1. ‘Ua fa‘alogo le tupu fafine o Seepa i le tala ‘iā Solomona, ‘ona sau ai lea o ia i Ierusalema e tofotofo ‘iā Solomona i ‘upu faigatā, sa ‘iā te ia le ‘au malaga e matuā to‘atele ma kamela o ‘aumai ai mea manogi ma auro e matuā tele ma ma‘a tāua; na sau o ia ‘iā Solomona, ‘ona la tautalatala ai lea ma ia i mea uma na i ai i lona loto.
2. ‘Ua fa‘amatalaina atu fo‘i e Solomona ‘iā te ia o ana ‘upu uma; ‘ua leai se mea e lilo ‘iā Solomona na ia le ta‘u atu ‘iā te ia.
3. ‘Ua iloa e le tupu fafine o Seepa o le poto o Solomona ma le fale ‘ua na faia,
4. ma mea e ‘ai o i lana laulau ma ona nonofo o ana ‘au‘auna ma le tutū o ana tautua ma o latou ‘ofu; o ana tautū uaina fo‘i ma o latou ‘ofu ma le ala na ia alu a‘e ai i le fale o le ALI‘I; ‘ona lē toe i ai lea o se loto ‘iā te ia.
5. ‘Ona fa‘apea mai lea o ia i le tupu, “‘Ua moni le tala na ‘ou fa‘alogo ai i lo‘u nu‘u i au afioga ma lou poto;
6. ‘ae peita‘i na ‘ou lē talia a latou tala, ‘ina se‘ia ‘ou sau ma va‘ava‘ai i ai o‘u mata. Fa‘auta fo‘i, e itiiti mea na talaina atu ‘iā te a‘u, ‘ae tele mea na lē talaina atu i le tele o lou poto; auā e sili lava oe i le tala na ‘ou fa‘alogo ai.
7. ‘Amu‘ia ou tagata, ‘amu‘ia fo‘i au ‘au‘auna nei, o ē tutū i ou luma e lē aunoa ma fa‘alogo i lou poto.
8. ‘Ia fa‘afetaia le ALI‘I lou Atua, o lē na finagalo ‘iā te oe, e fa‘anofo ‘iā te oe i lona nofoāli‘i, e fai ma tupu mo le ALI‘I lou Atua; auā na alofa lou Atua ‘iā Isaraelu e fa‘atumauina i latou e fa‘avavau, o le mea lea ‘ua ia fai ai oe ma tupu ‘iā te i latou, ‘ina ‘ia e faia fa‘amasinoga ma mea tonu.”
9. ‘Ona foa‘i mai lea e ia i le tupu o auro e tasi le selau ma le luafulu o taleni ma mea manogi e matuā tele lava, ‘atoa ma ma‘a tāua; ‘ua leai fo‘i ni mea manogi e tusa ma mea na foa‘iina mai e le tupu fafine o Seepa i le tupu o Solomona.
10. O ‘au‘auna fo‘i a Hiramo ma ‘au‘auna a Solomona, o ē na ‘aumai auro mai Ofeira, ‘ua latou ‘aumai la‘au o alemuka ma ma‘a tāua.
11. ‘Ua faia e le tupu o ala i le fale o le ALI‘I ma le fale o le tupu ma kitara ma napeli mo le ‘au pepese i la‘au o alemuka; ‘ua lē iloa i le nu‘u o Iuta talu anamua ni la‘au fa‘apenā.
12. ‘Ona foa‘i atu lea e le tupu o Solomona i le tupu fafine o Seepa o mea uma na ia finagalo ma fa‘atoga i ai, e fa‘aopoopo i mea na ‘aumaia e ia i le tupu. ‘Ona fo‘i atu ai lea o ia ma alu atu i lona nu‘u, o ia ma ana ‘au‘auna.
13. O le fua o le mamafa o auro na ‘aumaia ‘iā Solomona i tausaga ta‘itasi, o taleni o auro e ono selau ma le onogafulu ma le ono;
14. ‘atoa fo‘i ma auro na ‘aumaia e i latou na feoa‘i e fa‘atau, ‘atoa ma fa‘atau‘oa. O tupu uma fo‘i o Arapi ma ali‘i e pule i le nu‘u na ‘aumai auro ma ario ‘iā Solomona.
