1. Sa i ai le oge i le nofoa‘iga a Tavita i tausaga e tolu, na fa‘asoso‘o ia tausaga; ‘ona fesili ai lea o Tavita i le ALI‘I. ‘Ua fetalai mai le ALI‘I, “‘Ua tupu ai ‘ona o Saulo ma lona ‘āiga ‘ua totolima, ‘ina ‘ua na fasiotia tagata o Kipeona.”
2. ‘Ona ‘a‘ami lea e le tupu i tagata o Kipeona, ‘ua fai atu o ia ‘iā te i latou; (a o tagata o Kipeona e le ni fānauga a Isaraelu i latou, a o ē na totoe o sa Amorī, na fai ai le tautoga a le fānauga a Isaraelu ‘iā te i latou; a o Saulo, na ia sā‘ili e fasi ‘iā i latou i lona mā‘elegā ‘ona o le fānauga a Isaraelu ma Iuta);
3. ‘ua fai atu Tavita i tagata o Kipeona, “Se a se mea ‘ou te faia mo ‘outou? Se a fo‘i se mea ‘ou te togiola a‘i, ‘ina ‘ia ‘outou fa‘amanuia le tofi o le ALI‘I?”
4. ‘Ua fai mai tagata o Kipeona ‘iā te ia, “‘E te lē ‘aumaia ma matou ario po o auro mai ‘iā Saulo ma lona ‘āiga; e lē fasiotia fo‘i se tagata o Isaraelu ‘ona o i matou.”‘Ua fai atu o ia, “O le mea tou te fai mai ai, ‘ou te faia lava lea mo ‘outou.”
5. ‘Ona latou fai mai lea i le tupu, “O le tagata na fa‘aumatia i matou, ma na manatu leaga ‘iā i matou ‘ina ‘ia fa‘aumatia i matou, ‘ia lē nonofo i matou i le lau‘ele‘ele uma lava o Isaraelu;
6. tu‘u mai ia ‘iā te i matou tagata e to‘afitu a‘i lana fānau, matou te fa‘atautauina i latou i luma o le ALI‘I i Kipea o Saulo o lē na filifilia e le ALI‘I.”‘Ua fai atu le tupu, “‘Ou te avatua lava.”
7. A ‘ua fa‘asao e le tupu ‘iā Mefiposeta le atali‘i o Ionatana le atali‘i o Saulo, ‘ona o le tautō i le ALI‘I sa ‘iā te i lā‘ua o Tavita ‘atoa ma Ionatana le atali‘i o Saulo.
8. A ‘ua ‘ave e le tupu tama e to‘alua a Risepa le afafine o Aia, na ia fānau ‘iā Saulo, o Aremoni ma Mefiposeta; ma tama e to‘alima a Mekala le afafine o Saulo, na ia tausia ma Atarielu le atali‘i o Pasili le Malata;
9. na ia tu‘uina atu i latou i lima o tagata o Kipeona; ‘ona latou fa‘atautauina lea o i latou i le mauga i luma o le ALI‘I, ‘ua pa‘u‘ū fa‘atasi i latou e to‘afitu; na fasiotia fo‘i i latou i aso muamua o le seleselega i le amataga o le seleselega karite.
10. ‘Ona ‘ave lea e Risepa le afafine o Aia le ‘ie talatala, ma na fofola mo ia i le papa, e āfua mai i le amataga o le seleselega, ‘ua o‘o ‘ina maligi mai le vai mai le lagi ‘iā te i latou; ‘ua lē mafai ‘iā te ia ‘ona tu‘u ai o se manulele ‘iā te i latou i le ao, po o se manu fe‘ai i le po.
11. ‘Ua ta‘uina atu ‘iā Tavita le mea na faia e Risepa le afafine o Aia le palake a Saulo;
12. ‘ona alu atu lea o Tavita, ‘ua na ‘avea ivi o Saulo ma ivi o Ionatana lona atali‘i mai tagata o Iapese-Kiliata, na latou gaoia nai le malae o Petesani, na fa‘atautauina ai i lea mea le Filisitia i ona po na fasia ai Saulo e Filisitia i Kilepoa.
13. ‘Ua ia ‘ava‘e nai lea mea o ivi o Saulo ma ivi o Ionatana lona atali‘i, ‘ina ‘ua fa‘atasi ai ivi o ē na fa‘atautauina.
14. ‘Ua latou tanumia ivi o Saulo ma Ionatana lona atali‘i i le lau‘ele‘ele o Peniamina i Sela, i le tu‘ugamau o Kiso lona tamā; ma latou faia mea uma na poloa‘i ai le tupu; ‘ona fa‘afofoga lea o le Atua i le tatalo mo le lau‘ele‘ele, ‘ina ‘ua uma ia mea.
15. ‘Ona toe tau lea o le tau‘a a Filisitia ma Isaraelu, ‘ua alu ifo ai Tavita ma ana ‘au‘auna, fa‘atasi ma ia, ‘ua latou tau ma Filisitia; ‘ona vaivai ai lea o Tavita.
16. O Isepenopa fo‘i, o so le fānau a Rafa, o le mamafa o lona tao e tolu selau o sekeli o ‘apamemea, o ia ‘ua fusia i le pelu fou, na fa‘apea a ia, na te fasia Tavita.
17. ‘Ona fesoasoani lea ‘iā te ia o Apisai le tama a Seruia, ma na taia le Filisitia, ma fasiotia o ia. ‘Ona tautō ai lea o tagata o Tavita ‘iā te ia, ‘ua fa‘apea, “‘E te lē toe maliu atu ma i matou i le tau‘a, ‘ina ne‘i tineia le malamalama o Isaraelu.”
18. Mulimuli ane i nei mea, ‘ua toe tau le tau‘a ma Filisitia i Kopa; ‘ona fasia lea e Sepekai le sa Usā, o Sapa o so le fānau Rafa.
19. ‘Ona toe tau lea o le tau‘a ma Filisitia i Kopa; ‘ona fasia lea e Eleana le atali‘i o Ari-oreki le Peteleema, o le uso o Koliata le Kata; o le fuata o lona tao ‘ua pei se la‘au fa‘alava o lē lalaga ‘ie.
20. ‘Ua toe tau le tau‘a i Kata; sa i ai le tagata maualuga, o ona tamatama‘i lima ma ona, tamatama‘i vae ‘ua ta‘iono, e lua sefulu ma le fa ‘ona ‘ato‘atoa; o ia fo‘i o le atali‘i o le sa Rafā.
21. ‘Ua ia fāifai ‘iā Isaraelu, ‘ona fasia lea o ia e Ionatana le atali‘i o Sama le uso o Tavita.
22. O i latou nei e to‘afa na fānau ‘iā Rafa i Kata; ‘ua oti i latou i le lima o Tavita ma lima o ana ‘au‘auna.