Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24

Feagaiga Tuai

Feagaiga Fou

2 Samuelu 15 O LE TUSI PA'IA - Ekalesia Katoliko Roma (RSCB)

‘Ua Fōua le mālō e Apisaloma

1. ‘Ua mavae nei mea, ‘ona faia lea e Apisaloma lona nofoa fa‘ata‘avalevale, ma solofanua, ma tagata e to‘alimagafulu e taufetuli i ona luma.

2. ‘Ua usuusu Apisaloma, ma tu i le tasi itū ala o le faitoto‘a; ai se tasi ‘ua sau ma lana finauga i le tupu e fa‘amasino ai; ‘ona vala‘au lea o Apisaloma ‘iā te ia, ‘ua fa‘apea atu, “Mai le fea nu‘u ‘ea oe?” ‘Ona tali mai lea o ia, “Mai le tasi itū‘āiga o Isaraelu na sau ai lau ‘au‘auna.”

3. ‘Ona fai atu lea o Apisaloma ‘iā te ia, “Fa‘auta, ‘ua lelei au mea ma ‘ua tonu, ‘ae leai se tasi ‘ua tofia e le tupu e fa‘alogologo ‘iā te oe.”

4. ‘Ua fai ane fo‘i Apisaloma, “Tā fia fai ma fa‘amasino o le nu‘u; ‘ina ‘ia ō mai ‘iā te a‘u tagata e ta‘ito‘atasi uma ‘ua i ai se finauga po o se fa‘amasinoga, ‘ona ‘ou fa‘amasino tonu ai lea ‘iā te ia.”

5. A fa‘alatalata mai se tasi e ifo ‘iā te ia, ‘ona tu‘u atu lea e ia o lona lima, ma tago atu ‘iā te ia, ma sogi ‘iā te ia.

6. ‘Ua fa‘apenā ‘ona fai e Apisaloma ‘iā Isaraelu uma na ō ane i le fa‘amasinoga a le tupu; ‘ona fa‘aliliu lea ‘iā te ia e Apisaloma loto o tagata o Isaraelu.

7. ‘Ua mavae tausaga e fagafulu; ‘ona fai mai lea o Apisaloma i le tupu, “Se‘i ‘ou alu i Heperona e fa‘ataunu‘u ai la‘u tautoga, na ‘ou tautō atu ai i le ALI‘I.

8. Auā na matuā tautō lau ‘au‘auna ‘ina o ‘ou nofo i Kasuri i Suria, ‘ua fa‘apea, ‘Āfai e fa‘afoisia lava a‘u e le ALI‘I i Ierusalema, ‘ona ‘ou ‘au‘auna lea i le ALI‘I.”

9. ‘Ua fetalai atu le tupu ‘iā te ia, “Alu ia oe ma le manuia;” ‘ona tula‘i lea o ia, ‘ua alu i Heperona.

10. ‘Ona ‘a‘auina atu lea e Apisaloma i itū‘āiga uma o Isaraelu o ē tūutua, ‘ua fa‘apea, “Pe a ‘outou fa‘alogo i le leo o le pū, ‘ia ‘outou fai ane, o lo‘o ‘ua tupu Apisaloma i Heperona.”

11. ‘Ua ō gatasi ma Apisaloma tagata e to‘alua lau mai Ierusalema, o ē na togia, ‘ua latou ō ma le fa‘amaoni, latou te lē iloa se mea.

12. ‘Ona ‘a‘ami atu lea e Apisaloma ‘iā Aitofele le Kilo, le tulafale a Tavita mai lona nu‘u o Kilo, a o fai lana taulaga. ‘Ua tupu tele le fouvale, ma ‘ua fa‘ato‘ateleina pea le nu‘u ‘iā Apisaloma.

‘Ua Sola ‘ese Tavita mai Ierusalema

13. ‘Ona alu ane ai lea o le tasi, ‘ua ta‘u atu ‘iā Tavita, ‘ua fa‘apea, “O loto o tagata o Isaraelu o lo‘o mulimuli atu ‘iā Apisaloma.”

14. ‘Ona fai atu lea o Tavita i ana ‘au‘auna uma sa ‘iā te ia i Ierusalema, “Tutū ia, ‘inā tatou sōsōla, auā tatou te lē mau ‘alofaga i luma o Apisaloma; ‘ia tatou fa‘ata‘alise ‘ona o, ne‘i vave maua mai, ma fa‘ao‘o fa‘amalosi mai se mea leaga ‘iā i tatou, ma fasi le nu‘u nei i le pelu.”

15. ‘Ua fai mai ‘au‘auna a le tupu i le tupu, “O mea uma ‘ua finagalo i ai lo matou ali‘i le tupu, fa‘auta mai ‘ea, e faia e i matou au ‘au‘auna.”

16. ‘Ona ō atu lea o le tupu ‘atoa ma lona ‘āiga uma, o lo‘o mulimuli ‘iā te ia; a ‘ua tu‘ua e le tupu o fafine e to‘asefulu, o palake, latou te leoleo i le fale.

17. ‘Ua ō atu le tupu ma le nu‘u uma o mulimuli atu ‘iā te ia; ‘ua latou nonofo i le mea mamao.

18. O ana ‘au‘auna uma na latou ui ane i ona tafatafa, ‘atoa ma le ‘au Kereti uma, ma le ‘au Peleti uma, ma i latou uma mai Kata, o tagata e to‘aono galau o ē na mulimuli atu ‘iā te ia nai Kata, ‘ua ō ane i latou i luma o le tupu.

19. ‘Ona fai ane lea o le tupu ‘iā Itai le sa Katā, “O le a le mea e alu atu ai oe fa‘atasi ma i matou? Fo‘i ia, ma e nofo fa‘atasi ma le tupu; auā o le tagata ‘ese oe, ma āumau i le mea ‘e te nofo ai.

