1. ‘Ua faia fo‘i e Iosia le paseka i le ALI‘I i Ierusalema ma ‘ua latou fasia le paseka i le sefulu ma le fa o aso o le masina muamua.
2. ‘Ona tofia lea e ia o le ‘au ositaulaga i o latou tofiga ma ‘ua na fa‘amalosi ‘iā te i latou i le galuega o le fale o le ALI‘I;
3. na fai atu o ia i sa Levī, o ē ‘ua fa‘apa‘iaina mo le ALI‘I, o ē ‘ua a‘oa‘o ‘iā Isaraelu uma, “‘Inā tu‘u ia le ‘atola‘au pa‘ia i le fale na faia e Solomona le atali‘i o Tavita le tupu o Isaraelu; e lē fai ai ma avega i o ‘outou ua; o lenei, ‘inā ‘au‘auna ia ‘outou i le ALI‘I lo ‘outou Atua ma lona nu‘u o Isaraelu,
4. ‘ia sauniuni fo‘i ‘outou i ‘āiga o ‘outou tamā, e tusa ma o ‘outou vasega, e fa‘atatau i le tusi a Tavita le tupu o Isaraelu, e fa‘atatau fo‘i i le tusi a Solomona lona atali‘i.
5. Ma ‘ia tutū ‘outou i le malumalu i vasega o ‘āiga o tamā o ‘outou uso, o tagata o le nu‘u ma vasega o ‘āiga o sa Levī.
6. ‘Ia ‘outou fasia fo‘i le paseka ma ‘ia fa‘apa‘iaina ‘outou e ‘outou ma ‘ia ‘outou sauniuni o ‘outou uso, ‘ina ‘ia latou fai e tusa ma le afioga a le ALI‘I ‘iā Mose.”
7. ‘Ona avatua lea e Iosia a‘i le lafu o tama‘i mamoe ma tama‘i ‘oti i le nu‘u, o manu uma ‘ia e fai ai le paseka mo i latou uma sa i ai, o le faitau aofa‘i e tolu sefulu o afe o manu ma le tolu o afe o povi; o mea ia na ‘aumai i mea a le tupu.
8. O ali‘i fo‘i sa ‘iā te ia na foa‘i ma le loto i le nu‘u ma le ‘au ositaulaga ma sa Levī, o Hilikia ma Sakaria, ma Ieielu, o ē pule i le fale o le Atua, ‘ua latou avatu i le ‘au ositaulaga mo le paseka, e lua afe ma le ono selau o manu, ma povi e tolu selau.
9. O Konania fo‘i ma Semaia ma Natanielu ona uso, ma Hasapea ma Ieielu ma Iosapata, o ali‘i o sa Levī, ‘ua latou avatu i sa Levī mo le paseka e lima afe o manu ma povi e lima selau.
10. ‘Ua saunia fo‘i le galuega ma ‘ua tutū le ‘au ositaulaga i mea latou te tutū ai ma sa Levī i o latou vasega, e tusa ma le poloa‘iga a le tupu.
11. ‘Ona latou fasia lea o le paseka ma ‘ua sausau le toto e le ‘au ositaulaga ai o latou lima, a ‘ua sae‘eseina o pa‘u e sa Levī.
12. ‘Ua tu‘u‘eseina e i latou o taulaga mū, ‘ina ‘ia latou avatua e tusa ma vasega o ‘āiga o tagata o le nu‘u, e fai taulaga i le ALI‘I e pei ‘ona tusia i le tusi a Mose. Sa fa‘apea fo‘i ‘ona fai i povi.
13. A ‘ua latou tunu le paseka i le afi e tusa ma le tu; a o isi taulaga pa‘ia ‘ua tunu i ‘ulo ma pani tele, ma pani salafa ma ‘ua tufatufa fa‘ata‘alise i tagata uma o le nu‘u.
14. E mulimuli ane ‘ua latou sauniuni mo i latou ma le ‘au ositaulaga; auā o le ‘au ositaulaga o le fānauga a Arona ‘ua mua ona osi taulaga mū ma ga‘o e o‘o i le po; o le mea lea ‘ua sauniuni ai e sa Levī mo i latou lava ma le ‘au ositaulaga o le fānauga a Arona.
