1. ‘Ua fetalai mai fo‘i le ALI‘I ‘iā Mose, ‘ua fa‘apea mai:
2. Fai atu ia i le fānauga a Isaraelu, ‘ia fa‘apea atu ‘iā i latou: ‘Ai se tagata na te fa‘asāina se tasi i le tautō; ‘ona fai lea o tagata mo le ALI‘I e tusa ma lau fa‘atatau.
3. E faia fo‘i lau fa‘atatau i le tane e āfua i le luafulu o ona tausaga, e o‘o lava i ona tausaga e onogafulu, ‘e te fa‘atatau i sekeli ario e limagafulu, e tusa ma le sekeli o le malumalu.
4. ‘Ae ‘āfai o se fafine, ‘ona e fa‘atatau ai lea i sekeli e tolugafulu.
5. ‘Ae ‘āfai o se tagata e amata i le lima ona tausaga e o‘o lava i ona tausaga e luafulu ‘ona e fa‘atatau ai lea i le tama tane mo sekeli e luafulu, o le tama fafine o sekeli e tasi le sefulu.
6. ‘Āfai e amata i lona masina e tasi e o‘o i ona tausaga e lima, ‘ona e fa‘atatau ai lea i le tama o sekeli ario e lima, ‘ia e fa‘atatau i le teine o sekeli ario e tolu.
7. ‘Āfai fo‘i o se tagata e onogafulu ona tausaga, ‘atoa ma ē ‘ua matutua ai; ‘āfai o se tane, ‘ona e fa‘atatau ai lea o sekeli e tasi le sefulu ma le lima, a o le fafine e tasi le sefulu o sekeli.
8. ‘Ae ‘āfai e lē o ‘iā te ia mea na e fa‘atatau i ai, ‘ona alu ane ai lea o ia i luma o le ositaulaga, o fa‘atatauina fo‘i e le ositaulaga i lē na tautō e tusa ma mea na te maua, e fa‘apea lava ‘ona fa‘atatau e le ositaulaga ‘iā te ia.
9. ‘Ae ‘āfai o se manu latou te fai a‘i taulaga i le ALI‘I, o mea fa‘apea uma e foa‘iina atu ai i le ALI‘I, e pa‘ia lava ia.
10. ‘Aua na te avatua se tasi e sui a‘i, o le lelei e sui a‘i le leaga, po o le leaga e sui a‘i le lelei; ‘āfai fo‘i na te suia lava le manu i se tasi manu, ‘ona pa‘ia ai lea ‘atoa ma lona sui.
11. ‘Āfai fo‘i o se manu leaga latou te lē fai a‘i taulaga i le ALI‘I; ‘ona tu‘uina atu ai lea e ia o le manu i luma o le ositaulaga.
12. ‘Ona fa‘atatauina lea e le ositaulaga pe lelei pe leaga; e tusa ma lau fa‘atatau, o oe na le ositaulaga, e fa‘apea lava ia.
13. ‘Ae ‘āfai ‘ua fia toe fa‘atau mai ai e ia, ‘ona fa‘aopoopoina ai lea e ia o lona vaega e lima i lau fa‘atatau.
14. ‘Āfai fo‘i ‘ua fa‘asāina e se tagata lona fale ‘ina ‘ia pa‘ia i le ALI‘I, ‘ona fa‘atatau ai lea e le ositaulaga, pe lelei pe leaga; e tusa mōna fa‘atatauina e le ositaulaga, e fa‘apea lava ia.
15. ‘Ae ‘āfai ‘ua fia toe fa‘atau mai lona fale e lē na fa‘asāina ai, ‘ona fa‘aopoopoina ai lea e ia o le vaega e lima o tupe i lau fa‘atatau, ‘ona fai ai lea mōna.
16. ‘Āfai fo‘i e fa‘asāina i le ALI‘I e se tagata se fasi fanua o lona lava fanua, ‘ona e fa‘atatau ai lea e tusa ma ona fua e lūlūina ai; o le fa‘atatau o le fanua e lūlūina ai o le somera o karite, o sekeli ario e limagafulu ia.
17. ‘Āfai fo‘i na te fa‘asāina lona fanua e āfua i le tausaga o le iupelī, e tusa ma lau fa‘atatau, e fa‘apea lava ia.
