1. ‘Ona ta‘uina atu lea ‘iā Ioapo, “Fa‘auta, o lo‘o tagi ma fa‘anoanoa le tupu ‘iā Apisaloma.”
2. ‘Ona ‘avea lea o le manumālō i lea aso ma mea e fa‘anoanoa ai i le nu‘u uma; auā ‘ua fa‘alogo le nu‘u i lea aso, ‘ua fa‘apea, “‘Ua tigā le tupu ‘ona o lona atali‘i.”
3. ‘Ua ō fa‘agaoi le nu‘u i lea aso i le ‘a‘ai, e pei ‘ona e fa‘agaoi le nu‘u ‘ua māsiasi ‘ina ‘ua sōsōla i le tau‘a.
4. ‘Ua ufiufi e le tupu ona fofoga; ‘ua ‘alaga fo‘i le tupu ‘ua leo tele, “Lo‘u atali‘i Apisaloma e, Apisaloma lo‘u atali‘i e, lo‘u atali‘i e!”
5. ‘Ona ulufale atu lea o Ioapo i le tupu, ‘ua fai atu, “‘Ua e fa‘amāina i le aso nei o au ‘au‘auna uma lava, ē ‘ua lavea‘i ‘iā te oe i lenei aso, ma ou atali‘i, ‘atoa ma ou afafine, ma ou faletua, ma au palake,
6. ‘ina ‘ua e alofa i ē ‘ino‘ino ‘iā te oe, ma e ‘ino‘ino i ē alofa ‘iā te oe; auā ‘ua e fa‘aali mai i lenei aso, e leai sou manatu i ni ali‘i ma ‘au‘auna; auā ‘ua ‘ou iloa i lenei aso, ana ola Apisaloma, ‘ae oti i matou uma i le asō, po ‘ua lelei lea ‘iā te oe.
7. O lenei, tula‘i ia ma e maliu atu ma fa‘amatalaloto i au ‘au‘auna; auā ‘ou te tautō i le ALI‘I, ‘āfai ‘e te lē maliu atu, e leai se tasi lua te nonofo i le po nanei; e sili ‘ona leaga lea ‘iā te oe i mea leaga uma ‘ua o‘o ‘iā te oe talu ‘ona e taule‘ale‘a e o‘o i le aso nei.”
8. ‘Ona tula‘i lea o le tupu ma nofo i le faitoto‘a; ‘ua latou fa‘ailoa atu i le nu‘u uma, ‘ua fa‘apea, “Fa‘auta, o lo‘o nofo le tupu i le faitoto‘a,” ‘ona ō mai lea o le nu‘u uma i luma o le tupu. A o Isaraelu, ‘ua ta‘itasi ma sola i lona fale ‘ie.
9. Sa i ai i le nu‘u uma le finauga i itū‘āiga uma o Isaraelu, ‘ua fa‘apea, “Na lavea‘i le tupu ‘iā i tatou, a‘i lima o ē ita mai ‘iā i tatou, ‘ua lavea‘i fo‘i o ia ‘iā i tatou a‘i lima o Filisitia, a o lenei, ‘ua sola o ia a‘i le nu‘u ‘ona o Apisaloma;
10. o Apisaloma fo‘i na tatou fa‘au‘uina e pule ‘iā i tatou, ‘ua oti o ia i le tau‘a; o lenei o le a le mea tou te lē tautalatala ai e fa‘afoisia mai le tupu?”
11. ‘Ona ‘a‘auina atu lea nisi e Tavita le tupu ‘iā Satoka ma Aviata o ositaulaga, ‘ua fa‘apea, “Lua te tautala atu i toeaina o Iuta, ‘ia fa‘apea, ‘O le a le mea e tau mulimuli ai ‘outou ‘ona fa‘afoisia o le tupu i lona fale? auā ‘ua o‘o lava i le tupu i lona fale le fetalaiga a Isaraelu uma.
12. O‘u uso ‘outou, o‘u ivi ma o‘u ‘a‘ano lava ‘outou; o le a lava le mea e tau mulimuli ai ‘outou ‘ona fa‘afoisia o le tupu?’
13. Lua te fai atu fo‘i ‘iā Amase, ‘E lē o o‘u ivi ma o‘u ‘a‘ano lava oe. ‘Ia fa‘apea ‘ona faia o le Atua ‘iā te a‘u ma ia fa‘apea ‘ona fa‘aopoopo i ai, pe ‘āfai e lē fai oe ma pule i ‘au i o‘u luma i aso uma e sui a‘i Ioapo.’”
14. ‘Ua ia fa‘auai mai loto o tagata uma o Iuta pei o se tagata e to‘atasi; ‘ua latou fe‘au mai i le tupu, “‘Inā fo‘i mai ia oe ma au ‘au‘auna uma.”
