ua mamā, ‘atoa ma le la‘au o le arasi, ma le ‘ie mūmū ma le isopo;
5. ‘ona fai atu ai lea o le ositaulaga ‘ia fasi le tasi manu i se ipu ‘omea i luga o le vaipuna;
6. a o le manu ola, na te avatu ai ma le la‘au o le arasi ma le ‘ie mūmū, ma le isopo, ma fufui ai ‘atoa ma le manu ola i le toto o le manu na fasia i luga o le vaipuna;
7. na te sausauina atu ai fa‘afitu e ia o le a fa‘amamāina i le lepela, ‘ona ia ta‘umamāina ai lea o ia, na te tu‘u atu fo‘i le manu ola e alu i le vao.
8. O ia fo‘i o le a fa‘amamāina na te taina ona ‘ofu, ma tafi ona fulufulu uma lava, ma tā‘ele i le vai ‘ina ‘ia mamā ai o ia; e mulimuli ane ‘ona alu ane ai lea o ia i le toagalauapi, ‘ae nofo i fafo o lona fale ‘ie i aso e fitu.
9. A o‘o i le aso fitu, ‘ona tafi ai lea o lona lauulu uma, ma lana ‘ava, ma ona laumata, o ona fulufulu uma lava na te tafiina ai ma ta ona ‘ofu ma tā‘ele lona tino i le vai, ‘ona mamā ai lea o ia.
10. A o‘o fo‘i i le aso valu, na te avatua ni tama‘i mamoe po‘a e lua e sao ‘ona lelei, ma le tama‘i mamoe fafine e tasi, e tasi lona tausaga e sao ‘ona lelei, ma omera e tolu o falaoa lelei ‘ua palua ma le u‘u, e fai ma taulaga i mea e ‘ai, ma le loka e tasi o le suāu‘u.
11. O le ositaulaga fo‘i o lē fa‘amamā ‘iā te ia, na te tu‘u atu le tagata o le a fa‘amamāina, ‘atoa ma ia mea i luma o le ALI‘I i le faitoto‘a o le fale fetāfa‘i o le fa‘apotopotoga;
12. ‘ona ‘ave ai lea e le ositaulaga se tama‘i mamoe po‘a e tasi, ma avatu ai e fai ma taulaga mo le sesē, ‘atoa ma le loka o suāu‘u, ma lūlū ai e fai ma taulaga lūlū i luma o le ALI‘I;
13. na te fasi fo‘i le tama‘i mamoe i le mea na te fasi ai le taulaga mo le agasala ma le taulaga mū i le mea pa‘ia; auā e pei o le taulaga mo le agasala e fa‘apea fo‘i le taulaga mo le sesē, e fai mo le ositaulaga; ‘ua matuā pa‘ia lava lea mea.
14. ‘Ona ‘ave ai lea e le ositaulaga nisi toto o le taulaga mo le sesē, e tu‘u ai e le ositaulaga i le tumutumu o le taliga taumatau o le tagata o le a fa‘amamāina, ma le lima matua lona lima taumatau, ma le vae matua o lona vae taumatau;
15. ‘Ona ‘ave ai lea o le ositaulaga nisi mea ai le loka o le suāu‘u, ma liligi ai i le alofilima o le lima tauagavale o le ositaulaga
16. ‘ona fufui ai lea e le ositaulaga o le tamatama‘i lima o lona lima taumatau i le suāu‘u o i lona alofilima tauagavale ma sausau fa‘afitu le suāu‘u i lona tamatama‘i lima i luma o le ALI‘I.
17. A o mea o totoe o le suāu‘u i lona alofilima, e tu‘uina atu ai lea e le ositaulaga i le tumutumu o le taliga taumatau o le tagata o le a fa‘amamāina, ma le lima matua o lona lima taumatau, ma le vae matua o lona vae taumatau, i luga o le toto o le taulaga mo le sesē.
18. O mea fo‘i o totoe o le suāu‘u i le alofilima o le ositaulaga, na te tu‘uina atu lea i le ulu a le tagata o le a fa‘amamāina, ‘ona faia lea e le ositaulaga se togiola mo ia i luma o le ALI‘I.
19. E faia fo‘i e le ositaulaga le taulaga mo le agasala, ma le togiola mo ia o le a fa‘amamāina ai lona leaga; o mulimuli ane fo‘i na te fasi le taulaga mū.
