1. ‘Ua fetalai mai fo‘i le ALI‘I ‘iā Mose, ‘ua fa‘apea mai,
2. ‘Inā fai atu ia i le fānauga a Isaraelu ‘ia fa‘apea atu: A agasala se tasi ma le sesē i se tasi poloa‘iga a le ALI‘I i mea e lē tusa ‘ona faia, ma na faia se tasi o ia mea.
3. ‘Āfai e agasala le ositaulaga ‘ua fa‘au‘uina, e sesē ai le nu‘u, na te avatu ai i le ALI‘I se povi po‘a ta‘anoa e sao ‘ona lelei e fai ma taulaga mo le agasala, ‘ona o lana agasala na ia agasala ai.
4. Na te ‘aumaia fo‘i le povi po‘a ta‘anoa i le faitoto‘a o le fale fetāfa‘i o le fa‘apotopotoga i luma o le ALI‘I; na te fa‘ae‘e fo‘i lona lima i le ulu o le povi po‘a ta‘anoa, ma fasi ai le povi po‘a ta‘anoa i luma o le ALI‘I.
5. ‘Ona ‘ave ai lea o le ositaulaga ‘ua fa‘au‘uina nisi toto o le povi po‘a ta‘anoa, ma avatu ai i le fale fetāfa‘i o le fa‘apotopotoga;
6. ona fufui ai lea e le ositaulaga lona tamatama‘i lima i le toto, ma sausau fa‘afitu nisi o le toto i luma o le ALI‘I, i luma o le ‘ie puipui o le mea pa‘ia.
7. E tu‘u ai fo‘i e le ositaulaga nisi o le toto i nifo o le fata e mū ai mea manogi lelei i luma o le ALI‘I, ‘ua i ai lea i le fale fetāfa‘i o le fa‘apotopotoga; a o le toto uma o le povi na te liligi ai i lalo ifo o le fata e fai ai taulaga mū, ‘ua i ai lea i le faitoto‘a o le fale fetāfa‘i o le fa‘apotopotoga.
8. Na te ‘ave‘eseina ai fo‘i ga‘o uma o le povi po‘a ta‘anoa o le taulaga mo le agasala, o le ga‘o alo ma ga‘o uma ‘ua i ai.
9. O fatuga‘o fo‘i e lua, ma ga‘o o i ai, ‘ua i lāgotua, ma le ga‘o punipū ‘ua i luga o le finagalo ma fatuga‘o, na te ‘ave‘eseina ia,
10. e pei ‘ona ‘ave‘eseina e ia i le povi o le taulaga fa‘afetai; e susunuina ia e le ositaulaga i luga o le fata e fai ai taulaga mū.
11. A o le pa‘u o le povi po‘a ta‘anoa, ma ona anogase uma, ma lona ulu, ma ona ālaga, ma ona tōtōga, ma ona otaota,
12. na te ‘avea le povi po‘a ta‘anoa uma lava i tua o le toagalauapi, i se mea mamā, o le mea e sasa‘a ai le lefulefu, ma ia susunuina ai i luga o fafie i le afi, o le mea e sasa‘aina ai le lefulefu e susunuina ai ia.
13. ‘Āfai e sesē le fa‘apotopotoga uma o Isaraelu, ma ‘ua lilo le mea i le fa‘apotopotoga, ma ‘ua latou faia se mea e lē tusa ma se poloa‘iga a le ALI‘I i mea uma e lē tusa ‘ona fai ma ‘ua nofo sala i latou,
14. pe a iloa le agasala na latou agasala ai, ‘ona avatu ai lea e le fa‘apotopotoga se povi po‘a ta‘anoa e fai ma taulaga ‘ona o le agasala; latou te ‘aumai ai i luma o le fale fetāfa‘i o le fa‘apotopotoga.
15. O toeaina fo‘i o le fa‘apotopotoga, latou tō fa‘ae‘e ai o latou lima i le ulu o le povi po‘a ta‘anoa i luma o le ALI‘I; e fasia fo‘i le povi po‘a ta‘anoa i luma o le ALI‘I.
16. ‘Ona ‘aumai lea e le ositaulaga ‘ua fa‘au‘uina nisi o le toto o le povi po‘a ta‘anoa i le fale fetāfa‘i o le fa‘apotopotoga;
17. ‘ona fufui ai lea e le ositaulaga lona tamatama‘i lima i le toto, ma sausau fa‘afitu ai i luma o le ALI‘I, i luma o le ‘ie puipui.
18. Na te tu‘uina atu ai fo‘i nisi o le toto i nifo o le fatafaitaulaga ‘ua i luma o le ALI‘I, ‘ua i ai lea i le fale fetāfa‘i o le fa‘apotopotoga; a o le toto uma na te liligiina ifo i lalo o le fata e fai ai taulaga mū, ‘ua i le faitoto‘a o le fale fetāfa‘i o le fa‘apotopotoga.
