1. E luafulu o tausaga o Aasa ‘ina ‘ua fai o ia ma tupu; o tausaga e sefulu ma le ono na fai ai o ia ma tupu i Ierusalema; a ‘ua lē faia e ia le amiotonu i luma o le ALI‘I, e pei o Tavita lona tamā;
2. a ‘ua savali o ia i ala o tupu o Isaraelu, ‘ua faia fo‘i e ia o tupua u‘amea o Paala.
3. ‘Ua ia fa‘amū fo‘i mea manogi i le vanu o le atali‘i o Hinoma ma susunu ana fānau i le afi, e tusa ma tu leaga a nu‘u ‘ese na tulia e le ALI‘I i luma o le fānauga a Isaraelu.
4. ‘Ua ia fai taulaga fo‘i ma fa‘amū mea manogi i mea maualuluga, i luga fo‘i o mauga, ‘atoa ma lalo o la‘au lauolaola uma.
5. ‘Ona tu‘uina atu ai lea o ia e le ALI‘I lona Atua i le lima o le tupu o Suria; ‘ua latou fasia fo‘i lana itūtau‘a ma ‘ua latou ‘ave fa‘atagataotau‘a ni o latou o le vao tagata e to‘atele ma avatu ai i Tamaseko. ‘Ua tu‘uina atu fo‘i o ia i le lima o le tupu o Isaraelu, ‘ua fasia fo‘i lana itūtau‘a i le fasi tele.
6. ‘Ua fasia e Peka le atali‘i o Remalia i Iuta o tagata e selau afe ma afe e luafulu i le aso e tasi, o toa uma ia; auā ‘ua tu‘ua e i latou o le ALI‘I le Atua o latou tamā.
7. O Sekari le toa o Efaraima, ‘ua ia fasiotia Maaseia le atali‘i o le tupu ma Aserikama le pule i le ‘āiga ma Elekana le aupito ane i le tupu.
8. ‘Ua ‘ave fa‘atagataotau‘a e le fānauga a Isaraelu o latou uso e ‘ua selau o afe, o fafine o tama ma teine ma mea fo‘i e tele ‘ua vete ‘iā te i latou, ma ‘ua ‘ave i Samaria mea na vetea mai.
9. Sa i ai fo‘i i lea mea o le perofeta a le ALI‘I, o Oteta lona igoa; ‘ua alu atu o ia i luma o ‘au na ō mai i Samaria ma ‘ua fa‘apea atu ‘iā te i latou, “Fa‘auta, sa to‘asā le ALI‘I le Atua o ‘outou tamā ‘iā Iuta, ‘ua tu‘uina mai ai i latou i o ‘outou lima ma ‘ua ‘outou fasioti ‘iā te i latou i le ita e pa‘i atu i le lagi.
10. O lenei fo‘i, ‘ua ‘outou manatu e fa‘apologaina le fānauga a Iuta ma Ierusalema fai ma ‘au‘auna tane ma ‘au‘auna fafine ‘iā te ‘outou; e lē o ‘iā te ‘outou ‘ea, o ‘outou lava, o agasala i le ALI‘I lo ‘outou Atua?
11. O lenei, ‘ia ‘outou fa‘alogo mai ‘iā te a‘u ma ‘ia toe tu‘uina atu o tagata o tau‘a ‘ua ‘outou ‘aumai fa‘atagataotau‘a o ‘outou uso; auā ‘ua i luga ‘iā te ‘outou le to‘asā tele o le ALI‘I.”
12. O isi ali‘i sili o le fānauga a Efaraima, o Asaraia le atali‘i o Ioanana, o Perekia le atali‘i o Meselemita, ma Iesekia le atali‘i o Saluma ma Amase le atali‘i o Atalai, ‘ua tula‘i i latou e finau ma i latou ē na ō mai i le tau‘a,
13. ‘ua fa‘apea atu ‘iā te i latou, “Tou te lē ‘aumai tagata o tau‘a ‘i‘inei; auā ‘ua nofo sala i tatou i le ALI‘I, ‘ua ‘outou manatu e fa‘aopoopo ‘iā tatou agasala ma lo tatou nofo sala; auā ‘ua matuā nofo sala i tatou, ‘ua ‘iā Isaraelu fo‘i le to‘asā tele.”