20. Na e sau ananafi; ‘e te fealua‘i solo ‘ea ‘ona o a‘u i le asō i lo tatou ō ma i matou? A o a‘u, ‘ou te so‘ona alu atu lava a‘u; fo‘i ia oe, tou te toe fo‘i ma ou uso, ‘ia ‘iā te oe le alofa ma le fa‘amaoni.”

21. ‘Ona tali mai lea o Itai i le tupu, ‘ua fa‘apea mai, “O lo‘o soifua le ALI‘I, ‘ua soifua fo‘i lo‘u ali‘i le tupu, o le mea e i ai lo‘u ali‘i le tupu, po o le oti po o le ola, e i ai lava lau ‘au‘auna.”

22. ‘Ona fetalai atu lea o Tavita ‘iā Itai, “Mo atu ia, ma e alu ane.” ‘Ona alu ane lea o Itai le sa Katā, ma ona tagata uma, ma tamaiti uma sa ‘iā te ia.

23. ‘Ua fētāgisi le nu‘u uma ‘ua leo tetele; ‘ua ō ane le nu‘u uma lava; ‘ua sopo‘ia atu fo‘i e le tupu le alia o Ketarono, ma le nu‘u uma ‘ua ō ane i latou i le ala i le vao.

24. Fa‘auta fo‘i, o Satoka ma sa Levī uma lava fa‘atasi ma ia, o lo‘o ‘ave le ‘atola‘au o le feagaiga a le Atua; ‘ua latou tu‘u i lalo le ‘atola‘au a le Atua, ‘ua alu a‘e fo‘i Aviata ‘ina se‘ia uma ‘ona ō ane o le nu‘u uma nai le ‘a‘ai.

25. ‘Ona fai mai lea o le tupu ‘iā Satoka, “‘Inā toe momoli ia le ‘atola‘au a le Atua i le ‘a‘ai; ‘āfai e alofagia a‘u e le ALI‘I, na te fa‘afoisia mai a‘u, ma fa‘ailoa mai ai ‘iā te a‘u, ‘atoa ma lona afio‘aga;

26. ‘ae ‘āfai o fa‘apea mai o ia, ‘‘Ou te lē fiafia ‘iā te oe; fa‘auta mai, o a‘u lenei ‘ia faia e ia ‘iā te a‘u e pei ‘ona finagalo i ai o ia.’”

27. ‘Ona fai ane lea o le tupu ‘iā Satoka le ositaulaga, “E lē o oe ‘ea le tagata va‘ai? Fo‘i atu ia i le ‘a‘ai ma le manuia; o ‘outou, ma Aimaasu lou atali‘i, ma Ionatana le atali‘i o Aviata, o ‘oulua atali‘i e to‘alua.

28. Fa‘auta, ‘ou te fa‘atalitali i le ‘ele‘ele laugatasi i le vao, se‘ia avatu se ‘upu mai ‘iā te ‘outou e fa‘aali mai ai ‘iā te a‘u.”

29. ‘Ona toe momoli lea e Satoka ma Aviata o le ‘atola‘au a le Atua i Ierusalema; ‘ua la nonofo ai.

30. ‘Ua alu a‘e Tavita i le mauga o Olive, o lo‘o alu a‘e ai ma tagi, ma lona ulu ‘ua ufitia; ‘ua alu a‘e lava o ia ‘ua lē fa‘ase‘evaeina; o le nu‘u uma fo‘i ‘ua ‘iā te ia, ‘ua ta‘itasi ma ufitia lona ulu, ‘ua latou ō a‘e ma fētāgisi fano.

31. Na ta‘ua ‘iā Tavita, ‘ua fa‘apea, o lo‘o i ai Aitofele i le fouvalega ma Apisaloma. ‘Ona fai ane lea o Tavita, “Le ALI‘I e, ‘ia e fa‘alēaogāina le pule a Aitofele.”

O Tavita ma Usai

32. ‘Ua o‘o atu Tavita i le tumutumu o le mauga, ‘ua ia ifo ai i le Atua; fa‘auta fo‘i, ‘ua fetaia‘i ma ia o Usai le Araki, ‘ua saeia lona ‘ofu, ma le ‘ele‘ele i lona ulu.

33. ‘Ona fai ane lea o Tavita ‘iā te ia, “‘Āfai tā te ō ma a‘u, e fai oe ma fa‘alavelave ‘iā te a‘u;

34. ‘ae ‘āfai ‘e te fo‘i atu i le ‘a‘ai, ma e fai atu ‘iā Apisaloma, ‘Le tupu e, o a‘u nei lau ‘au‘auna, na ‘ou ‘au‘auna i lou tamā anamua, a o lenei, ‘ou te ‘au‘auna ‘iā te oe;’ ‘ona e fa‘alēaogā lea o le pule a Aitofele mo a‘u.

35. E lē o i ai ‘ea ‘iā te oe o Satoka ma Aviata, o ositaulaga? O ‘upu uma ‘e te fa‘alogo ai i le fale o le tupu, ‘e te ta‘u atu ai ‘iā Satoka ma Aviata, o ositaulaga.

36. Fa‘auta, o lo‘o i ai ma i lā‘ua o la atali‘i e to‘alua, o Aimaasu le atali‘i o Satoka, ma Ionatana le atali‘i o Aviata, tou te avatu ‘iā te a‘u e i lā‘ua o ‘upu uma tou te fa‘alogo ai.”

37. ‘Ona alu lea o Usai le uō a Tavita i le ‘a‘ai; ‘ona sau ai lea o Apisaloma i Ierusalema.#