15. ‘Ona faia lea e le tupu o Solomona o talipupuni e lua selau i auro ‘ua fa‘asalalafaina; e ta‘iono selau o sekeli auro ‘ua fa‘asalalafaina i talipupuni;
16. ma talitā e tolu selau i auro ‘ua fa‘asalalafaina; e ta‘itolu selau o sekeli auro i talitā. ‘Ua tu‘uina atu ai e le tupu i le fale o le vao o Lepanona.
17. ‘Ua faia fo‘i e le tupu le nofoāli‘i tele i nifo o elefane, ‘ua ia ufitia ai fo‘i i le auro lelei.
18. E ono tulagāvae fa‘a‘apefa‘i e alu a‘e ai i le nofoāli‘i ma le mea auro e tu ai ona vae ‘ua fa‘amauina i le nofoāli‘i; sa i ai mea e fa‘alagolago i ai i itū ta‘itasi o le mea e ti‘eti‘e ai; na tutū fo‘i leona e lua i tafatafa o mea e fa‘alagolago i ai.
19. Sa tutū ai fo‘i leona e sefulu ma le lua i lea itū ma lea itū o tulagāvae fa‘a‘apefa‘i e ono; e leai se mea fa‘apea e faia i se tasi mālō.
20. O ipu inu uma a le tupu o Solomona o auro ia, ma ipu uma o le fale o le vao o Lepanona o auro lelei ia. Sa leai ni ipu ario; ‘ua ta‘ufa‘atauva‘aina lava ario i ona po o Solomona.
21. Auā o va‘a o le tupu na folau atu ma ‘au‘auna a Hiramo i Tasesa, na fo‘i fa‘atasi i tausaga e tolu o va‘a Tasesa ma ‘aumai ai auro ma ario ma nifo o elefane ma kofi ma tuki.
22. ‘Ua silisili le tupu o Solomona i tupu uma o le lalolagi i le mau‘oa ma le poto.
23. ‘Ua sā‘ili atu fo‘i ‘iā Solomona o tupu uma o le lalolagi e fa‘alogo i lona poto na tu‘uina mai e le Atua i lona loto.
24. Na ta‘itasi i latou ma ‘aumai lana mea alofa, o ipu ario ma ipu auro ma ‘ofu, o ‘au‘upega ma mea manogi, o solofanua ma falata, i lea tausaga ma lea tausaga.
25. Sa ‘iā Solomona e fa afe o mea e tu‘u ai solofanua ma kariota; ma ‘au e ti‘eti‘e i solofanua e sefulu afe ma afe e lua; na ia tu‘uina i latou i ‘a‘ai o kariota ma Ierusalema fa‘atasi ma le tupu.
26. Na pule fo‘i o ia i tupu uma, e gata mai i le vaitafe, e gata mai fo‘i i le nu‘u o Filisitia e o‘o i le tuā‘oi o Aikupito.
27. Na fa‘ateleina e le tupu i Ierusalema o ario ‘ua fa‘apei o ma‘a, na ia fa‘ateleina fo‘i o arasi ‘ua fa‘apei o sukamoru i le fanua maulalo.
28. Na latou ‘aumaia ‘iā Solomona o solofanua mai Aikupito ma nu‘u uma.
29. O toe o mea na faia e Solomona, o mea muamua ma mea mulimuli, ‘ua lē tusia ‘ea i le tala a Natano le perofeta ma le valo‘aga a Akia o le Sailo, ma le fa‘aaliga ‘iā Itu le tagata va‘ai ‘iā Ierepoamo le atali‘i o Nepata.
30. O tausaga e fa sefulu na fai ai Solomona ma tupu ‘iā Isaraelu uma i Ierusalema.
31. ‘Ona ta‘oto ai lea o Solomona fa‘atasi ma ona tamā, ‘ua tanu fo‘i o ia i le ‘a‘ai a Tavita lona tamā; ‘ona soloa‘i ane ai lea o Reopoamo lona atali‘i e fai ma tupu.