1. ‘Ua mavae nei mea ‘ona oti lea o le tupu o le fānauga a Amoni; ‘ona soloa‘i ane lea o Anuni lona atali‘i e fai ma tupu.
2. ‘Ona fai ane lea o Tavita, “‘Ou te agalelei atu ‘iā Anuni le atali‘i o Naasa, e pei ‘ona agalelei mai o lona tamā ‘iā te a‘u.” ‘Ona ‘a‘auina lea e Tavita o ana ‘au‘auna e fa‘amatalaloto ‘iā te ia ‘ona o lona tamā.‘Ua o‘o atu ‘au‘auna a Tavita i le nu‘u o le fānauga a Amoni.
3. ‘Ona fai atu lea o ali‘i o le fānauga a Amoni ‘iā Anuni lo latou ali‘i, “‘E te manatu ‘ea e āva mai Tavita i lou tamā; ‘ina ‘ua na ‘a‘auina mai nisi e fa‘amatalaloto ‘iā te oe? e lē o lea ‘ea ‘ua ‘a‘auina mai ai e Tavita o ana ‘au‘auna ‘iā te oe, ‘ina ‘ia va‘ava‘ai i le ‘a‘ai e agaga i ai, ma ia fa‘aumatia ai?”
4. ‘Ona pupu‘e atu lea e Anuni i ‘au‘auna a Tavita, ‘ua tafi fa‘aitutasi a latou ‘ava, ma na sesele ‘ese o latou ‘ofu i totonu e pau atu i o latou nofoaga; ‘ona ‘a‘au ‘ese atu lea e ia ‘iā te i latou.
5. ‘Ua ta‘u atu ‘iā Tavita, ‘ona ‘a‘auina atu lea e ia nisi e fa‘afetaia‘i ‘iā te i latou auā ‘ua tele lava le ma o ia tagata; ‘ua fai ane le tupu, “Nonofo ia i Ieriko: se‘ia tutupu a ‘outou ‘ava, i le tou fo‘i mai ai.”
6. ‘Ua iloa e le fānauga a Amoni ‘ua ‘inosia i latou e Tavita, ‘ona ‘auina atu lea e le fānauga a Amoni e fa‘aoloatau‘a ‘iā Suria o i Petereopo ma Suria o i Sopa, o tagata e lua sefulu o afe, o ‘au e sāvavali; ma tagata o le tupu o Maaka e tasi le afe ma tagata o Isetopa e sefulu afe ma afe e lua.
7. ‘Ua lagona e Tavita, ‘ona ‘a‘auina atu lea e ia ‘iā Ioapo ‘atoa ma ‘au uma o ē fitafita.
8. ‘Ua ō ane fo‘i le fānauga a Amoni, ma tofi le tau‘a i le faitoto‘a o le ‘a‘ai, a o Suria ma Sopa, ma Reopo, ma tagata o Isetopa, ma Maaka, ‘ua nofo ‘ese i latou i le vao.
9. ‘Ua iloa e Ioapo ‘ua fa‘asaga mai le tau‘a ‘iā te ia i luma ma tua, ‘ona filifili ai lea e ia o ē ‘ua fitafita uma i Isaraelu, ‘ua ia tofia fo‘i i latou ‘ia fa‘afesaga‘i ma Suria.
10. A o ē ‘ua totoe o le nu‘u, ‘ua ia tu‘u atu i latou i le pule a lona uso o Apisai, ‘ina ‘ia tofia i latou e ia e fa‘afesaga‘i ma le fānauga a Amoni.
11. ‘Ona fai atu ai lea o ia, “‘Āfai e mālō mai Suria ‘iā te a‘u, ‘e te fesoasoani mai ‘iā te a‘u; ‘ae ‘āfai e mālō mai le fānauga a Amoni ‘iā te oe, ‘ona ‘ou alu atu lea e fesoasoani ‘iā te oe.
12. ‘Ia e fa‘amalosi ma ‘ia tatou fa‘amalolosi mo lo tatou nu‘u ma ‘a‘ai a lo tatou Atua, a ‘ia faia e le ALI‘I le mea e finagalo i ai o ia.”
13. ‘Ona fa‘alatalata atu lea o Ioapo, ‘atoa ma le nu‘u sa ‘iā te ia, e tau ma Suria; ‘ona latou sōsōla ai lea ‘iā te ia.
14. ‘Ua va‘ai atu le fānauga a Amoni ‘ua sōsōla Suria, ‘ona latou sōsōla fo‘i lea a‘i luma o Apisai, ma latou ulu atu i le ‘a‘ai. ‘Ona fo‘i ai lea o Ioapo a‘i le tau‘a ma le fānauga a Amoni, ‘ua o‘o mai i Ierusalema.
15. ‘Ua iloa e Suria ‘ua fasia i latou e Isaraelu, ‘ona fa‘apotopoto fa‘atasi ai lea o i latou.
16. ‘Ona ‘a‘auina lea e Atatesa o le sāvali e fa‘ala‘ei‘au mai ‘iā Suria o ē i tala atu o le vaitafe; ‘ona latou ō mai lea i Ailama; o Sopaka fo‘i le pule i ‘au a Atatesa, na muamua o ia ‘iā te i latou.
17. ‘Ua ta‘u mai ‘iā Tavita, ‘ona fa‘apotopoto lea e ia o Isaraelu uma, ma sopo‘ia atu Ioritana, ‘ua o‘o atu i Ailama. ‘Ona tofia lea e Suria o le tau‘a e fa‘asaga mai ‘iā Tavita ma ‘ua latou tau ma ia.
18. ‘Ua sōsōla Suria i luma o Isaraelu; ‘ua fasioti fo‘i e Tavita o Suria o ē tau i kariota e fitu selau, ma le fa sefulu o afe o ē ti‘eti‘e i solofanua, ‘atoa ma Sopaka le pule ‘iā latou ‘au, ‘ua ia fasi ‘iā te ia, ‘ua oti i lea mea.
19. ‘Ua iloa e tupu uma e na ‘au‘auna ‘iā Atatesa, ‘ua fasia i latou e Isaraelu, ‘ona fa‘alelei lea o i latou ma Isaraelu, ma ‘au‘auna i ai; ‘ua fefefe fo‘i Suria e toe fesoasoani i le fānauga a Amoni.