1. ‘Ua alu le fe‘au a Esekia ‘iā Isaraelu uma ‘atoa ma Iuta ma ‘ua tusi atu tusi ‘iā Efaraima ma Manase, ‘ia ō mai i latou i le fale o le ALI‘I i Ierusalema, e fai le paseka i le ALI‘I le Atua o Isaraelu.
2. Auā na filifili e le tupu ma ali‘i sa ‘iā te ia ma le fa‘apotopotoga uma i Ierusalema, e fai ai le paseka i le lua o masina.
3. Auā ‘ua lē mafai ‘ona fai ai i ia ona po, auā o le ‘au ositaulaga e le‘i uma ‘ona fa‘apa‘iaina i latou e i latou; o le nu‘u fo‘i e le‘i fa‘apotopotoina i latou i Ierusalema.
4. ‘Ua tonu lenei mea i le manatu o le tupu ‘atoa ma le manatu o le fa‘apotopotoga uma.
5. ‘Ua latou fa‘amauina le filifiliga e tala‘i atu ‘iā Isaraelu uma e gata mai i Peresepa e gata mai i Tanu, ‘ia ō mai i latou e fai le paseka i le ALI‘I le Atua o Isaraelu i Ierusalema; auā ‘ua latou le faia tele pei ‘ona tusia.
6. ‘Ua ō atu ma tusi a le tupu ma ali‘i sa ‘iā te ia o ē ‘avea fe‘au ‘iā Isaraelu uma ‘atoa ma Iuta, e tusa fo‘i ma le poloa‘iga a le tupu, ‘ua fa‘apea atu,“Le fānauga a Isaraelu e, ‘ia ‘outou toe fo‘i mai i le ALI‘I le Atua o Aperaamo ma Isaako ma Isaraelu, ‘ona toe fo‘i mai lea o ia ‘iā te ‘outou o totoe, ‘ua sao i lima o tupu o Asuria.
7. ‘Aua ne‘i fa‘apei o ‘outou tamā ‘outou ma fa‘apei o ‘outou uso, na agasala atu i le ALI‘I le Atua o latou tamā, ‘ona tu‘uina atu ai lea o i latou e ia ‘ia fa‘atafunaina, e pei ‘ona ‘outou iloa atu.
8. O lenei, ‘aua le fa‘ama‘a‘a o ‘outou ua, e pei o ‘outou tamā; ‘ia ‘outou tu‘uina atu ‘outou i le ALI‘I, ma ō mai i lona malumalu ‘ua fa‘apa‘iaina e ia e fa‘avavau; ma ‘ia ‘au‘auna i le ALI‘I lo ‘outou Atua, ‘ina ‘ia liliu ‘ese ai ‘iā te ‘outou lona to‘asā tele.
9. ‘Āfai tou te toe fo‘i mai i le ALI‘I e alofaina ai o ‘outou uso ma a ‘outou fānau i luma o ē ‘ua fa‘atagataotau‘aina i latou ma latou toe fo‘i mai i lenei lava nu‘u; auā o le ALI‘I o lo ‘outou Atua e alofa fua ma alofa mutimutivale, e le ‘alo fo‘i ona fofoga ‘iā te ‘outou, pe ‘āfai tou te toe fo‘i mai ‘iā te ia.”
10. ‘Ona ui atu ai lea o ē ‘avea fe‘au i lea ‘a‘ai ma lea ‘a‘ai i le nu‘u o Efaraima ma Manase, e o‘o atu lava i Sepulona; a ‘ua latou tapisa ‘iā te i latou ma fa‘atauemu ‘iā te i latou.
11. ‘Ae peita‘i o isi tagata o Asera ma Manase ma Sepulona, ‘ua latou fa‘amaulalo ma ‘ua ō mai ai i Ierusalema.
12. Sa i ai fo‘i ‘iā Iuta le ‘a‘ao o le Atua e foa‘i mai ‘iā te i latou le loto gatasi ‘ina ‘ia faia le poloa‘iga a le tupu ma ali‘i, e tusa ma le afioga a le ALI‘I.
13. ‘Ona fa‘apotopoto lea o tagata o to‘atele i Ierusalema e fai ai le tausamiga o areto e le fa‘afefeteina i le lua o masina, o le fa‘apotopotoga e matuā tele lava.