18. ‘Ae ‘āfai na te fa‘asāina lona fanua a ‘ua mavae le iupelī, ‘ona faitau ai lea e le ositaulaga o tupe e tusa ma tausaga o totoe, ‘ina se‘ia o‘o lava i le tausaga o le iupelī, e vavae ‘ese ia a‘i lau fa‘atatau.
19. A fia toe fa‘atau mai le fanua e le tagata na na fa‘asāina ai, ‘ona fa‘aopoopoina ai lea o ia o le vaega e lima o tupe o lau fa‘atatau, ‘ona fa‘amauina ai lea ‘iā te ia.
20. ‘Āfai fo‘i ‘ua lē fia toe fa‘atau mai le fanua, po ‘ua fa‘atauina le fanua i se tasi tagata, ‘ona lē toe fa‘atauina mai ai lava lea.
21. ‘Ae peita‘i a o‘o ‘ina tu‘uina atu le fanua i le iupelī, ‘ona pa‘ia lea i le ALI‘I, e tusa ma se fanua ‘ua fa‘atoina; e fai lava lea mo le ositaulaga.
22. ‘Āfai fo‘i e fa‘asāina i le ALI‘I e se tasi se fanua ‘ua na fa‘atauina, ‘ae lē o lona lava fanua;
23. ‘ona faitau atu ai lea e le ositaulaga ‘iā te ia le fa‘atusa o lau fa‘atatau e o‘o lava i le tausaga o le iupelī; na te avatua fo‘i o lau fa‘atatau i lea lava aso, o le mea pa‘ia lava lea i le ALI‘I.
24. A o‘o i le tausaga o le iupelī, ‘ona toe i‘u atu ai lea o le fanua ‘iā te ia na fa‘atau mai ai, o ia lava lea na fai ai le fanua mōna.
25. O au fa‘atatau uma fo‘i ‘ia tusa ia ma le sekeli o le malumalu; e luafulu o kire o le sekeli lea.
26. A o ulumatua a manu e a le ALI‘I a latou ulumatua, e le fa‘asāina ai lea e se tasi; po o se povi, po o se mamoe; o mea lava ia a le ALI‘I.
27. ‘Ae ‘āfai o se manu leaga, ‘ona toe fa‘atau mai ai lea e ia e tusa ma lau fa‘atatau, ma ia fa‘aopoopo i ai lona vaega e lima; ‘ae ‘āfai ‘ua lē toe fa‘atauina mai e ia, ‘ona fa‘atauina atu ai lea e tusa ma lau fa‘atatau.
28. Peita‘i ane o mea uma e fa‘atoina, ‘ua fa‘atoina e se tasi i le ALI‘I, o se mea fo‘i o ana mea uma, o se tagata, po o se manu, po o lona lava fanua, e lē fa‘atauina atu ai, pe toe fa‘atauina mai; o mea ‘ua fa‘atoina uma e matuā pa‘ia lava ia i le ALI‘I.
29. E leai lava se mea ‘ua fa‘atoina, o fa‘atoina e tagata e toe fa‘atauina mai; ‘ae fasia lava.
30. O mea uma fo‘i e sefulua‘i mea i le fanua, o saito e lūlūina i le fanua, po o fua o la‘au, o mea ia a le ALI‘I; ‘ua pa‘ia lava i le ALI‘I.
31. A fia toe fa‘atau mai e se tagata mea e sefulua‘i ana mea, na te fa‘aopoopo i ai lona vaega e lima;
32. i le ma le sefulu o manu uma, o povi, ‘atoa ma mamoe, o mea uma lava e ui ane i lalo o le to‘oto‘o, e pa‘ia lava i le ALI‘I lona sefulu.
33. ‘Aua ne‘i su‘esu‘e e ia, po ‘ua lelei, po ‘ua leaga, ‘aua fo‘i ne‘i fesuia‘iina; ‘āfai fo‘i ‘ua suia lava e ia i se tasi manu, ‘ona pa‘ia ai lea o lenā, ‘atoa ma lona sui; e lē toe fa‘atauina mai.
34. O poloa‘iga ia na fetalai mai ai le ALI‘I ‘iā Mose mo le fānauga, a Isaraelu i le mauga o Sinai.#