15. ‘Ona toe fo‘i ai lea o le tupu, ‘ua o‘o i Ioritana; ‘ona ō mai lea o Iuta i Kilikala e fa‘afetaia‘i i le tupu, e sopo‘ia atu Ioritana ma le tupu.
16. ‘Ua fa‘ata‘alise Semi le atali‘i o Kira, le sa Peniaminā, le Pauri, ‘ona alu ifo lea o ia fa‘atasi ma tagata o Iuta e fa‘afetaia‘i ‘iā Tavita le tupu,
17. ma tagata e to‘aafe fa‘atasi ma ia mai Peniamina; ‘atoa ma Sipa le ‘au‘auna a le ‘āiga o Saulo, ma ona atali‘i e to‘asefulu ma le to‘alima, ma ana ‘au‘auna e to‘aluafulu fa‘atasi ma ia; ‘ua latou sopo‘ia atu Ioritana i luma o le tupu.
18. ‘Ua alu ane le va‘a e tautu‘u ai le ‘āiga o le tupu, ma fai mea ‘ua finagalo i ai o ia; ‘ona fa‘apa‘ū lea o Semi le atali‘i o Kira i luma o le tupu, ‘ina ‘ua sopo‘ia atu e ia Ioritana.
19. ‘Ua ia fai mai fo‘i i le tupu, “‘Aua le tauia mai la‘u agasala e lo‘u ali‘i; ‘aua le manatu fo‘i i le mea na agaleaga ai lau ‘au‘auna i le aso na afio mai ai lo‘u ali‘i le tupu mai Ierusalema ‘ina ne‘i fa‘alotoloto i ai o le tupu.
20. Auā ‘ua iloa e lau ‘au‘auna ‘ua ‘ou agasala lava a‘u; silasila mai fo‘i, ‘ua ‘ou sau, ‘ua ‘ou muamua mai i le ‘āiga o Iosefa uma lava, ‘ou te alu ifo e fa‘afetaia‘i i lo‘u ali‘i le tupu.”
21. ‘Ona tali ane ai lea o Apisai le tama a Seruia, ‘ua fa‘apea ane, “E lē o le mea lava lea ‘ea, o le a oti ai Semi? auā na ia fetu‘u i lē ‘ua fa‘au‘uina e le ALI‘I.”
22. ‘Ona fai atu lea o Tavita, “O le a ‘ea la ‘oulua na ‘iā te a‘u, o ‘oulua le fānau a Seruia? auā e fai ‘oulua ma ē fa‘alavelave mai ‘iā te a‘u i lenei aso; e fasiotia ‘ea se tasi i le aso nei i Isaraelu auā e lē ‘ua ‘ou iloa ‘ea, o a‘u lava le tupu o Isaraelu i le aso nei?”
23. ‘Ona fai atu lea o le tupu ‘iā Semi, “‘E te lē oti oe;” ‘ua tautō ai fo‘i le tupu ‘iā te ia.
24. ‘Ua alu ifo fo‘i Mefiposeta le atali‘i o Saulo e fa‘afetaia‘i i le tupu, na ia lē teua ona vae, ‘ua lē teua fo‘i lana ‘ava, ma ona ‘ofu ‘ua na lē taia talu mai le aso na alu atu ai le tupu, e o‘o i le aso na sau ai ma le filemū.
25. ‘Ua alu atu o ia i Ierusalema e fa‘afetaia‘i i le tupu; ‘ona fai atu lea o le tupu ‘iā te ia, “Mefiposeta e, se a le mea na tā lē ō ai ma a‘u?”
26. ‘Ua fai mai o ia, “Lo‘u ali‘i e le tupu, na pelogia a‘u e la‘u ‘au‘auna; auā na fai ane lau ‘au‘auna, ‘‘ou te fa‘anofoaina le asini mo a‘u, ‘ou te ti‘eti‘e ai, ma ‘ou alu atu i le tupu;’ auā ‘ua pipili la‘u ‘au‘auna.
27. ‘Ua tu‘ua‘iina fua lau ‘au‘auna i lo‘u ali‘i le tupu; ‘ae tusa lo‘u ali‘i le tupu ma se agelu a le Atua; o lenei, fai ia se mea ‘e te finagalo i ai;
28. auā sa leai se tasi i le ‘āiga uma o lo‘u tamā, na o tagata e tatau ‘ona oti i luma o lo‘u ali‘i le tupu, a ‘ua e tofia lau ‘au‘auna fa‘atasi ma ē ‘a‘ai i lau lava la‘o‘ai; se a sa‘u mea e toe tatau ai ‘ona ‘ou toe tagi atu ai i le tupu?”
