1. ‘Ua mavae nei mea ‘ona fasia lea e Tavita ‘iā Filisitia, ma na fa‘ato‘ilaloina i latou; ‘ua faoa fo‘i e Tavita Meti-ama a‘i lima o Filisitia.
2. ‘Ua ia fasia fo‘i Moapi, ‘ona fuatia lea o i latou i le maea o lo‘o lafo i latou i le ‘ele‘ele, ma na fuatia i latou i maea e lua e fasioti ai, ma le maea āuāu e fa‘aola ai. ‘Ua faia fo‘i Moapi ma pologa ‘iā Tavita, a ‘ua latou ‘aumai ai taulaga.
3. ‘Ua fasi fo‘i e Tavita ‘iā Atatesa le atali‘i o Reopo, le tupu o Sopa, ‘ina ‘ua alu atu o ia e fa‘ao‘o lana pule i le vaitafe o Eufirate.
4. ‘Ua maua fo‘i e Tavita nai ‘iā te ia o ē ti‘eti‘e i solofanua e tasi le afe ma le fitu galau, ma ‘au e sāvavali, o tagata e lua sefulu o afe; ‘ona vaevae lea e Tavita o ua o vae o solofanua i kariota uma; a ‘ua fa‘asao ai māna o kariota e selau.
5. ‘Ua ō mai Suria nai Tamaseko e fesoasoani ‘iā Atatesa le tupu o Sopa, ‘ona fasia lea e Tavita o Suria e lua sefulu o afe, ma afe e lua o tagata.
6. ‘Ona tu‘u lea e Tavita o leoleoga i Suria Tamaseko; ‘ua fai ma pologa Suria ‘iā Tavita, ‘ua latou ‘aumaia taulaga. ‘Ua fa‘asaoina Tavita e le ALI‘I i mea uma na ia fealua‘i ai.
7. ‘Ua ‘avea e Tavita o talitā auro sa i ai i ‘au‘auna a Atatesa, ‘ua ia ‘aumai ai i Ierusalema.
8. A o Peta ma Perota o ‘a‘ai a Atatesa, na ‘avea ai e le tupu o Tavita o ‘apamemea e matua tele lava.
9. ‘Ua lagona e Toi le tupu o Amato, ‘ua fasia e Tavita ‘au uma a Atatesa,
10. ‘ona ‘auina mai lea e Toi o lona atali‘i o Iorama i le tupu o Tavita e alofa atu ‘iā te ia, ma fa‘afetai ‘iā te ia, ‘ina ‘ua la tau o ia ma Atatesa, ma ‘ua fasia o ia e ia; auā sa vā tau Toi ma Atatesa. ‘Ua ‘aumai fo‘i e ia o ipu ario ma ipu auro ma ipu ‘apamemea.
11. O mea fo‘i ia sa fa‘asā e le tupu o Tavita i le ALI‘I, ‘atoa ma le ario ma le auro sa na fa‘asāina mai nu‘u ‘ese uma sa na fa‘ato‘ilaloina;
12. o Suria, ma Moapi, ma le fānauga a Amoni, ma Filisitia, ma Amaleka, ma vete mai ‘iā Atatesa le atali‘i o Reopo le tupu o Sopa.
13. ‘Ona vi‘ia lea o le suafa o Tavita ‘ina ‘ua fo‘i o ia nai le fasiga o Suria i le vanu masima, o tagata e sefulu afe ma afe e valu.
14. ‘Ua ia tu‘u fo‘i o leoleoga i Etoma; o Etoma uma lava ‘ua ia tu‘u i ai leoleoga; ‘ua fai ma pologa Etoma uma ‘iā Tavita. ‘Ua fa‘asao e le ALI‘I ‘iā Tavita i mea uma na ia fealua‘i ai.
15. ‘Ua faia Tavita ma tupu i Isaraelu uma ‘ua fai fo‘i e Tavita le fa‘amasinoga ma le tonu i lona nu‘u uma lava.
16. O Ioapo le tama a Seruia, ‘ua pule o ia i ‘au; o Iosefatu le atali‘i o Ailuta, o le fātua‘iupu o ia;
17. o Satoka le atali‘i o Akitopo, ma Aimeleka le atali‘i o Aviata, o ositaulaga i lā‘ua; a o Seraia o le tusi‘upu ia;
18. o Penaia le atali‘i o Ioiata sa pule ia i le ‘au Kereti ma le ‘au Peleti; a o atali‘i o Tavita o faipule i latou.#