1. ‘Ua fa‘ai‘u e Solomona lana tatalo, ‘ona pa‘ū ifo ai lea o le afi mai le lagi, ‘ua fa‘aumatia ai le taulaga mū ma taulaga; ‘ua tumu fo‘i le fale i le pupula o le ALI‘I.
2. ‘Ua lē mafaia fo‘i e le ‘au ositaulaga ‘ona ulufale i le fale o le ALI‘I, auā ‘ua tumu le fale o le ALI‘I i le pupula o le ALI‘I.
3. ‘Ua iloa e le fānauga a Isaraelu uma o le afi ‘ua pa‘ū ifo ma le pupula o le ALI‘I i luga o le fale, ‘ona latou fa‘apa‘u‘ū faō ai lea i le paepae ma latou ifo, ma vivi‘i atu i le ALI‘I, ‘ua fa‘apea atu,“Auā e lelei o ia;auā e fa‘avavau lona alofa.”
4. ‘Ona fai taulaga lea i luma o le ALI‘I o le tupu, ‘atoa ma le nu‘u uma.
5. ‘Ua faia e Solomona le tupu o le taulaga o povi e lua sefulu o afe ma afe e lua ma mamoe e selau afe ma afe e luafulu; ‘ua fa‘aulufaleina ai le fale o le Atua e le tupu ma le nu‘u uma.
6. ‘Ua tutū atu le ‘au ositaulaga i o latou tofi; o sa Levī fo‘i ‘ua i ai la‘aupese a le ALI‘I, na faia e Tavita le tupu e vivi‘i atu ai i le ALI‘I, auā e fa‘avavau lona alofa; o ia mea na vivi‘i atu ai e Tavita; ‘ua ili pū le ‘au ositaulaga i o latou luma, ‘ua tutū mai fo‘i o Isaraelu uma.
7. ‘Ua fa‘apa‘iaina fo‘i e Solomona i totonu o le lotoā i luma o le fale o le ALI‘I; auā na osia ai e ia o taulaga mū ma ga‘o o taulaga fa‘afetai, auā o le fatafaitaulaga ‘apamemea na faia e Solomona e le‘i ofi ai taulaga mū ma taulaga i mea e ‘ai ma ga‘o.
8. O ona po ia na fai ai e Solomona ‘atoa ma Isaraelu uma fa‘atasi ma ia o le tausamiga e fitu ona aso, o le fa‘apotopotoga tele lava, e gata mai i le mea e ui atu ai i Amato, e gata mai i le alia o Aikupito.
9. O le aso valu ‘ua latou fai ai le fa‘apotopotoga; auā o le fa‘asāina o le fatafaitaulaga na faia i aso e fitu, e fitu fo‘i aso o le tausamiga.
10. O le luafulu ma le tolu o aso o le fitu o masina na tu‘uina atu ai e ia o le nu‘u e ō i o latou fale ‘ie, ‘ua ‘oli‘oli ma loto fiafia ‘ona o mea lelei na faia e le ALI‘I ‘iā Tavita ma Solomona ma lona nu‘u o Isaraelu.
11. ‘Ua fa‘auma e Solomona le fale o le ALI‘I ma le fale o le tupu; o mea uma fo‘i na loto Solomona e fai i le fale o le ALI‘I ma lona fale, na faia e ia ma le manuia.
12. ‘Ona fa‘aali mai lea o le ALI‘I ‘iā Solomona i le po, ‘ua fa‘apea mai ‘iā te ia, “‘Ua ‘ou fa‘alogo i lau tatalo ma ‘ua ‘ou filifilia lenei mea mo a‘u e fai ma fale e fai ai taulaga.
13. ‘Āfai ‘ou te pupuni le lagi ma ‘ua lē timu ai, ‘āfai fo‘i ‘ou te fai atu i sē ‘akava e fa‘aumatia le fanua, ‘āfai fo‘i ‘ou te tu‘uina atu le fa‘ama‘i i lo‘u nu‘u;
14. ‘āfai e fa‘amaulalo lo‘u nu‘u ē ‘ua ta‘ua i lo‘u igoa ma latou tatalo ma sā‘ili‘ili ‘iā te a‘u ma liliu ‘ese i o latou ala leaga, ‘ona ‘ou fa‘alogo ai lea mai le lagi ma fa‘amāgalo ‘iā latou agasala ma fa‘aolaina lo latou nu‘u.
15. O lenei, e va‘ava‘ai o‘u mata ma liliu o‘u taliga i le tatalo e faia i lenei mea.
16. Auā ‘ua ‘ou filifilia ma fa‘apa‘iaina lenei fale, ‘ina ‘ia i ai lo‘u igoa e fa‘avavau; e fa‘asaga i ai fo‘i o‘u mata ma lo‘u loto i aso uma.
17. A o oe, ‘āfai ‘e te savali i o‘u luma e pei ‘ona savali lou tamā o Tavita ma e faia ‘ia tusa ma mea uma na ‘ou fai atu ai ‘iā te oe ma e tausi a‘u tulafono ma a‘u fa‘amasinoga;
18. ‘ona ‘ou fa‘atumauina lea o le nofoāli‘i o lou mālō, e fa‘apei ‘ona mā osia le feagaiga ma lou tamā o Tavita, ‘ua fa‘apea atu, ‘E le motu lou gafa e pule ‘iā Isaraelu.’
19. “‘Ae ‘āfai tou te liliu ‘ese ma tu‘ua a‘u tulafono ma a‘u poloa‘iga, ‘ua ‘ou tu‘uina atu i o ‘outou luma, ma ‘outou ō atu ma ‘au‘auna atu i atua ‘ese ma ifo ‘iā te i latou;
20. ‘ona ‘ou lia‘iina atu lea o i latou a‘i lo‘u lau‘ele‘ele ‘ua ‘ou foa‘iina atu ‘iā te i latou; o lenei fale fo‘i, ‘ua ‘ou fa‘apa‘iaina mo lo‘u igoa, ‘ou te lafoa‘i atu ai i o‘u luma ma ‘ou faia ma ‘upu fa‘atusa ma tauemuga i nu‘u uma lava.
21. O lenei fale fo‘i, o lo‘o ‘ua maualuga, e fai ma mea e ofo ai i latou uma o ē ui ane ai ma fai ane, ‘Se a le mea ‘ua fa‘apea ai ‘ona fai e le ALI‘I i lenei nu‘u ma lenei fale?’
22. ‘Ona tali mai lea o i latou, ‘Auā ‘ua latou tu‘ua le ALI‘I le Atua o latou tamā o lē na ‘aumai ‘iā te i latou nai le nu‘u o Aikupito ma latou tāofi i atua ‘ese, ma ifo atu ‘iā te i latou ma ‘au‘auna atu ‘iā te i latou; o le mea lea ‘ua fa‘ao‘oina ai e ia lenei malaia uma ‘iā te i latou.’”