15. O le ‘au pepese o le fānauga a Asafo sa i ai i latou i mea e tutū ai, e tusa ma le poloa‘iga a Tavita, ma Asafo ma Hemana ma Iutana o le tagata va‘ai a le tupu; ‘ua leoleo fo‘i le ‘au leoleo faitoto‘a i lea faitoto‘a ma lea faitoto‘a; e le‘i tu‘u e i latou o a latou galuega; a o latou uso o sa Levī, ‘ua latou sauniuni mo i latou.
16. Na uma ‘ona saunia le galuega uma a le ALI‘I i lea lava aso, e fai ai le paseka ma osi taulaga mū i luga o le fatafaitaulaga o le ALI‘I, e tusa ma le poloa‘iga a le tupu o Iosia.
17. O le fānauga a Isaraelu sa i ai ‘ua latou faia le paseka i ia ona po ma le tausamiga o areto e le fa‘afefeteina i aso e fitu.
18. E le‘i faia fo‘i se paseka fa‘apenā i Isaraelu talu i ona po o Samuelu le perofeta; e le‘i faia fo‘i e tupu uma o Isaraelu o se paseka e pei o lea na faia e Iosia ma le ‘au ositaulaga ma sa Levī ma Iuta uma, ma Isaraelu sa i ai ma ē ‘ua nonofo i Ierusalema.
19. Sa faia lenei paseka i le sefulu ma le valu o tausaga o le nofoa‘iga a Iosia.
20. ‘Ua mavae ia mea uma, ‘ua saunia fo‘i e Iosia le fale, ‘ona alu a‘e lea o Neko le tupu o Aikupito e tau ma Karekimisa i Eufirate; ‘ona alu atu ai lea o Iosia e tau ma ia.
21. A ‘ua ‘a‘auina mai e Neko o le sāvali ‘iā te ia, ‘ua fa‘apea mai, “Se a se mea ‘ua e mana‘o mai ai ‘iā te a‘u, o oe le tupu o Iuta? ‘Ou te le‘i alu atu e tau ma oe i lenei aso, a o le tasi ‘āiga matou te tau; auā na fetalai mai le Atua ‘iā te a‘u ‘ia fa‘ata‘alise; sōia lava oe, auā le Atua, o ia o lo‘o ‘iā te a‘u, ‘ina ne‘i fano oe ‘iā te ia.”
22. ‘Ae le‘i liliu ‘ese Iosia ‘iā te ia, a ‘ua ‘ofu ‘ese o ia, ‘ina ‘ia tau ma ia ma ‘ua lē fa‘alogo i ‘upu a Neko mai le fofoga o le Atua, a ‘ua alu atu o ia e tau le tau‘a i le vanu o Mekito.
23. ‘Ua fana atu o ē fanafana i u i le tupu o Iosia; ‘ona fai atu lea o le tupu i ana ‘au‘auna, “‘Ia ‘outou ‘ave ‘ese ‘iā te a‘u; auā ‘ua leaga lo‘u manu‘a.”
24. ‘Ona si‘itia lea o ia e ana ‘au‘auna a‘i lea kariota, ma ‘ua fa‘ati‘eti‘e ‘iā te ia i lona lua o kariota sa ‘iā te ia ma ‘ua latou ‘aumai ‘iā te ia i Ierusalema; ‘ua oti fo‘i o ia ma ‘ua tanumia o ia i tu‘ugamau o ona tamā. ‘Ua fa‘anoanoa Iuta uma ma Ierusalema ‘ona o Iosia.
25. ‘Ona lagi lea o le fatu e aualofa ai e Ieremia ‘ona o Iosia; o le ‘au pepese tane uma fo‘i ‘atoa ma le ‘au pepese fafine ‘ua latou ta‘uta‘u ‘iā Iosia ‘iā latou fatu e aualofa ai ‘ua o‘o i le aso nei, ‘ua fai ai ma tu ‘iā Isaraelu; fa‘auta fo‘i, ‘ua tusia i fatu e aualofa ai.
26. O toe o mea na faia e Iosia ma lona agalelei, e tusa ma mea ‘ua tusia i le tulafono a le ALI‘I,
27. o ana mea na fai, o mea muamua ma mea mulimuli, fa‘auta, ‘ua tusia i le tusi i tupu o Isaraelu ma Iuta.