1. ‘Ua toe tupu le to‘asā o le ALI‘I ‘iā Isaraelu; ‘ona ia fa‘aalu atu lea ‘iā Tavita ‘iā te i latou, ‘ua fa‘apea, “Alu ia, ‘inā faitau ‘iā Isaraelu ma Iuta.”
2. ‘Ua fai ane le tupu ‘iā Ioapo lē pule i ‘au sa ‘iā te ia, “‘Ia e fealua‘i i itū‘āiga uma o Isaraelu, e pau mai i Tanu, e pau mai i Peresepa, ma faitau le nu‘u, ‘ina ‘ia ‘ou iloa lona ‘atoa o le nu‘u.”
3. ‘Ua fai mai Ioapo i le tupu, “‘Ia fa‘aopoopoina e le ALI‘I lou Atua i le nu‘u, e tusa ma i latou lava ‘ia ta‘isautuaselau, ma ia silasila i ai fofoga o lo‘u ali‘i le tupu; ‘ae peita‘i po o le a le mea ‘ua finagalo ai lo‘u ali‘i le tupu i lenei mea?”
4. A ‘ua tu‘u faia‘ina Ioapo ma ē pule i ‘au i le fetalaiga a le tupu; ‘ona alu atu lea o Ioapo ma ē pule i ‘au nai luma o le tupu e faitau i le nu‘u o Isaraelu.
5. ‘Ua latou sopo‘ia atu Ioritana, ‘ua tolauapi i Aroeru i le itū i saute o le ‘a‘ai, o lo‘o i le moa o le alia o Kato, e feagai ma Iasaru.
6. ‘Ona o‘o lea i latou i Kiliata ma le nu‘u o Tateatesa; ‘ona latou o‘o atu lea i Tanu-iana ma fa‘ata‘amilo ai i Saitonu.
7. ‘Ona latou o‘o lea i le ‘olo o Turo, ma ‘a‘ai uma o sa Hevī ma sa Kananā; ‘ona latou ō atu lea i le itū i saute o Iuta i Peresepa.
8. ‘Ua latou feoa‘i i le nu‘u uma lava; ‘ua uma masina e iva ma aso e luafulu, ‘ona o‘o mai lea o i latou i Ierusalema.
9. ‘Ona avatu lea e Ioapo le tau aofa‘i o le nu‘u i le tupu; sa i Isaraelu o valu selau o afe o tagata malolosi ē na fai pelu; a o tagata o Iuta ‘ua lima selau o afe i latou.
10. ‘Ona tuia lea o le loto o Tavita ‘ina ‘ua uma ‘ona faitauina o le nu‘u; ‘ua fai ane Tavita i le ALI‘I, “‘Ua ‘ou matuā agasala lava i le mea ‘ua ‘ou faia; o lenei, le ALI‘I e, ‘ia e fa‘amāgaloina lau ‘au‘auna a‘i la‘u amioletonu, auā ‘ua ‘ou matuā fa‘avalea.”
11. ‘Ona tula‘i lea o Tavita i le taeao; ‘ua o‘o mai le afioga a le ALI‘I ‘iā Kato le perofeta i le tagata va‘ai a Tavita, ‘ua fa‘apea,
12. “Alu ia ma fai atu ‘iā Tavita: O lo‘o fa‘apea ‘ona fetalai mai o le ALI‘I: E tolu mea ‘ou te tu‘uina atu ‘iā te oe; ‘e te filifili se mea e tasi o ia mea ‘ou te faia lava ‘iā te oe.”
13. ‘Ona alu atu lea o Kato ‘iā Tavita ma ta‘u atu ai ‘iā te ia, ‘ua fa‘apea atu ‘iā te ia, “‘Ou te fa‘ao‘oina mai ‘ea ‘iā te oe le oge e fitu tausaga i lou lau‘ele‘ele; pe tolu ni masina ‘e te sola ai i luma o ē ita mai, o tuliloa i latou ‘iā te oe; pe tolu aso o le fa‘ama‘i i lou nu‘u?” o lenei, ‘ia e silasila ma e iloa, se a se ‘upu ‘ou te fo‘i ma a‘u i lē na ‘auina mai a‘u.
