1. E luafulu ma le lima o tausaga o Esekia ‘ina ‘ua fai o ia ma tupu ma ‘ua fai o ia ma tupu i Ierusalema i tausaga e luafulu ma le iva. O Avi le igoa o lona tinā, o le afafine o Sakaria.
2. Sa faia e ia le amiotonu i luma o le ALI‘I, e tusa ma mea uma na faia e Tavita lona tamā.
3. O le tausaga muamua o lana nofoa‘iga i le masina muamua ‘ua tatalaina e ia o faitoto‘a o le fale o le ALI‘I ma na toe teuteu ai.
4. ‘Ua ‘aumaia fo‘i e ia o le ‘au ositaulaga ma sa Levī ma ‘ua fa‘apotopotoina i latou i le malae i sasa‘e,
5. ‘ua ia fa‘apea atu fo‘i ‘iā te i latou, “O ‘outou o sa Levī, fa‘alogologo mai ia ‘iā te a‘u. ‘Inā fa‘apa‘iaina ia ‘outou e ‘outou ma ‘ia ‘outou fa‘apa‘iaina le fale o le ALI‘I le Atua o ‘outou tamā ma ‘ia ‘ave‘eseina mea leaga a‘i le malumalu,
6. Auā ‘ua agasala o tatou tamā ma ‘ua fai amio leaga i luma o le ALI‘I lo tatou Atua; ‘ua latou tu‘ua fo‘i o ia ma ‘ua liliu ‘ese o latou mata a‘i le afio‘aga a le ALI‘I, a ‘ua liliu mai ai o latou tua.
7. ‘Ua latou tapuni fo‘i i faitoto‘a o le fa‘apaologa, ma latou tineia lamepa ma ‘ua latou le fa‘amūina mea manogi, ‘ua latou le faia fo‘i taulaga mū i le mea pa‘ia i le Atua o Isaraelu.
8. ‘Ua o‘o mai ai le to‘asā o le ALI‘I ‘iā Iuta ma Ierusalema ma ‘ua tu‘uina atu i latou ‘ia fa‘aatuatuvaleina ma ‘ia fai ma mea e ofo ai ma ‘ia uisa ai, e pei ona va‘ava‘ai i ai o ‘outou mata.
9. Fa‘auta fo‘i, ‘ua fasia o tatou tamā i le pelu; o tatou atali‘i fo‘i ma o tatou afafine ma a tatou avā, ‘ua ‘avea fa‘atagataotau‘a ‘ona o lenei mea.
10. O lenei, o i ai i lo‘u loto e osi le feagaiga ma le ALI‘I le Atua o Isaraelu, ‘ina ‘ia mavae ‘ese ‘iā te i tatou le to‘asā tele.
11. O lenei, o o‘u atali‘i e, ‘aua tou te fa‘atamala; auā ‘ua filifilia ‘outou e le ALI‘I tou te tutū i ona luma e ‘au‘auna ‘iā te ia ma ‘ia ‘avea ‘outou ma ‘au‘auna ‘iā te ia ma fa‘amū ai mea manogi.”
12. ‘Ona tutū ai lea o sa Levī, o Makata le atali‘i o Amesai ma Ioelu le atali‘i o Asaraia, o isi o le fānauga a sa Koatō; ma nisi o le fānauga a Merari; o Kiso le atali‘i o Opeti, ma Asaraia le atali‘i o Ialeelu; o lo sa Keresonā fo‘i; o Ioaa le atali‘i o Sema ma Etena le atali‘i o Ioaa.
13. O isi o le fānauga a Elisafano; o Semeri ma Ieielu ma nisi o le fānauga a Asafo; o Sakaria ma Matania;
14. ma nisi o le fānauga o Hemana; o Ieielu, ma Semi; ma nisi o le fānauga a Iutana; o Semaia ma Asielu.
15. ‘Ua latou fa‘apotopotoina o latou uso ma ‘ua fa‘apa‘iaina i latou e i latou, ‘ua ō mai i latou e tusa ma le poloa‘iga a le tupu, i le afioga a le ALI‘I, e fa‘amamā i le fale o le ALI‘I.
16. ‘Ona ulu atu lea o le ‘au ositaulaga i totonu o le fale o le ALI‘I e fa‘amamā ai ma ‘ua latou ‘aumai i le lotoā o le fale o le ALI‘I o mea leaga uma na latou iloa i le malumalu o le ALI‘I. ‘Ona talia ai lea e sa Levī e ‘ave i fafo i le alia o Ketarono.
17. O le aso muamua o le masina muamua na latou amata ai ‘ona fa‘apa‘iaina, o le aso valu fo‘i o le masina ‘ua latou o‘o ai i le fa‘apaologa o le fale o le ALI‘I; ‘ua fa‘apa‘iaina e i latou le fale o le ALI‘I i aso e valu; o le aso e sefulu ma le ono o le masina muamua na fa‘auma ai.
18. ‘Ona latou ulufale mai lea ‘iā Esekia le tupu ma ‘ua fa‘apea mai, “‘Ua fa‘amamāina e i matou le fale uma o le ALI‘I ma le fata e fai ai taulaga mū ma ona ipu uma ma le laulau o areto e laulauina i luma ma ona ipu uma.
