1. O toe ‘upu nei a Tavita: Na fai ane Tavita le atali‘i o Iese, ‘ua fai ane le tagata ‘ua fa‘aeaina, o lē ‘ua fa‘au‘uina e le Atua o Iakopo, o le faipese malie o Isaraelu:
2. O a‘u na fetalai ane ai le Agaga o le ALI‘I;o lana afioga fo‘i sa i lo‘u laulaufaiva.
3. Na fetalai mai ‘iā te a‘u le Atua o Isaraelu;o le papa o Isaraelu, ‘ua fetalai mai o ia.O lē ‘ua pule i tagata ‘ia faia ma le tonu;‘ia pule ma le mata‘u i le Atua;
4. e pei o le malamalama o le taeao ‘ina ‘ua alu a‘e le lā,o le taeao e leai ni ao uli;e pei o le vao mu‘a mai le ‘ele‘ele i le pupula mai mai le timuga.
5. E ui lava ‘ina lē fa‘apea lo‘u ‘āiga ma le Atua,a ‘ua na osi se feagaiga e fa‘avavau ma a‘u,o lo‘o saunia i mea uma lava,ma ‘ua tausia auā e ui lava ‘ona lē fa‘auluolaina e ia.‘Ona gata lea o lo‘u olataga,‘ona gata fo‘i lea o lo‘u mana‘o.
6. A o ē ulavavale, e pei o la‘au tuitui, ‘ua lafoa‘iina i latou uma lava;auā e lē tagofia i latou e lima.
7. A o le tagata na te tago i ai, e ao ‘ina i ai ‘iā te ia se u‘amea ma le fuata o le tao;e matuā susunuina i latou i le afi i lea lava mea.
8. O igoa nei o toa sa ‘iā Tavita; o lē nofo i le nofoa o le Takamoni, e sili o ia i le to‘atolu, o Atino lea le Asoni; na si‘i lona tao i le to‘avalu galau na fasiotia i le aso e tasi.
9. E aupito ane i ai o Eleasaro le atali‘i o Toto, le atali‘i o Aoki, sa i le ‘au toa e to‘atolu fa‘atasi ma Tavita, ‘ina ‘ua latou fāifai ‘iā Filisitia sa fa‘apotopotoina i lea mea i le tau‘a, a ‘ua ō a‘e tagata o Isaraelu;
10. o ia lava na tu ma fasi ‘iā Filisitia, ‘ua o‘o ‘ina ‘ua gase lona lima, ma ‘ua pipi‘i lona lima ma le pelu; ‘ua faia lava e le ALI‘I le fa‘aolataga tele i lea aso; ‘ua fo‘i atu le nu‘u o mulimuli ‘iā te ia na ona vete.
11. E aupito ane ‘iā te ia o Sama le atali‘i o Aka le Arari; sa fa‘apotopoto Filisitia i le ‘au, sa i ai le fasi fanua ‘ua lilo i atasema; na sōsōla ai le nu‘u i luma o Filisitia.
12. Na tu o ia i totonu o le fanua, ma na fa‘asaoina ai ma na fasi ‘iā Filisitia; ‘ua faia fo‘i e le ALI‘I le fa‘aolataga tele.
13. Na ō ifo fo‘i le to‘atolu mai le to‘atolugafulu o ē ‘ua sili, ‘ua o‘o atu i ona po o le seleselegāsaito ‘iā Tavita i le ana i Atulama; a ‘ua tolauapi le ‘au a Filisitia i le vanu o sa Rafā.
14. O ona po ia sa nofo ‘olo ai Tavita; a o le leoleoga o Filisitia sa i Peteleema ia.
15. ‘Ona mana‘o ai lea o Tavita, ‘ua fa‘apea, “Tā fia inu vai o le vai‘eli i Peteleema o lo‘o i le faitoto‘a!”
16. ‘Ona sofaia lea e nei toa e to‘atolu i le togālauapi a Filisitia, ma latou utu vai mai le vai‘eli i Peteleema ‘ua i le faitoto‘a; ‘ua ‘ava‘e ai ma ‘aumai ‘iā Tavita, a ‘ua lē mafai o ia ‘ona inu ai, a ‘ua liligi atu i le ALI‘I;
17. ‘ua fai ane o ia, “Le ALI‘I e, ‘ia mamao ‘iā te a‘u ‘ona faia o lenei mea; e lē o le toto ‘ea lenei o nei tagata, na latou ō tōa‘i i ai?” E lē mafai ‘iā te ia ‘ona inu ai.O mea ia na faia e nei toa e to‘atolu.
18. O Apisai fo‘i le uso o Ioapo, le tama a Seruia, o ia na sili i le to‘atolu; o ia fo‘i na si‘i lona tao i le to‘atolu galau na fasia e ia; sa ta‘ua o ia fa‘atasi ma le to‘atolu.
19. E lē na sili ‘ea ‘ona vi‘ia o ia i le to‘atolu? Sa fai ma ali‘i o ia ‘iā te i latou, a ‘ua lē aulia le mua‘i to‘atolu.
20. O Penaia fo‘i le atali‘i o Ioiata, le atali‘i o le tagata malosi mai Kapeseelu, na faia mea tetele; o ia na fasi i tagata o Moapi e fa‘amataleona e to‘alua; o ia fo‘i na alu ifo, ma fasi le leona i totonu o le lua i ona po o kiona.
21. O ia fo‘i na fasi le tagata Aikupito, o le tagata ‘aulelei; sa i le lima o le Aikupito le tao, na ia alu ifo ‘iā te ia ma le to‘oto‘o ma na se‘ia le tao a‘i le lima o le Aikupito, ma fasioti ‘iā te ia i lona lava tao.
22. O mea nei na faia e Penaia le atali‘i o Ioiata, sa ta‘ua fo‘i o ia fa‘atasi ma toa e to‘atolu;
23. e sili ‘ona vi‘ia o ia i le to‘atolu sefulu, ‘ae le‘i aulia le mua‘i to‘atolu; na tofia o ia e Tavita e pule i ē na fa‘afeao ‘iā te ia.
24. O Asaelu le uso o Ioapo, o so le to‘atolu sefulu o ia; o Eleana le atali‘i o Toto le Peteleema,
25. o Sama le Haroti, o Elika le Haroti,
26. o Helesa le Paleti, o Ira le atali‘i o Ikesa le Tikoa,
27. o Apieseru le Anatota, o Mepuna o lo le fānau a Usa,
28. o Salemoni le sa Aokī, o Maarai le sa Netopā,
29. o Helepa le atali‘i o Paana le sa Netopā, o Itai le atali‘i o Ripai le Kipea o le ‘a‘ai o le fānauga a Peniamina,
30. o Penaia le Piratonu, o Hitai mai vaitafe o Kaasa,
31. o Api-elepona le Arepa, o Asemau le Pa‘uma,
32. o Eliepa le Saalepo, o le tasi atali‘i o Iasanu, o Ionatana,
33. o Sama le Harari, o Aiamu le atali‘i o Saru le Arari,
34. o Elipelete le atali‘i o Asepai, le atali‘i o le Maakati, o Eliamu le atali‘i o Aitofele le Kilo,
35. o Heserai le Karamelu, o Pagarai le Arapa,
36. o Ikalo le atali‘i o Natano mai Sopa, o Pani le Kato,
37. o Seleka le Amoni, o Naarai le Perota le soātau o Ioapo le tama a Seruia,
38. o Ira le sa Ieterō, o Karepa le sa Ieterō,
39. o Uria le sa Hetī; o ona ‘ato‘atoa e to‘atolugafulu ma le to‘afitu.#