1. ‘Ua toe aulia mai le tausaga, o ona po ia e ō atu ai o tupu, ‘ona ‘auina atu lea e Tavita ‘iā Ioapo, ma ana ‘au‘auna fa‘atasi ma ia, ‘atoa ma Isaraelu uma; ‘ona latou fa‘aumatia lea o le fānauga a Amoni, ma latou vagaia Rapa; a o Tavita sa nofo o ia i Ierusalema.
2. ‘Ua o‘o i le tasi afiafi ‘ua tula‘i Tavita a‘i lona moega, ‘ua fealua‘i i luga o le fale o le tupu; ‘ona ia iloa atu ai lea a‘i luga o le fale o le fafine o lo‘o tā‘ele o le fafine ‘ua matuā lālelei lava.
3. ‘Ona ‘au atu lea e Tavita se tasi e fesili po o ai le fafine. ‘Ua fai ane le tasi, “E lē o Patesepa ‘ea lenei, le afafine o Eliamo, le avā a Uria le sa Hetī?”
4. ‘Ua ‘a‘auina atu e Tavita o ‘au‘auna, ‘ua ‘a‘ami ‘iā te ia; ‘ona sau ai lea o ia ‘iā te ia; ‘ona la momoe lea ma ia; a o le fafine, na fa‘amamā o ia ‘iā te ia ai lona leaga, ‘ona fo‘i ai lea o ia i lona fale.
5. Sa tō ai le fafine, ‘ona ‘auina atu lea e ia se tasi e ta‘u atu ai ‘iā Tavita, ‘ua fa‘apea atu, “O a‘u nei ‘ua tō.”
6. ‘Ona ‘au atu lea e Tavita se tasi ‘iā Ioapo, ‘ua fa‘apea, “‘Ia e ‘auina mai Uria le sa Hetī ‘iā te a‘u.” ‘Ona ‘auina mai lea o Uria e Ioapo ‘iā Tavita.
7. ‘Ua sau Uria ‘iā te ia, ‘ona fesili lea o Tavita, po ‘ua saogalemū Ioapo, ma saogalemū le nu‘u, po ‘ua manuia fo‘i le tau‘a.
8. ‘Ona fai atu lea o Tavita ‘iā Uria, “‘Ia e alu ifo i lou fale ma mulumulu i ou vae.” ‘Ua alu atu Uria nai le fale o le tupu, ‘ua ia mulimuli atu ‘iā te ia le tasi ma mea fono mai le tupu.
9. A ‘ua ta‘oto Uria i le faitoto‘a o le fale o le tupu fa‘atasi ma ‘au‘auna uma a lona ali‘i, ‘ua lē alu ifo lava i lona fale.
10. ‘Ona latou ta‘u atu lea i ‘iā Tavita, ‘ua fa‘apea atu, “E le‘i alu ifo Uria i lona fale.” ‘Ua fai atu Tavita ‘iā Uria, “‘E te le‘i sau malaga ‘ea oe? Se a le mea ‘e te lē alu ifo ai lou fale?”
11. ‘Ona fai mai lea o Uria ‘iā Tavita, “O le ‘atola‘au ma Isaraelu, ‘atoa ma Iuta, o lo‘o nonofo i latou i fale apitaga; o le ali‘i fo‘i o Ioapo, ma ‘au‘auna a lo‘u ali‘i, o lo‘o i togālauapi i latou i le fogā‘ele‘ele; ‘ou te alu ‘ea a‘u i lo‘u fale, ‘ou te ‘ai ai ma inu, ma te momoe fo‘i ma la‘u avā? ‘Ua e soifua oe, ma ‘ua soifua lou agaga, ‘ou te lē faia lava lea mea.”
12. ‘Ua fai atu Tavita ‘iā Uria, “Nofo ia oe ‘i‘inei i lenei aso, fo‘i a taeao ‘ona ‘ou tu‘uina atu ai lea o oe e alu.” ‘Ona nofo lea o Uria i Ierusalema i lea aso ma le tasi aso.