29. ‘Ona fai atu lea o le tupu ‘iā te ia, “Se a le mea ‘e te toe fai mai ai i au mea? ‘ua ‘ou fai atu, o oe ma Sipa lua te vaeluaina le fanua.”
30. ‘Ua fai mai Mefiposeta i le tupu, “‘Ave pea ia mea uma lava ma ia; tau ‘ina ‘ua o‘o mai lo‘u ali‘i le tupu ma le manuia i lona fale.”
31. O Pasili fo‘i le Kiliata, ‘ua alu ifo o ia nai Rokeli; ‘ua la sopo‘ia atu Ioritana, ma le tupu ‘ina ‘ia momoli ‘iā te ia i Ioritana.
32. ‘Ua matuā toeaina lava Pasili, ‘ua valugafulu ona tausaga; o ia lava na fagaina le tupu ‘ina o nofo o ia i Maanaima, auā o le ali‘i tele lava o ia.
33. ‘Ona fai atu lea o le tupu ‘iā Pasili, “Tā te ō ma a‘u, tā te mafuta fa‘atasi ma a‘u i Ierusalema.”
34. A ‘ua fai mai Pasili i le tupu, “E fia ni aso o tausaga o lo‘u olaga o totoe, tā te ō a‘e ai ma oe le tupu i Ierusalema?
35. ‘Ua valugafulu o‘u tausaga i lenei aso; e iloa ‘ea e a‘u se lelei ma se leaga? e lagona ‘ea e lau ‘au‘auna ni a‘u mea e ‘ai ma ni a‘u mea e inu? ‘ou te toe lagona ‘ea le leo o tane pepese ma fafine pepese? Se a le mea e toe fa‘atigā ai lo‘u ali‘i le tupu e lau ‘au‘auna?
36. E momoli fa‘aitiiti atu e lau ‘au‘auna i le tupu i Ioritana; se a fo‘i le mea e taui mai ai e le tupu i lenā taui tele?
37. Se‘i toe fo‘i lau ‘au‘auna, se‘i ‘ou oti i lo‘u nu‘u e latalata ane i le tu‘ugamau o lo‘u tamā ma lo‘u tinā. Silasila fo‘i o lau ‘au‘auna o Kimeama, e alu atu o ia ma lo‘u ali‘i le tupu, ‘e te faia ‘iā te ia se mea ‘e te finagalo i ai.”
38. ‘Ona fai atu lea o le tupu, “Ma te ō atu ma Kimeama; ‘ou te faia fo‘i ‘iā te ia se mea ‘e te loto i ai; o mea uma fo‘i ‘e te fai mai ai ‘iā te a‘u ‘ou te faia lava mo oe.”
39. ‘Ona sopo‘ia atu lea e le nu‘u uma i Ioritana; ‘ua alu atu ai fo‘i le tupu, ‘ona feasogi lea o le tupu ma Pasili ma ‘ua fa‘amanuia ‘iā te ia; ‘ona toe fo‘i lea o ia i lona nu‘u.
40. ‘Ona alu atu lea o le tupu i Kilikala, o Kimeama fo‘i na la ō ma ia. O le nu‘u uma o Iuta na latou ō ma le tupu, ‘atoa ma le vaeluagalemū o le nu‘u o Isaraelu.
41. Fa‘auta fo‘i, o tagata uma o Isaraelu na ō mai i latou i le tupu, ‘ua latou fai mai i le tupu, “O le a le mea na fa‘agaoi ai ‘iā te oe e o matou uso, o tagata o Iuta ma ‘ua latou ‘aumai le tupu ma lona ‘āiga i Ioritana, ‘atoa ma tagata uma o Tavita fa‘atasi ma ia?”
42. ‘Ona tali atu lea o tagata uma o Iuta i tagata o Isaraelu, “Auā ma te ‘āiga ma le tupu; o le a le mea ‘e te ita ai i lenei mea? ‘Ua matou ‘aina ‘ea ni mea a le tupu? po ‘ua ‘aumai e ia se alofa ‘iā i matou?”
43. ‘Ona tali atu lea o tagata o Isaraelu i tagata o Iuta, ‘ua fa‘apea atu. “E sefulu ‘ou itū‘āiga i le tupu; e sili fo‘i Tavita ‘iā te a‘u, ‘ae itiiti ‘iā te oe. O le a lava le mea ‘ua e fa‘aletaualoa ai a‘u ma ‘ua lē mua‘i ta‘u mai ‘iā te a‘u, e fa‘afoisia mai lo‘u tupu?”‘Ua sili ‘ona mamafa le ‘upu a tagata o Iuta i le ‘upu a tagata o Isaraelu.#