20. E faia fo‘i e le ositaulaga le taulaga mū, ma le taulaga i mea e ‘ai i le fatafaitaulaga, ‘ona faia lea e le ositaulaga se togiola mo ia, ‘ona mamā ai lea o ia.
21. ‘Ae ‘āfai ‘ua mativa o ia, e lē maua ia mea; ‘ona ‘ave ai lea e ia se tama‘i mamoe po‘a e tasi e fai ma taulaga mo le sesē ‘ia lūlūina, e fai ai le togiola, mo ia, ma le omera e tasi o le falaoa lelei e palua ma suāu‘u, e fai ma taulaga i mea e ‘ai, ‘atoa ma le loka o le suāu‘u.
22. O le uluga manutagi fo‘i, po o tama‘i lupe e lua fua po o le fea na te maua; o le tasi e fai ma taulaga mo le agasala, a o le taulaga mū le tasi.
23. Na te ‘aumai ai fo‘i ia mea i le ositaulaga i le aso valu mo lona fa‘amamāina, i le faitoto‘a o le fale fetāfa‘i o le fa‘apotopotoga i luma o le ALI‘I.
24. ‘Ona avatu ai lea e le ositaulaga le tama‘i mamoe po‘a o le taulaga mo le sesē, ‘atoa ma le loka o le suāu‘u, e lūlūina fo‘i ia mea e le ositaulaga o le taulaga lūlū i luma o le ALI‘I;
25. na te fasi fo‘i le tama‘i mamoe po‘a o le taulaga mo le sesē, e ‘ave fo‘i e le ositaulaga nisi toto o le taulaga mo le sesē, ma tu‘u ai i le tumutumu o le taliga taumatau o le tagata o le a fa‘amamāina, ma le lima matua o lona lima taumatau, ‘atoa ma le vae matua o lona vae taumatau;
26. e liligiina fo‘i e le ositaulaga nisi suāu‘u i le alofilima o le lima tauagavale o le ositaulaga;
27. e sausauina fo‘i e le ositaulaga i lona tamatama‘i lima taumatau nisi suāu‘u ‘ua i lona alofilima tauagavale e fa‘afitu ai i luma o le ALI‘I.
28. E tu‘uina atu fo‘i e le ositaulaga nisi suāu‘u ‘ua i lona lima i le tumutumu o le taliga taumatau o le tagata o le a fa‘amamāina, ma le lima matua o lona lima taumatau, ma le vae matua o lona vae taumatau, i le mea o i ai le toto o le taulaga mo le sesē;
29. a o toe suāu‘u ‘ua i le alofilima o le ositaulaga na te tu‘uina atu i le ulu o le tagata o le a fa‘amamāina, e fai ma togiola mo ia i luma o le ALI‘I.
30. Na te avatua le tasi manutagi, po o le tasi tama‘i lupe o le fea ‘ua na maua;
31. po o le fea o ia mea ‘ua na maua, o le tasi e fai ma taulaga mo le agasala, ma le tasi e fai ma taulaga mū, ‘atoa ma le taulaga i mea e ‘ai e fai ai e le ositaulaga le togiola i luma o le ALI‘I mo ia o le a fa‘amamāina.
32. O le tulafono lea ‘iā te ia ‘ua i ai le ila lepela, e lē mafai ‘iā te ia ‘ona maua o mea e tatau ma lona fa‘amamāina.
33. ‘Ua fetalai mai fo‘i le ALI‘I ‘iā Mose ma Arona, ‘ua fa‘apea mai,
34. A ‘outou o‘o atu i le nu‘u o Kanana ‘ou te avatua ‘iā te ‘outou e fai mo ‘outou ma ‘ou tu‘uina atu le ila lepela i se fale o le nu‘u ‘ua fai mo ‘outou.
35. ‘Ona alu ane ai lea o ia e ona le fale ma ta‘u atu i le ositaulaga, ‘ia fa‘apea atu, “O lo‘u va‘ai ‘ua peiseaī se ila ‘ua i le fale.”
