1. ‘Ua amata Solomona ‘ona fai o le fale o le ALI‘I i Ierusalema i le mauga o Moria, i le mea na fa‘aalia mai ‘iā Tavita lona tamā, o le mea na saunia e Tavita, o le mea na sasa ai saito a Aruna le sa Iepusē.
2. ‘Ua amata e ia ‘ona fai o le fale i le lua o aso o le lua o masina, i le fa o tausaga o lana nofoa‘iga.
3. O fa‘avae lava ia na fai ai e Solomona le fale o le Atua. O le umi i kupita e fa‘atatau i le lua‘i fua e ono sefulu ona kupita ma le luafulu o kupita o lona lautele.
4. O le umi o le fa‘apaologa i luma e tusa ma le lautele o le fale, e luafulu ona kupita ma lona maualuga e selau ma le luafulu ona kupita; ‘ua ufi ai e ia i totonu i auro lelei.
5. A o le fale tele na ia tapapa i le la‘au o le perosi, na ia ufi ai fo‘i i auro lelei ma ‘ua avane i ai o pama, ma mea fa‘afilifili.
6. ‘Ua ufi e ia le fale i ma‘a tāua ‘ia matagofie; o le auro fo‘i o le auro o Parovaima.
7. ‘Ua ufi e ia le fale, o utupoto ma faitoto‘a ma ona pā ma ona puipui, i auro; na togitogi fo‘i o kerupi i pā.
8. ‘Ua ia faia fo‘i le fale e sili ‘ona pa‘ia, o lona umi e tusa ma le lautele o le fale, e luafulu o kupita ma lona lautele e luafulu o kupita; ‘ua ia ufi ai fo‘i i auro lelei, ‘ua ono selau o taleni.
9. O le mamafa o fao e lima sefulu o sekeli auro ia. ‘Ua ufi fo‘i e ia o afeafe aupitoaluga i auro.
10. ‘Ua ia faia fo‘i i le fale e sili ‘ona pa‘ia o kerupi e lua, i le galuega o ē togitogi mea ma na ufiufi i lā‘ua i auro.
11. O le umi o ‘apa‘au o kerupi e luafulu ona kupita; o le tasi ‘apa‘au e lima ona kupita, ‘ua o‘o i le pā o le fale; ma le tasi ‘apa‘au e lima ona kupita, ‘ua pa‘i atu i le ‘apa‘au o le tasi kerupi.
12. O le ‘apa‘au o le tasi kerupi e lima ona kupita, ‘ua o‘o i le pā o le fale; ma le tasi ‘apa‘au e lima ona kupita, ‘ua so‘o ane ma le ‘apa‘au o le tasi kerupi.
13. ‘Ua fa‘aloaloa atu ‘apa‘au o ia kerupi, e luafulu o kupita. ‘Ua la tutū i o la vae, na fa‘asaga fo‘i o la mata i totonu.
14. ‘Ua ia faia le ‘ie puipui i le ‘ie uli ma le pāuli ma le mūmū ma le ‘ie vavae ma na fai i ai o kerupi.
15. ‘Ua ia faia fo‘i i luma fale o pou e lua, e tolugafulu ma le lima o kupita le maualuga ma le kapetala i luga o pou ta‘itasi e lima kupita.
16. ‘Ua ia faia o mea fa‘afilifili, e pei ‘ona faia i le mea e fetalai mai ai ma ‘ua tu‘u ai i luga o pou; ‘ua ia faia fo‘i o rimoni e selau ma ‘ua tu‘u ai mea fa‘afilifili.
17. ‘Ua fa‘atūina e ia o pou i luma o le malumalu, o le tasi i le itū taumatau ma le tasi i le itū tauagavale; ‘ua ia fa‘aigoa le igoa o lē na i le itū taumatau o Iakina ma le igoa o lē na i le itū tauagavale o Poasa.#