1. Sa so‘ona alu ane i ai le tagata ulavale, o Sepa lona igoa, o le atali‘i o Pikeri, o le sa Peniaminā, ‘ua ili e ia le pū, ma fai atu,“E lē ‘aiā Tavita ‘iā i matou;e lē so matou tofi fo‘i le atali‘i o Iese;Isaraelu e, ‘ia ta‘itasi ma alu i lona fale ‘ie.”
2. ‘Ona ō a‘e lea o tagata uma o Isaraelu nai ‘iā Tavita, ‘ua mulimuli atu ‘iā Sepa le atali‘i o Pikeri; a o tagata o Iuta ‘ua pipi‘i pea i latou i lo latou tupu, e fua mai i Ioritana e o‘o atu i Ierusalema.
3. ‘Ona ulu atu lea o Tavita i lona fale i Ierusalema; na ‘ave e le tupu i Palake e to‘asefulu, ‘ua ia tu‘ua e leleo i le fale, ‘ua tu‘u atu i latou i le fale e tausi ai ma na fafaga ‘iā i latou, ‘ae le‘i alu atu o ia ‘iā te i latou; sa i ai ‘ua puipuia i latou, ‘ua o‘o i le aso na oti ai, ‘ua nofo fua.
4. ‘Ona fai atu lea o le tupu ‘iā Amase, “‘Ia e fa‘apotopotoina mai ‘iā te a‘u tagata o Iuta i e tolū, i le e sau ai fo‘i ‘i‘inei.”
5. ‘Ona alu atu lea o Amase e fa‘apotopoto ‘iā Iuta, a ‘ua silia aso na ‘atofa ‘iā te ia.
6. ‘Ona fai atu lea o Tavita ‘iā Apisai, “‘Anei e sili le leaga e faia e Sepa le atali‘i o Pikeri ‘iā i tatou, i le leaga na faia e Apisaloma; tou te ō, o oe, ma ‘au‘auna a lou ali‘i, ma ‘outou tuliloa ‘iā te ia, ‘ina ne‘i maua e ia ‘a‘ai e nofo ‘olo ma sola ‘ese ‘iā te i tatou.”
7. ‘Ona mulimuli atu lea ‘iā te ia o tagata o Ioapo ma le ‘au Kereti, ma le ‘au Peleti, ma ē fitafita uma lava; ‘ua latou ō atu nai Ierusalema e tuliloa ‘iā Sepa le atali‘i o Pikeri.
8. Sa i ai i latou i le ma‘a tele ‘ua i Kipeona, ‘ona sau lea o Amase i o latou luma. Sa fusia le ‘ofu talaloa a Ioapo, sa fusi fo‘i ‘iā te ia lana pelu, ‘ua nonoa i lona sulugātiti i lona fa‘amoega; ‘ua alu ane o ia, ‘ona pa‘ū ai lea o le pelu.
9. ‘Ua fai atu Ioapo ‘iā Amase. “Lo‘u uso e, o e mālōlō ‘ea?” ‘Ona tago atu lea o le lima taumatau o Ioapo i le ‘ava a Amase e feasogi ma ia.
10. A o Amase, ‘ua lē manatu o ia i le pelu sa i le lima o Ioapo, ‘ona tutu‘i ai lea e ia ‘iā te ia i le manava, ‘ona masa‘a ai lea lona ga‘au i le ‘ele‘ele, ‘ua lē tutu‘i fa‘alua ‘iā te ia, ‘ona oti ai lea o ia.‘Ona tuliloa lea e Ioapo ma Apisai lona uso ‘iā Sepa le atali‘i o Pikeri.
11. ‘Ona tu ai lea i ona luga o le tasi tagata o le ‘au taulele‘a a Ioapo, ‘ua fa‘apea ane, “O ai se ‘au ma Ioapo? o ai fo‘i le ‘au ma Tavita? ‘ia mulimuli atu o ia ‘iā Ioapo.”
12. ‘Ua liloia Amase i le toto i le moa o le ala tele; ‘ua va‘ai atu le tagata ‘ua laulaututū ai o le nu‘u uma, ‘ona ‘ave ‘ese ai lea e ia ‘iā Amase nai le ala tele i le vao, ma lafo se ‘ofu i ona luga, ‘ina ‘ua iloa e ia ‘ua laulaututū i latou uma ‘ina ‘ua o‘o i ai.