14. ‘Ona tutū ai lea o i latou i luga ma latou ‘ave‘eseina fatafaitaulaga sa i Ierusalema ma fata uma e fa‘amū ai mea manogi ‘ua latou ‘ave‘eseina, ma latou lafo atu ai i le alia o Ketarono.
15. ‘Ua latou fasia fo‘i le paseka i le sefulu ma le fa o aso o le lua o masina; sa māsiasi fo‘i le ‘au ositaulaga ma sa Levī, ‘ona latou fa‘apa‘iaina lea o i latou ma ‘aumai ai o taulaga mū i le fale o le ALI‘I.
16. ‘Ua tutū i latou i le mea e tutū ai i latou e pei o a latou masani, e tusa ma le tulafono a Mose le tagata o le Atua; ‘ua sausau fo‘i le toto o le ‘au ositaulaga, na latou talia mai lima o sa Levī.
17. Auā ‘ua to‘atele i le fa‘apotopotoga e le‘i fa‘apa‘iaina; ‘ua fasia fo‘i e sa Levī o paseka mo i latou uma ‘ua lē mamā, ‘ina ‘ia fa‘apa‘iaina i latou i le ALI‘I.
18. Auā e to‘atele o le nu‘u, e to‘atele mai Efaraima ma Manase ma Isakara ma Sepulona, ‘ua latou le fa‘amamā ‘iā te i latou, a ‘ua latou ‘a‘ai le paseka e lē tusa ma le mea ‘ua tusia. A ‘ua tatalo Esekia mo i latou, ‘ua fa‘apea atu, “‘Ia fa‘amāgalo mai e le ALI‘I lē agalelei,
19. ‘ia i latou uma lava o ē saunia o latou loto e sā‘ili‘ili i le Atua, o le ALI‘I le Atua o latou tamā, e ui lava ‘ina ‘ua lē fa‘amamāina e tusa ma le fa‘amamāina o le malumalu.”
20. ‘Ua fa‘afofogaina Esekia e le ALI‘I ma ‘ua fa‘amālōlōina e ia le nu‘u.
21. O le fānauga a Isaraelu na i ai i Ierusalema na faia e i latou le tausamiga o areto e le‘i fa‘afefeteina ma le fiafia tele lava i aso e fitu; na vivi‘i atu fo‘i sa Levī ma le ‘au ositaulaga i le ALI‘I i lea aso ma lea aso i la‘aupese e vivi‘i atu ai i le ALI‘I.
22. ‘Ua fa‘amafanafana atu Esekia i sa Levī uma o ē na a‘oa‘o ‘ia mafaufau lelei i le ALI‘I; ‘ua latou ‘a‘ai fo‘i i le tausamiga i aso e fitu, o fai taulaga fa‘afetai, ma latou fa‘afetai atu i le ALI‘I le Atua o latou tamā.
23. ‘Ona filifili lea e le fa‘apotopotoga uma e fai le tausamiga i nisi aso e fitu; ‘ona latou faia lea i nisi aso e fitu ma le fiafia.
24. Auā na avatua e Esekia le tupu o Iuta i le fa‘apotopotoga o povi po‘a e tasi le afe ma mamoe o fitu afe; na avatua fo‘i e ali‘i i le fa‘apotopotoga o povi po‘a e tasi le afe ma mamoe e sefulu afe; e to‘atele fo‘i o le ‘au ositaulaga na fa‘apa‘iaina i latou e i latou.
25. ‘Ua fiafia le fa‘apotopotoga uma o Iuta, ‘atoa ma le ‘au ositaulaga ma sa Levī ma le fa‘apotopotoga uma na ō mai nai Isaraelu ma tagata ‘ese na ō mai nai le nu‘u o Isaraelu ma ē sa nonofo i Iuta.
26. Sa i ai fo‘i le fiafia tele i Ierusalema; auā e le‘i i ai se mea fa‘apea i Ierusalema talu ona po o Solomona le atali‘i o Tavita le tupu o Isaraelu.
27. ‘Ona tutū ai lea o le ‘au ositaulaga, o sa Levī, ma latou fa‘amanuia atu i le nu‘u; sa fa‘afofogaina fo‘i e le ALI‘I o latou leo ma ‘ua o‘o atu a latou tatalo i lona afio‘aga pa‘ia, o le lagi lava.#