36. ‘Ona fai atu ai lea o le ositaulaga, latou te la‘u ‘ese mea o i le fale, a o le‘i ulufale ai le ositaulaga e matamata i le ila, ‘ina ne‘i leaga mea uma o i le fale; e mulimuli ane ‘ona ulu atu ai lea o le ositaulaga e matamata i le fale;
37. ‘ona matamata ai lea o ia i le ila, fa‘auta fo‘i, ‘ua i ai lava le ila i pā o le fale, o mea ‘omo‘omo fa‘asamasama, po o fa‘amūmū, ‘ua peiseaī ‘ua ‘emo ifo i le pā;
38. ‘ona ulufafo ai lea o le ositaulaga i le fale i le faitoto‘a o le fale ma pupuni le fale i aso e fitu.
39. ‘Ona toe fo‘i ai lea o le ositaulaga i le aso fitu e matamata ai; fa‘auta fo‘i, ‘ua sosolo le ila i le pā o le fale;
40. ‘ona fai atu lea o le ositaulaga, latou te ‘ave ‘ese ma‘a ‘ua i ai le ila, ma lafo i tua o le ‘a‘ai i se mea leaga;
41. e fai atu fo‘i o ia, ‘ia valusia le fale i totonu ‘ia so‘o, ia latou sasa‘a fo‘i le ‘ele‘ele na latou valusia i tua o le ‘a‘ai i se mea leaga.
42. ‘Ia latou avatu fo‘i nisi ma‘a e sui a‘i ia ma‘a, ‘ia avatu ai fo‘i nisi panisina e vali ai le fale.
43. ‘Āfai fo‘i e toe tupu le ila, ma tupu mai i le fale, ‘ina ‘ua uma ‘ona ‘ave‘eseina o ma‘a, ‘ina ‘ua uma ‘ona valusia o le fale, ‘ua uma fo‘i ‘ona valia;
44. ‘ona ulufale atu ai lea o le ositaulaga e matamata atu ai, fa‘auta fo‘i, ‘ua sosolo le ila i le fale, o le lepela ‘a‘ati lea i le fale; ‘ua leaga ia.
45. ‘Ona lepeti ai lea e ia o le fale, o ona ma‘a, ma ona la‘au, ‘atoa ma panisina uma o le fale, na te ‘ave‘esea fo‘i i tua o le ‘a‘ai i se mea leaga.
46. O sē ulu atu i lea fale i ona aso uma o punitia ai, e leaga ai o ia se‘ia o‘o i le afiafi.
47. o sē ta‘oto fo‘i i le fale, na te ta ona ‘ofu, o sē ‘ai fo‘i i le fale, na te ta ona ‘ofu.
48. ‘Ae ‘āfai e ulufale atu le ositaulaga, ma matamata ai, fa‘auta fo‘i, ‘ua lē sosolo le ila i le fale, ‘ina ‘ua uma ‘ona valia o le fale; ‘ona ta‘umamāina ai lea o le fale e le ositaulaga, auā ‘ua mavae le ila.
49. ‘Ona ‘ave ai lea e ia manu e lua, ma le la‘au o le arasi, ma le ‘ie mūmū, ma le isopo e fa‘amamā a‘i le fale.
50. ‘Ona fasi ai lea e ia le tasi manu i se ipu ‘omea i luga o le vaipuna;
51. ‘ona tago ai lea o ia i le la‘au o le arasi, ma le isopo, ma le ‘ie mūmū, ma le manu ola, ma fufui ai i le toto o le manu ‘ua fasia, i le ma le vaipuna, ‘ona sausau fa‘afitu ai lea i le fale.
52. Na te fa‘amamāina fo‘i le fale i le toto o le manu, ma le vaipuna, ma le manu ola, ma le la‘au o le arasi, ma le isopo, ‘atoa ma le ‘ie mūmū,
53. ‘ona tu‘u atu lea e ia o le manu ola i tua o le ‘a‘ai i le vao, e fai ai le togiola mo le fale, ‘ona mamā ai lea.
54. O le tulafono lea i ila lepela uma lava, ‘atoa ma ma‘i pa‘upa‘ua,
55. i le ma le lepela o i le ‘ofu, po o le fale,
56. ma le ma‘i fulafula, ma le mea fa‘apa‘upa‘u, ma le lupe o i le tino;
57. e a‘oa‘o mai ai ona leaga, ma ona mamā; o le tulafono lea i le lepela.#