1. ‘Ua o‘o Reopoamo i Ierusalema, ‘ona fa‘apotopoto ai lea e ia o le ‘āiga o Iuta ma Peniamina e selau afe ma afe e valu sefulu, o ē ‘ua filifilia, o ē ‘ua taulia tau‘a, e tau ma Isaraelu, ‘ia toe maua mai le mālō ‘iā Reopoamo.
2. A ‘ua tulei mai le afioga a le ALI‘I ‘iā Semaia le tagata o le Atua, ‘ua fa‘apea mai,
3. ‘Inā fai atu ia ‘iā Reopoamo le atali‘i o Solomona le tupu o Iuta, i le ma Isaraelu uma o i Iuta ma Peniamina, ‘ia fa‘apea atu,
4. O lo‘o fa‘apea ‘ona fetalai mai o le ALI‘I, “‘Aua ne‘i ō a‘e, ‘aua ne‘i tou si‘i atu le tau‘a i o ‘outou uso; ‘ia ta‘itasi ‘outou ma fo‘i atu i lona ‘āiga; auā e mai ‘iā te a‘u lenei mea.” ‘Ona latou fa‘alogo lea i le afioga a le ALI‘I, ‘ua liliu ‘ua lē ō atu e tau ma Ierepoamo.
5. ‘Ua nofo Reopoamo i Ierusalema ma ‘ua faia e ia o ‘a‘ai e fai ma ‘olo i Iuta.
6. ‘Ua faia e ia o Peteleema ma Etama ma Tikoa,
7. ma Petesura ma Suka ma Atulama,
8. ma Kata ma Maresa ma Sifi,
9. ma Aturaima ma Lakisa ma Aseka,
10. ma Soraa ma Ailona ma Heperona, o i Iuta ma Peniamina ia, o ‘a‘ai nofo ‘olo.
11. Na fa‘amalosia e ia o ‘olo ma ‘ua tu‘u i ai o ali‘i, ma le faupu‘e o mea e ‘ai ma suāu‘u ma uaina.
12. Na tu‘u fo‘i e ia o talipupuni ma tao i lea ‘a‘ai ma lea ‘a‘ai ma ‘ua faia ‘ia matuā malosi; o Iuta ma Peniamina ‘ua ‘au fa‘atasi ma ia.
13. ‘Ua ō mai fo‘i ‘iā te ia le ‘au ositaulaga ma sa Levī sa i Isaraelu uma mai o latou nu‘u uma.
14. Auā na tu‘ua e sa Levī o latou tuāfanua ma o latou tofi ma ‘ua ō mai i Iuta ma Ierusalema; auā ‘ua fa‘ate‘a‘eseina i latou e Ierepoamo ma ona atali‘i i le faiva o ositaulaga i le ALI‘I.
15. A ‘ua ia tofia mo ia o ositaulaga o mea maualuluga ma aitu ma tama‘i povi na ia faia.
16. Mulimuli ‘iā te i latou ‘ona ō mai o i latou mai itū‘āiga uma o Isaraelu o ē ‘ua tu‘u i o latou loto e sā‘ili i le ALI‘I le Atua o Isaraelu na ō mai i latou i Ierusalema e faitaulaga i le ALI‘I le Atua o latou tamā.
17. ‘Ua latou fa‘atumauina le mālō o Iuta ma latou fa‘amalosia Reopoamo le atali‘i o Solomona i tausaga e tolu; auā ‘ua latou sāvavali i le ala o Tavita ma Solomona i tausaga e tolu.
18. ‘Ona fai avā lea o Reopoamo ‘iā Maalata le afafine o Ieremota o le atali‘i o Tavita ma Aviaila le afafine o Eliapo le atali‘i ia o Iese.
19. Na fānau ai ‘iā te ia o atali‘i; o Iuso ma Semaria ma Saama.
20. E mulimuli ane ‘iā te ia, na ia fai avā ‘iā Maaka le afafine o Apisaloma; na fānau ai ‘iā te ia o Avia ma Atai ma Sesa ma Salome.
21. ‘Ua sili le loto o Reopoamo ‘iā Maaka le afafine o Apisaloma i ana avā uma ma ana palake; (auā e to‘asefulu ma le to‘avalu ana avā ma palake e to‘aono sefulu ma ‘ua fānaua e ia o atali‘i e to‘alua sefulu ma le to‘avalu ma afafine e to‘aono sefulu.)
22. ‘Ua tofia e Reopoamo o Avia o le tama a Maaka e fai ma ali‘i sili e pule i ona uso; auā o lona manatu e fai o ia ma tupu.
23. Na ia fai fa‘autauta ma fa‘anonofosoloina ona atali‘i uma i nu‘u uma o Iuta ma Peniamina, i ‘a‘ai nofo ‘olo uma; ‘ua foa‘i e ia ‘iā te i latou o mea e ‘ai e tele. ‘Ua sā‘ili fo‘i e ia o avā e to‘atele.