19. A o ona ga‘o uma na te ‘ave‘eseina ai, ma susunu i luga o le fatafaitaulaga.
20. Na te faia fo‘i i povi po‘a ta‘anoa, pei ‘ona ia fai i le povi po‘a ta‘anoa na fai ma taulaga mo le agasala, e fa‘apea lava ‘ona fai; ‘ona fai ai lea o le ositaulaga le togiola mo i latou, ‘ona fa‘amāgaloina ai lea o i latou.
21. Na te avatua le povi po‘a ta‘anoa i tua o le toagalauapi, ma susunu ai e pei ‘ona ia susunu le ulua‘i povi po‘a ta‘anoa; o le taulaga mo le agasala lea mo le fa‘apotopotoga.
22. A agasala se ali‘i, ma na faia ma le sesē se mea e lē tusa ma se tasi poloa‘iga a le ALI‘I lona Atua i mea ‘ua lē tusa ‘ona fai, ma ‘ua nofo sala ai o ia.
23. A iloa fo‘i e ia lana agasala ‘ua ia agasala ai na te ‘aumai ai lana taulaga, o se ‘oti po‘a e sao ‘ona lelei.
24. Na te fa‘ae‘e fo‘i lona lima i le ulu o le ‘oti po‘a, ma fasi ai i le mea e fasi ai le taulaga mū i luma o le ALI‘I; o le taulaga mo le agasala lea.
25. ‘Ona ‘ave ai lea e le ositaulaga nisi o le toto o le taulaga mo le agasala i lona tamatama‘i lima, ma tu‘u ai i nifo o le fata e fai ai taulaga mū, na te liligiina ifo fo‘i le toto i lalo o le fata e fai ai taulaga mū.
26. A o ona ga‘o uma na te susunuina i le fatafaitaulaga, e pei o ga‘o o le taulaga fa‘afetai; ‘ona fai ai lea e le ositaulaga se togiola mo ia ‘ona o lana agasala, ‘ona fa‘amāgaloina ai lea o ia.
27. ‘Ae ‘āfai e agasala ma le sesē se tagata o le nu‘u, ma ‘ua faia se mea e lē tusa ma se tasi poloa‘iga a le ALI‘I i mea ‘ua lē tusa ‘ona fai, ma ‘ua nofo sala o ia;
28. a iloa fo‘i e ia lana agasala ‘ua ia agasala ai; ‘ona ‘aumai ai lea e ia o lana taulaga, o se ‘oti fafine e sao ‘ona lelei, ‘ona o lana agasala ‘ua ia agasala ai.
29. Na te fa‘ae‘e fo‘i lona lima i le ulu o le taulaga mo le agasala, ma fasi le taulaga mo le agasala i le mea e fai ai le taulaga mū.
30. ‘Ona ‘ave ai lea e le ositaulaga nisi o lona toto i lona tamatama‘i lima, ma tau ai i nifo o le fata e fai ai taulaga mū; a o lona toto uma na te liligiina ifo i lalo o le fatafaitaulaga.
31. Na te ‘ave‘eseina fo‘i ona ga‘o uma, e pei ona ‘ave‘eseina ga‘o o le taulaga fa‘afetai; ‘ona susunuina ai lea e le ositaulaga i le fatafaitaulaga, o le mea manogi lelei lea i le ALI‘I; e faia fo‘i e le ositaulaga se togiola mo ia, ‘ona fa‘amāgaloina ai lea o ia.
32. ‘Āfai fo‘i na te ‘aumai se tama‘i mamoe māna taulaga e fai ma taulaga mo le agasala, na te ‘aumai se manu fafine e sao ‘ona lelei.
33. Na te fa‘ae‘e fo‘i lona lima i le ulu o le taulaga mo le agasala, ma fasi ai, e fai ma taulaga mo le agasala, i le mea e fasi ai le taulaga mū.
34. ‘Ona ‘ave ai lea e le ositaulaga nisi o le toto o le taulaga mo le agasala i lona tamatama‘i lima, ma tu‘u ai i nifo o le fata e fai ai taulaga mū; a o lona toto uma na te liligiina ifo i lalo o le fatafaitaulaga.
35. A o ona ga‘o uma na te ‘ave‘eseina, e pei ‘ona ‘ave‘eseina ga‘o o le tama‘i mamoe o le taulaga fa‘afetai; ‘ona susunuina ai lea e le ositaulaga i le fatafaitaulaga, e pei o taulaga e fai i le afi i le ALI‘I; e faia fo‘i e le ositaulaga se togiola mo ia ‘ona o lana agasala ‘ua ia agasala ai, ‘ona fa‘amāgaloina ai lea o ia.