1. ‘Ua uma fo‘i ‘ona fai o le galuega uma na faia e Solomona mo le fale o le ALI‘I; ‘ona ‘aumaia lea e Solomona o mea na fa‘asāina e Tavita lona tamā, o ario ma auro, ‘atoa ma mea uma, ‘ua ia tu‘u fa‘atasia ma ‘oloa o le fale o le Atua.
2. ‘Ona fa‘apotopotoina lea e Solomona o toeaina o Isaraelu ma matai uma o itū‘āiga, o ali‘i sili o le fānauga a Isaraelu, i Ierusalema, e ‘ava‘e le ‘atola‘au o le feagaiga a le ALI‘I nai le ‘a‘ai a Tavita, o Siona lea.
3. ‘Ona fa‘apotopotoina mai lea i le tupu o tagata uma o Isaraelu i le tausamiga, o le fitu o masina lea.
4. ‘Ua ō mai toeaina uma o Isaraelu; ‘ona ‘ava‘e lea e sa Levī o le ‘atola‘au.
5. ‘Ua ‘aumaia e i latou le ‘atola‘au ma le fale fetāfa‘i o le fa‘apotopotoga ma mea pa‘ia uma na i le fale fetāfa‘i, na ‘aumaia ia lava mea e le ‘au ositaulaga ma sa Levī.
6. O le tupu o Solomona ma le fa‘apotopotoga uma o Isaraelu, na fa‘apotopotoina mai ‘iā te ia i luma o le ‘atola‘au, ‘ua latou fai taulaga i mamoe ma povi, e le mafaitauina, e lē masino lava, ‘ina ‘ua tele lava.
7. ‘Ua ‘ave e le ‘au ositaulaga le ‘atola‘au o le feagaiga a le ALI‘I i le mea e tu‘u ai, i le mea e fetalai mai ai o i le fale, o le mea e sili ‘ona pa‘ia, i lalo o ‘apa‘au o kerupi;
8. auā na fa‘aloaloa e kerupi o la ‘apa‘au i luga o le mea e tu‘u ai le ‘atola‘au ma ‘ua fa‘amalumalu ifo ai kerupi i le ‘atola‘au ma ona amo.
9. ‘Ua latou fa‘asili mai amo, na iloa fo‘i pito o amo a‘i le ‘atola‘au i luma o le mea e fetalai mai ai; ‘ae le‘i iloa i fafo. O lo‘o i ai ‘ua o‘o i ona po nei.
10. Na le i ai se mea i le ‘atola‘au, ‘ua na o papa e lua na tu‘u ai e Mose i Horepa, ‘ina ‘ua osia le feagaiga e le ALI‘I ma le fānauga a Isaraelu, ‘ina ‘ua latou ō mai nai Aikupito.
11. ‘Ua ulufafo mai le ‘au ositaulaga nai le mea pa‘ia, auā sa fa‘apa‘iaina le ‘au ositaulaga uma ‘ua i ai, ‘ua latou le tausi i vasega.
12. O sa Levī fo‘i o ē pepese, o i latou uma o sa Asafō ma sa Hemanā ma sa Iutanā ma o latou atali‘i, ma o latou uso, ‘ua ‘o‘ofu i ‘ie vavae, ‘ua i ai sumepalo ma napeli ma kitara, ‘ua tutū i le itū i sasa‘e o le fatafaitaulaga, ‘ua fa‘atasi ma i latou le ‘au ositaulaga e to‘aselau ma le to‘aluafulu i latou o ili pū.
13. O ē ili pū ma ē o pepese ‘ua peiseaī o se to‘atasi, ‘ua tasi le leo i le vi‘iga ma le fa‘amanū i le ALI‘I; ‘ua latou pepese fa‘atasi ma pū ma sumepalo, ma la‘aupese, e vivi‘i atu ai i le ALI‘I, o lo‘o fa‘apea atu:“Auā e lelei o ia,auā e fa‘avavau lava lona alofa,”‘Ona tumu ai lea o le fale i le ao, o le fale lava o le ALI‘I.
14. ‘Ua lē mafai ai e le ‘au ositaulaga ‘ona tutū e ‘au‘auna ‘ona o le ao; auā na tumu le fale o le Atua i le pupula o le ALI‘I.#