14. ‘Ona tu‘ua lea e le ‘au tau o tagata o tau‘a ma mea na vetea i luma o ali‘i, ‘atoa ma le fa‘apotopotoga uma.
15. ‘Ona tula‘i ai lea o tagata ‘ua ta‘ua o latou igoa, ma ‘ua latou ‘ave tagata o tau‘a ma fa‘a‘ofu ‘iā te i latou uma ē ‘ua lē lavalavā i mea na vetea ma fa‘a‘ofuina i latou ma fa‘ase‘evaeina i latou ma fafaga ‘iā te i latou ma fa‘ainu ‘iā te i latou ma fa‘au‘u ‘iā te i latou ma ‘ua fa‘ati‘eti‘e ‘iā i latou uma ē ‘ua vaivai i luga o asini ma ‘ua avatu ai i latou i o latou uso i Ieriko, o le ‘a‘ai o pama; ‘ona toe fo‘i ai lea o i latou i Samaria.
16. O ia ona po ‘ua alu ai le sāvali a le tupu o Aasa i tupu o Asuria ‘ia fesoasoani mai ‘iā te ia.
17. Auā sa toe ō mai o sa Etomā ma latou fasia Iuta ma latou ‘ave tagata o tau‘a.
18. Na vetea fo‘i e Filisitia o ‘a‘ai o nu‘u maulalo ma le itū i saute o Iuta, na latou faoa fo‘i o Petesemesa ma Ailona ma Kiterota ma Suka ma ona faoa ‘a‘ai, ma Timena ma ona faoa ‘a‘ai ma Kimeso ma ona faoa ‘a‘ai ma latou nonofo ai.
19. Auā na fa‘ato‘ilaloina e le ALI‘I o Iuta ‘ona o Aasa le tupu o Isaraelu; auā na leaga Iuta ‘iā te ia ma ‘ua agasala tele atu i le ALI‘I.
20. ‘Ua sau fo‘i ‘iā te ia o Tikila-pilesa le tupu o Asuria ma fa‘atigā ‘iā te ia, a ‘ua lē fesoasoani mai ‘iā te ia.
21. Auā na ‘ave e Aasa o mea nai le fale o le ALI‘I, ma le fale o le tupu ma fale o ali‘i, ‘ua avatu ai i le tupu o Asuria; a ‘ua na lē fesoasoani mai ‘iā te ia.
22. O aso fo‘i o lona puapuagā na atili ai ‘ona agasala atu o ia i le ALI‘I; o le tupu lea o Aasa.
23. ‘Ua ia fai taulaga fo‘i i atua o Tamaseko o ē na fasi ‘iā te ia; ‘ua ia fa‘apea atu, “Auā o atua o tupu o Suria o lo‘o fesoasoani ‘iā te i latou, ‘ou te fai taulaga ‘iā te i latou ‘ina ‘ia latou fesoasoani mai ‘iā te a‘u.” A ‘ua ‘avea i latou ma mea e malaia ai o ia, ‘atoa ma Isaraelu uma.
24. ‘Ua fa‘apotopoto fo‘i e Aasa o ipu uma o le fale o le Atua ma ‘ua tipitipi i ipu o le fale o le Atua ma ‘ua tapuni i faitoto‘a o le fale o le ALI‘I, ‘ua ia faia fo‘i mo ia o fatafaitaulaga i pito ‘a‘ai uma o Ierusalema.
25. ‘Ua faia fo‘i e ia i ‘a‘ai ta‘itasi uma o Iuta o mea maualuluga e fa‘amū ai mea manogi i atua ‘ese ma na fa‘a‘ono‘ono ai i le ALI‘I le Atua o ona tamā.
26. O toe o mea na faia e ia ma ana amio uma, o mea muamua ma mea mulimuli, fa‘auta, ‘ua tusia i le tusi i tupu o Iuta ma Isaraelu.
27. ‘Ua ta‘oto fo‘i Aasa fa‘atasi ma ona tamā ma ‘ua latou tanumia o ia i le ‘a‘ai o Ierusalema; a ‘ua lē ‘aumaia o ia i tu‘ugamau o tupu o Isaraelu; ‘ona soloa‘i ane ai lea o Esekia lona atali‘i e fai ma tupu.#