13. ‘Ua vala‘au Tavita ‘iā te ia, ‘ona ‘ai lea o ia ma inu i ona luma, ma ‘ua na fa‘a‘onā ‘iā te ia. ‘Ona alu atu lea o ia i le afiafi, ‘ua ta‘oto i lona moega fa‘atasi ma ‘au‘auna a lona ali‘i, ‘ae le‘i alu ifo lava i lona fale.
14. ‘Ua o‘o i le taeao, ‘ona tusi lea e Tavita le tusi ‘iā Ioapo, ‘ua avatu e ‘ave e Uria.
15. ‘Ua ia tusi ai i le tusi, ‘ua fa‘apea, “‘Ia e i tu‘u atu ‘iā Uria ‘ia pito i luma i le vaega‘au, ‘ae tou tu‘umuli mai ‘iā te ia, ‘ina ‘ia fasia o ia ‘ia oti ai.”
16. ‘Ua o‘o ‘ina vagaia le ‘a‘ai e Ioapo, ‘ona ia tofia lea o Uria i le mea ‘ua na iloa o i ai tagata totoa.
17. ‘Ona ō mai lea o tagata o le ‘a‘ai, ‘ua latou tau ma Ioapo; ‘ua fasia nisi tagata o ‘au‘auna a Tavita; ‘ua oti ai fo‘i Uria le sa Hetī.
18. ‘Ona ‘auina atu lea e Ioapo le tasi, ‘ua ta‘u atu ai ‘iā Tavita i tala uma o le tau‘a.
19. ‘Ua ia fai atu fo‘i i le ‘ua ‘ave le fe‘au, ‘ua fa‘apea, “A e fa‘auma ‘ona tala atu i le tupu o tala uma o le tau‘a,
20. pe ‘āfai e to‘asā le tupu, ma fetalai mai ‘iā te oe, ‘Se a le mea na ‘outou fa‘alatalata atu ai i le ‘a‘ai ‘ina ‘ua ‘outou tau i ai? Na ‘outou lē iloa ‘ea latou te fanafana mai i luga o le ‘olo?
21. O ai ‘ea na fasia Apimeleko le atali‘i o Ierupese? e lē o le fafine ‘ea sa lafo i ona luga se fasi ma‘aolo a‘i luga o le ‘olo, ma fasioti ai ‘iā te ia i Tipesa? Po o le a lava le mea na ‘outou fa‘alatalata atu ai i le ‘olo?’ ‘Ona e fai atu lea, ‘‘Ua oti fo‘i lau ‘au‘auna o Uria le sa Hetī.’”
22. ‘Ona sau lea o lē na ‘auina ‘ua o‘o mai ma ta‘u ‘iā Tavita i mea uma na poloa‘i mai ai Ioapo ‘iā te ia.
23. ‘Ua fai mai lē na ‘auina ‘iā Tavita, “Na mālō mai le nu‘u ‘iā te i matou, ma latou ō mai ‘iā te i matou i le vao; a ‘ua matou tete‘e atu ‘iā te i latou ‘ua o‘o i le faitoto‘a o le ‘a‘ai;
24. a o ē fanafana na latou fanafana mai i luga o le ‘olo i au ‘au‘auna, ‘ua oti ai nisi ‘au‘auna a le tupu; ma lau ‘au‘auna o Uria le sa Hetī, ‘ua oti fo‘i o ia.”
25. ‘Ona fai atu lea o Tavita i lē na ‘auina mai, “‘Ia e fa‘apea atu ‘iā Ioapo, ‘‘Aua ‘e te fa‘avaivai i lenei mea, auā e ‘aina e le pelu e le fa‘ailogaina. ‘Ia e fa‘amalosi i lau tau‘a i le ‘a‘ai, ma e lepetia.’ ‘Ia fa‘amalosi ‘iā te ia.”
26. ‘Ua lagona e le avā a Uria, ‘ua oti Uria lana tane, ‘ona tagitu‘i ai lea o ia i lana ali‘i.
27. ‘Ua mavae le fa‘anoanoa, ‘ona fe‘au atu lea e Tavita, ‘ua ‘aumai o ia i lona fale, ‘ua fai māna avā, ‘ua fānau ai lona atali‘i. A ‘ua leaga i le ALI‘I le mea ‘ua faia e Tavita.#