1. ‘Ua fetalai mai fo‘i le ALI‘I ‘iā Mose, ‘ua fa‘apea mai:
2. Fai atu ia i le fānauga a Isaraelu, ‘ia fa‘apea atu ‘iā i latou, O tausamiga i le ALI‘I tou te tala‘i ai, o fa‘apotopotoga pa‘ia, o tausamiga lava ia ‘iā te a‘u.
3. E ono aso e fai ai galuega; a o le aso fitu, o le sapati lea e mālōlō ai, e fai ai le fa‘apotopotoga pa‘ia, ‘aua tou te fai ai se galuega e tasi; o le sapati lea i le ALI‘I i mea uma tou te nonofo ai.
4. O tausamiga ia i le ALI‘I, o fa‘apotopotoga pa‘ia, ‘ia ‘outou tala‘i ai i o latou aso ‘ua ‘atofaina.
5. O le masina muamua, o le aso e tasi le sefulu ma le fa o le masina, o le afiafi, o le paseka lea i le ALI‘I.
6. O le aso e tasi le sefulu ma le lima o lea lava masina, o le tausamiga lea i le ALI‘I o le areto e lē fa‘afefeteina; o aso lava e fitu tou te ‘a‘ai ai le areto e lē fa‘afefeteina.
7. O le aso muamua tou te fai ai se fa‘apotopotoga pa‘ia, ‘aua tou te fai ai se galuega mamafa.
8. A ‘ia ‘outou avatua taulaga e fai i le afi i le ALI‘I i aso e fitu; o le aso fitu o le fa‘apotopotoga pa‘ia lea; ‘aua lava tou te fai ai se galuega mamafa.
9. ‘Ua fetalai mai fo‘i le ALI‘I ‘iā Mose, ‘ua fa‘apea mai:
10. Fai atu ia i le fānauga a Isaraelu, ‘ia fa‘apea atu ‘iā i latou, A ‘outou o‘o i le nu‘u ‘ou te avatua mo ‘outou ma ‘outou fai ai le seleselegāsaito: ‘ona ‘outou ‘aumai ai lea o le fusi saito o mea ‘ua fa‘apolopoloina o la ‘outou seleselega i le ositaulaga.
11. E lūlūina fo‘i e ia o le fusi saito i luma o le ALI‘I, ‘ina ‘ia talia mo ‘outou; o le aso e aupito mai i le sapati e lūlūina ai e le ositaulaga.
12. O le aso fo‘i tou te lūlūina ai fusi saito, tou te avatua ai se mamoe po‘a e sao ‘ona lelei, e tasi lona tausaga, e fai ma taulaga mū i le ALI‘I.
13. O le taulaga fo‘i i mea e ‘ai e tatau i ai, e lua omera o le falaoa lelei ‘ua palua ma le u‘u, o le taulaga e fai i le afi i le ALI‘I, o le mea manogi lelei; ma le taulaga i le mea e inu e tatau i ai, o lona vaega e fa o le sinu o uaina.
14. ‘Aua tou te ‘a‘ai fo‘i sina areto, po o se saito tunua, po o saito mata se‘ia o‘o i lea lava aso ‘ua ‘aumai ai se taulaga i lo ‘outou Atua; o le tulafono lea e fa‘avavau i o ‘outou tupulaga amulī i mea uma tou te nonofo ai.
15. ‘Ia ‘outou faitaulia e amata i le aso e aupito mai i le sapati, o le aso lava na ‘outou ‘aumai ai le fusi saito o le taulaga lūlū; ‘ia ‘ato‘atoa o sapati e fitu.
16. E o‘o lava i le aso e aupito mai i le sapati e fitu tou te faitau ai o aso e limagafulu; ‘ona fai taulaga ai lea i le taulaga i mea e ‘ai fou i le ALI‘I.
17. Tou te ‘aumai nai o ‘outou fale o areto lūlū e lua fua, e ta‘ilua omera, e fai i le falaoa lelei, ‘ia tao ma le mea e fa‘afefete a‘i, o mea fa‘apolopolo ia i le ALI‘I.
18. ‘Ia ‘outou avatua fa‘atasi ma areto o tama‘i mamoe e fitu, e tasi lo latou tausaga e sao ‘ona lelei, ‘atoa ma le tama‘i povi po‘a e tasi, ma mamoe po‘a e lua, e fai ia ma taulaga mū i le ALI‘I, ‘atoa ma taulaga i mea e ‘ai e tatau i ai, ma taulaga i le mea e inu e tatau i ai, o le taulaga lava e fai i le afi, o le mea manogi lelei i le ALI‘I.
19. ‘Ona fai taulaga ai lea ‘outou i se ‘oti po‘a e tasi e fai ma taulaga mo le agasala, ‘atoa ma tama‘i mamoe e lua e tasi lo la tausaga, e fai ma taulaga fa‘afetai.
20. ‘Ona lūlūina ai lea o ia mea e le ositaulaga ‘atoa ma le areto o mea fa‘apolopoloina, e fai ma taulaga lūlū i luma o le ALI‘I, ‘atoa ma tama‘i mamoe e lua; e pa‘ia ia mea i le ALI‘I ma le ositaulaga.
21. ‘Ia ‘outou tala‘i i lea lava aso e fai ai se fa‘apotopotoga pa‘ia e ‘outou; tou te lē fai ai se galuega mamafa e tasi; o le tulafono lea e fa‘avavau i mea uma tou te nonofo ai i o ‘outou tupulaga amulī.