13. ‘Ua uma ‘ona ‘ave‘esea o ia a‘i le ala tele ‘ona ō atu lea o le nu‘u uma, ‘ua mulimuli ‘iā Ioapo e tuliloa ‘iā Sepa le atali‘i o Pikeri.
14. ‘Ua ia ui ane i itū‘āiga uma o Isaraelu ‘ua o‘o i Apela o Petemaaka fo‘i ma tagata o Pairi uma lava; ‘ua latou fa‘apotopoto fo‘i ma mulimuli atu ‘iā te ia.
15. ‘Ona latou ō atu lea, ma vagaia o ia i Apela Petemaaka; ‘ua tanu ai le mea mauti‘eti‘e e lata ane i le ‘a‘ai ‘ua tu ai i le utu; o le nu‘u uma fo‘i sa ‘iā Ioapo ‘ua taulepeti, ‘ina ‘ia lafotūina le pā.
16. ‘Ona vala‘au lea o le tasi fafine poto nai totonu o le ‘a‘ai, “Fa‘alogo mai, fa‘alogo mai ia ‘outou; ‘se‘i ‘outou fai atu ‘iā Ioapo, ‘ia fa‘alatalata mai o ia ‘i‘inei ma te tautala ma ia.’”
17. ‘Ona fa‘alatalata atu lea o ia ‘iā te ia, ‘ua fai mai le fafine, “O oe ‘ea o Ioapo?”‘Ona tali atu lea o ia, “O a‘u lenei.”‘Ua fai mai o ia ‘iā te ia, “Fa‘afofoga mai ia i ‘upu a lau ‘au‘auna fafine.”‘Ua fai mai o ia, “‘Ou te fa‘alogo atu ai lava.”
18. ‘Ona fai mai lea o ia, ‘ua fa‘apea, “Sa fa‘apea a latou ‘upu anamua, ‘Latou te fesili lava i Apela;’ ‘ona latou tu‘u ai lea fa‘apea.
19. O a‘u nei o so latou e filemū ma fa‘amaoni i Isaraelu; o lo‘o e sā‘ili e fasioti le tasi nu‘u ma le tasi tinā i Isaraelu; se a le mea ‘e te fa‘aumatia ai le tofi o le ALI‘I?”
20. ‘Ua tali atu Ioapo, ‘ua fa‘apea atu, “‘Ia mamao, mamao lava lea ‘iā te a‘u ‘ona ‘ou fa‘aumatia, pe fa‘atafunaina.
21. E lē fa‘apea se mea, a o le tamaloa mai le mauga o Efaraima, o Sepa le atali‘i o Pikeri lona igoa, ‘ua ia fouvale i le tupu o Tavita; tu‘u mai ia na o ia lava ‘ona ‘ou alu ‘ese ai lea i le ‘a‘ai.”‘Ua fai mai le fafine ‘iā Ioapo, “Fa‘auta, o le a lafo atu lona ulu ‘iā te oe i tuāpā.”
22. ‘Ona alu atu lea o le fafine ma lona poto i le nu‘u uma; ‘ona latou vavae lea o le ulu o Sepa le atali‘i o Pikeri, ma lafo atu ‘iā Ioapo; ‘ona ili ai lea e ia o le pū, ‘ona latou ta‘ape‘ape ai lea nai le ‘a‘ai, ‘ua ta‘itasi ma alu i lona fale ‘ie, a o Ioapo, ‘ua fo‘i ia i Ierusalema i le tupu.
23. Sa pule Ioapo i ‘au uma lava a Isaraelu; a o Penaia le atali‘i o Ioiata sa pule o ia i le ‘au Kereti ma le ‘au Peleti;
24. o Aturamo sa pule o ia le taulaga ma Iosefatu le atali‘i o Ailuta, o le fātua‘iupu o ia;
25. o Seva o le tusi‘upu o ia; o Satoka ma Aviata, o ositaulaga i lā‘ua;
26. o Ira fo‘i le Iairo, sa fai ma faipule o ia a Tavita.#