1. Du skal laga eit altar av akasietre. Det skal vera fem alner langt, fem alner breitt, firkanta og tre alner høgt.
2. På kvart av dei fire hjørna skal du laga eit horn, og horna skal gå i eitt med altaret. Du skal kle det med bronse.
3. Så skal du laga fata som den feite oska skal berast bort i, og eldskuflene, offerskålene, kjøtgaflane og glopannene. Alle desse reiskapane skal du laga av bronse.
4. Du skal òg laga eit gitter til altaret, eit flettverk av bronse. På flettverket skal du laga fire bronseringar, ein på kvart hjørne.
5. Gitteret skal du setja nedst, under altarlista, så det når midt opp på altaret.
6. Du skal laga stenger til altaret. Dei skal vera av akasietre, og du skal kle dei med bronse.
7. Stengene skal smøyast inn i ringane, så dei sit på begge sider av altaret når det vert bore.
8. Altaret skal du laga av bord, og det skal vera holt. Som det vart synt deg på fjellet, så skal det gjerast.
9. Du skal laga ein føregard kring heilagdomen. På sørsida av føregarden skal det vera eit omheng av fint, tvinna lingarn. Det skal vera hundre alner langt på denne sida.
10. Til omhenget skal det vera tjue stolpar med fotstykke av bronse og hakar og stenger av sølv.
11. Like eins skal det på nordre langsida vera eit omheng som er hundre alner langt. Til det skal det vera tjue stolpar med fotstykke av bronse og hakar og stenger av sølv.
12. På den eine tverrsida av føregarden, mot vest, skal det vera eit omheng på femti alner. Til det skal det vera ti stolpar med fotstykke.
13. Den andre tverrsida av føregarden, framsida som vender mot aust, skal vera femti alner.
14. Her skal det vera femten alner omheng på den eine kanten, med tre stolpar og tre fotstykke,
15. og på den andre kanten femten alner omheng med tre stolpar og tre fotstykke.
16. I porten til føregarden skal det vera eit forheng av fiolett, purpurraud og karmosinraud ull og fint, tvinna lingarn. Det skal vera tjue alner langt og vove i mange leter. Til forhenget skal det vera fire stolpar med fotstykke.
17. Alle stolpane kring føregarden skal vera bundne i hop med sølvstenger. Hakane på stolpane skal vera av sølv og fotstykka av bronse.
18. Føregarden skal vera hundre alner lang, femti alner brei og fem alner høg. Omhenget skal vera av fint, tvinna lingarn og fotstykka av bronse.
19. Alle reiskapane som skal brukast til tenesta i heilagdomen, og alle pluggane, både til teltet og føregarden, skal vera av bronse.
20. Sei til israelittane at dei skal gje deg rein olje av knust oliven til ljosestaken, så det kan setjast opp lamper til kvar tid.
21. I møteteltet, utanfor forhenget som er framfor lova, skal Aron og sønene hans stella lampene, så dei kan brenna for Herrens åsyn frå kveld til morgon. Det skal vera ei evig lov for israelittane i ætt etter ætt.