22. A ‘outou selesele fo‘i le seleselegāsaito i o ‘outou fanua, ‘aua le fa‘auma ou pito fanua pe a e selesele i ai; ‘aua fo‘i ‘e te ao ni fua ‘ua pa‘u‘ū i lau seleselega, a ‘ia tu‘u mo ē matitiva ma le tagata ‘ese: O a‘u o le ALI‘I lo ‘outou Atua.
23. ‘Ua fetalai mai fo‘i le ALI‘I ‘iā Mose, ‘ua fa‘apea mai:
24. Fai atu ia i le fānauga a Isaraelu, ‘ia fa‘apea atu, o le fituga masina, o le aso muamua o le masina, ‘ia ‘outou fai ai se sapati, o le fa‘amanatuga i le iligāpu, o le fa‘apotopotoga pa‘ia.
25. ‘Aua tou te fai ai se galuega mamafa e tasi, a ‘ia ‘outou avatu se taulaga e fai i le afi i le ALI‘I.
26. ‘Ua fetalai mai le ALI‘I ‘iā Mose, ‘ua fa‘apea mai:
27. O le aso sefulu o lea lava fituga masina, o le aso o le togiola lea; o le fa‘apotopotoga pa‘ia lea ‘iā te ‘outou; ‘ia puapuagātia ai ‘outou e ‘outou, ma avatu ai se taulaga e fai i le afi i le ALI‘I.
28. ‘Aua tou te faia se galuega e tasi i lea lava aso; auā o le aso lea o le togiola, e fai ai se togiola mo ‘outou i luma o le ALI‘I lo ‘outou Atua.
29. ‘Ai se tagata e lē puapuagātia o ia e ia i lea lava aso, e vavae‘eseina o ia i lona nu‘u.
30. ‘Ai se tagata fo‘i na te faia se galuega e tasi i lea lava aso, e fano ‘iā te a‘u o lea tagata ai lona lava nu‘u.
31. ‘Aua tou te fai ai se galuega e tasi; o le tulafono lea e fa‘avavau i o ‘outou tupulaga amulī, i mea uma tou te nonofo ai.
32. E fai lea ma sapati e mālōlō ai ‘outou, e puapuagātia ai ‘outou e ‘outou; o le afiafi o le aso iva o le masina, e amata mai i le afiafi e o‘o lava i le tasi afiafi, tou te fai ai ma sapati e mālōlō ai.
33. ‘Ua fetalai mai fo‘i le ALI‘I ‘iā Mose, ‘ua fa‘apea mai:
34. Fai atu ia i le fānauga a Isaraelu, ‘ia fa‘apea atu: O le aso sefulu ma le lima o lea lava fituga masina, o le tausamiga o fale apitaga lea, e faia i aso o fitu i le ALI‘I.
35. O le aso muamua, o le fa‘apotopotoga pa‘ia lea; ‘aua tou te fai ai se galuega mamafa e tasi.
36. O aso e fitu ‘ia ‘outou avatu ai taulaga e fai i le afi i le ALI‘I, o le aso valu e fai ai le fa‘apotopotoga pa‘ia e ‘outou; ‘ia ‘outou avatu ai se taulaga e fai i le afi i le ALI‘I; o le fa‘apotopotoga lea; ‘aua tou te fai ai se galuega mamafa e tasi.
37. O tausamiga ia i le ALI‘I tou te tala‘i ai, o fa‘apotopotoga pa‘ia, e avatu ai se taulaga e fai i le afi i le ALI‘I, o le taulaga mū, ma le taulaga i mea e ‘ai, o le taulaga i mea ‘ua fasia, ma le taulaga i mea e inu, o le aso ma ana mea;
38. ‘atoa ma sapati o le ALI‘I, ‘atoa fo‘i ma a ‘outou mea foa‘i fua, ‘atoa fo‘i ma mea uma ‘ua ‘outou tautō ai, ‘atoa fo‘i ma taulaga ‘ua ‘outou loto fua ‘ina fai, tou te ‘aumaia i le ALI‘I.
39. O le aso sefulu ma le lima o le fituga masina, pe a uma ‘ona fa‘aputuina e ‘outou le fua o le fanua, ‘ia ‘outou faia lava se tausamiga i le ALI‘I i aso e fitu; o le aso muamua e fai ma sapati lea, i le ma le aso valu e fai ma sapati fo‘i lea.
40. O le aso muamua fo‘i tou te ‘ave ai fua o la‘au matagofie, o lau pama, ma la o la‘au felefele, ma garava mai le alia ma ‘ia ‘outou ‘oli‘oli i luma o le ALI‘I lo ‘outou Atua i aso e fitu;
41. ma ‘ia ‘outou fai ai le tausamiga i le ALI‘I i aso e fitu i lea tausaga ma lea tausaga; o le tulafono e fa‘avavau i o ‘outou tupulaga amulī; ‘ia ‘outou faia le tausamiga i le fituga masina.
42. Tou te nonofo i fale apitaga i aso e fitu, o tama a le ‘ele‘ele uma i Isaraelu latou te nonofo i fale apitaga;
43. ‘ina ‘ia iloa e o ‘outou tupulaga amulī na ‘ou fa‘anofo ai le fānauga a Isaraelu i fale apitaga, ‘ina ‘ua ‘ou ‘aumai ‘iā i latou a‘i le nu‘u o Aikupito: O a‘u o le ALI‘I lo ‘outou Atua.
44. ‘Ona ta‘u atu lea e Mose i le fānauga a Isaraelu o tausamiga i le ALI‘I.