19. O ipu uma fo‘i na fa‘aleagaina e le tupu o Aasa i lana nofoa‘iga i lana agasala, ‘ua matou saunia ma ‘ua fa‘apa‘iaina, fa‘auta fo‘i, ‘ua i luma o le fatafaitaulaga o le ALI‘I.”
20. ‘Ona tula‘i lea i le taeao lava le tupu o Esekia ma na fa‘apotopotoina ali‘i o le ‘a‘ai ma latou ō a‘e i le fale o le ALI‘I.
21. ‘Ua latou ‘aumai fo‘i povi e fitu ma mamoe po‘a e fitu ma tama‘i mamoe e fitu ma ‘oti po‘a e fitu, e fai ma taulaga mo le agasala ‘ona o le mālō ma le malumalu ma Iuta. ‘Ua ia fai atu fo‘i i le ‘au ositaulaga o le fānauga a Arona ‘ia fai ai taulaga mū i luga o le fatafaitaulaga o le ALI‘I.
22. ‘Ona latou fafasi ai lea o povi ma ‘ua talia le toto e le ‘au ositaulaga ma sausau ai i le fatafaitaulaga; ‘ua latou fafasi fo‘i o mamoe po‘a ma ‘ua sausau le fatafaitaulaga i le toto; ‘ua latou fafasi fo‘i o tama‘i mamoe ma ‘ua sausau le fatafaitaulaga i le toto.
23. ‘Ona latou fa‘alatalata mai ai lea i luma o le tupu ma le fa‘apotopotoga o ‘oti po‘a e fai ma taulaga mo le agasala; ma latou fa‘ae‘e i ai o latou lima;
24. ‘ona fasi ai lea e le ‘au ositaulaga ma latou fai ai le taulaga mo le agasala i o latou toto i le fatafaitaulaga, e togiolaina a‘i Isaraelu uma; auā ‘ua fai atu le tupu ‘ia fai le taulaga mū ma le taulaga mo le agasala mo Isaraelu uma.
25. ‘Ua tofia fo‘i sa Levī i le fale o le ALI‘I ma sumepalo ma napeli ma kitara, e tusa ma le poloa‘iga a Tavita ma Kato le tagata va‘ai a le tupu ma Natano le perofeta; auā sa fa‘apea le poloa‘iga a le ALI‘I i ana perofeta.
26. ‘Ona tutū lea o sa Levī ma la‘aupese a Tavita, o le ‘au ositaulaga fo‘i ‘ua i ai pū.
27. ‘Ua fai atu fo‘i Esekia ‘ia fai le taulaga mū i le fatafaitaulaga. O le itūlā ‘ua amata ai ‘ona fai o le taulaga mū, ‘ua amata ai ‘ona pese i le ALI‘I ma pū ma la‘aupese na saunia e Tavita le tupu o Isaraelu.
28. ‘Ona ifo lea o le fa‘apotopotoga uma ma ‘ua pepese le ‘au pepese ma ‘ua ili pū le ‘au ili pū; sa fai pea ia mea uma ‘ina se‘ia uma le taulaga mū.
29. ‘Ua uma ‘ona fai o le taulaga mū, ‘ona to‘otuli ai lea o le tupu ma tagata uma sa fa‘atasi ma ia ma ‘ua latou ifo.
30. ‘Ua fai atu fo‘i Esekia le tupu ma ali‘i i sa Levī ‘ia vivi‘i i le ALI‘I i ‘upu a Tavita ma Asafo le tagata va‘ai. ‘Ua latou vivi‘i atu ma le fiafia ma ‘ua latou punonou ma ifo.
31. ‘Ona fai atu lea o Esekia, na fa‘apea atu, “O lenei, ‘ua tofia ‘outou e ‘outou mo le ALI‘I, fa‘alatalata mai ia ma ‘aumai ai taulaga ma taulaga fa‘afetai i le fale o le ALI‘I.” ‘Ona ‘aumai ai lea e le fa‘apotopotoga o taulaga ma taulaga fa‘afetai; na ‘aumai ai fo‘i o taulaga mū e i latou uma na manatu i ai o latou loto.
32. O le faitau o taulaga mū na ‘aumai e le fa‘apotopotoga, o povi e fitugafulu, o mamoe po‘a e tasi le selau ma tama‘i mamoe e lua selau; o mea uma ia sa fai a‘i taulaga mū i le ALI‘I.
33. O mea fo‘i sa fa‘asāina o povi e ono selau ma mamoe e tolu o afe.
34. A ‘ua to‘aitiiti le ‘au ositaulaga, ‘ua lē mafaia ‘ona sae‘eseina le pa‘u o taulaga mū uma; ‘ona fesoasoani ai lea o latou uso o sa Levī ‘iā te i latou ‘ina se‘ia uma le tofia, ‘ina se‘ia uma fo‘i ‘ona fa‘apa‘iaina o isi o le ‘au ositaulaga; auā ‘ua sili ‘ona tonu o loto o sa Levī latou te fa‘apa‘iaina i latou i lo le ‘au ositaulaga.
35. ‘Ua tele fo‘i taulaga mū ma le ga‘o o taulaga fa‘afetai ma taulaga i mea e inu mo taulaga mū ta‘itasi. ‘Ua fa‘apea ‘ona saunia o le galuega o le fale o le ALI‘I.
36. ‘Ua fiafia Esekia ‘atoa ma le nu‘u uma ‘ina ‘ua saunia le nu‘u e le Atua; auā sa fa‘afuase‘i ‘ona fai o lenei mea.