14. ‘Ua fai mai Tavita ‘iā Kato, “‘Ua ‘ou matuā femēmēa‘i lava; ‘ia ‘ou pa‘ū atu i le ‘a‘ao o le ALI‘I, auā e tele lona alofa mutimutivale ‘ae ‘aua ‘ou te pa‘ū i lima o tagata.”
15. ‘Ona tu‘u mai lea e le ALI‘I le fa‘ama‘i ‘iā Isaraelu, e āfua mai i le taeao, e o‘o i le aso na ‘atofa na oti ai le nu‘u, e pau mai i Tanu, e pau mai i Peresepa e fitu sefulu o afe o tagata.
16. ‘Ona fa‘aloaloa atu lea e le agelu o lona lima i Ierusalema ‘ina ‘ia fa‘aumatia ai; ‘ona salamō ai lea o le ALI‘I ‘ona o le malaia ma ‘ua fetalai ane i le agelu na fa‘aumatia ai le nu‘u, “Sōia;” o lenei, tāofi ia o lou lima. Sa lata ane le agelu a le ALI‘I i le mea e soli ai saito a Aruna le sa Iepusē.
17. ‘Ua fai atu Tavita i le ALI‘I, ‘ina ‘ua na iloa le agelu na fasia le nu‘u, ‘ua fa‘apea atu, “Silasila mai, o a‘u nei lava le agasala, o a‘u fo‘i le amioletonu; a o nei mamoe, se a se mea ‘ua latou faia? ‘Ia o‘o mai lou ‘a‘ao ‘iā te a‘u ma le ‘āiga o lo‘u tamā.”
18. ‘Ona alu ane lea o Kato ‘iā Tavita i lea aso; ‘ua fai mai ‘iā te ia, “‘Ia e maliu a‘e ma e faia se fatafaitaulaga i le ALI‘I i le mea e soli ai saito a Aruna le sa Iepusē.”
19. ‘Ona alu a‘e lea o Tavita, e pei ‘ona fai mai ai Kato e tusa ma le poloa‘iga a le ALI‘I.
20. ‘Ona va‘ava‘ai mai ai lea o Aruna, ‘ua na iloa atu le tupu ma ana ‘au‘auna o lo‘o ō a‘e ‘iā te ia; ‘ona alu atu lea o Aruna, ‘ua ifo to‘ele i le tupu.
21. ‘Ua fai mai Aruna, “O le a le mea ‘ua maliu mai ai lo‘u ali‘i le tupu i lana ‘au‘auna?”‘Ona fai atu lea o Tavita, “‘Ou te sau e fa‘atau mai ‘iā te oe le mea e soli ai saito, e fai ai se fatafaitaulaga i le ALI‘I, ‘ina ‘ia tāofia le fa‘ama‘i a‘i le nu‘u.”
22. ‘Ona fai mai lea o Aruna ‘iā Tavita, “‘Ave pea ia ma ‘ia fai ai taulaga e lo‘u ali‘i le tupu i mea ‘ua e finagalo i ai; silasila mai ia, o povi ia e fai a‘i taulaga mū ma mea e soli a‘i saito, ‘atoa ma amo a povi e fai ma fafie.
23. O mea uma nei na foa‘i mai e Aruna le tupu i le tupu.” ‘Ua fai mai fo‘i Aruna i le tupu, “‘Ia finagalo alofa mai le ALI‘I lou Atua ‘iā te oe.”
24. ‘Ona fai atu lea o le tupu ‘iā Aruna, “‘Aua lava; ‘ou te fa‘atau mai pea ‘iā te oe i le tau; ‘ou te lē fai taulaga i le ALI‘I lo‘u Atua i taulaga maua fua.” ‘Ona fa‘atau mai lea e Tavita le mea e soli ai saito, ‘atoa ma povi i sekeli ario e limagafulu.
25. ‘Ona faia lea e Tavita i lea mea o le fatafaitaulaga i le ALI‘I; ‘ua fai ai taulaga mū ma taulaga fa‘afetai. ‘Ona fa‘afofoga lea o le ALI‘I i le tatalo mo le nu‘u ma na tāofia le fa‘ama‘i ‘iā Isaraelu.#