1. ‘Ua mavae tausaga e luafulu na fai ai e Solomona le fale o le ALI‘I ma lona lava fale.
2. O ‘a‘ai fo‘i na tu‘uina mai e Hiramo ‘iā Solomona ‘ua toe faia e Solomona ma na fa‘anonofo ai le fānauga a Isaraelu.
3. ‘Ua alu atu fo‘i Solomona i Amato-sopa ma ‘ua manumālō ai.
4. ‘Ua fai fo‘i e ia o Tatemora i le vao ma ‘a‘ai uma e tu‘u ai ‘oloa na ia faia i Amato.
5. ‘Ua faia fo‘i e ia o Peteorana i luga ma Peteorana i lalo, o ‘a‘ai nofo ‘olo, ‘ua i ai pā ma puipui ma fa‘amaufa‘alava;
6. o Paalata fo‘i ma ‘a‘ai uma sa ‘iā Solomona e tu‘u ai ‘oloa ma ‘a‘ai uma mo kariota ma ‘a‘ai mo ē ti‘eti‘e i solofanua ma mea uma na finagalo i ai Solomona e fai i Ierusalema ma Lepanona ma nu‘u uma ‘ua pule ai o ia.
7. O tagata uma na totoe o sa Hetī ma sa Amorī, ma sa Perisē ma sa Hivī ma sa Iepusē, e le ni Isaraelu i latou,
8. o a latou fānau na totoe i le nu‘u, ‘ina ‘ua mavae i latou, o ē na lē fa‘aumatia e le fānauga a Isaraelu, na pule Solomona ‘iā te i latou ‘ia fai taulaga, ‘ua o‘o lava i ona po nei.
9. A ‘ua lē faia e Solomona ni o le fānauga a Isaraelu ma pologa e fai ai lana galuega; a o tagata tau i latou ma ali‘i ‘ave ‘au ma ali‘i e pule i ana kariota, ma ana ‘au e ti‘eti‘e solofanua.
10. O ali‘i ia ē na tofia e le tupu o Solomona e pule, e lua selau ma le to‘alimagafulu, o i latou na pule i le nu‘u.
11. ‘Ua ‘ava‘e e Solomona le afafine o Farao mai le ‘a‘ai a Tavita i le fale na ia faia mo ia; auā ‘ua fa‘apea mai o ia, “E lē nofo la‘u avā i le fale o Tavita le tupu o Isaraelu, auā e pa‘ia le mea ‘ua ‘aumai i ai le ‘atola‘au a le ALI‘I.”
12. ‘Ona fai lea e Solomona o taulaga mū i le ALI‘I i luga o le fatafaitaulaga o le ALI‘I na faia e ia i luma o le fa‘apaologa,
13. o le aso ma le mea e fai taulaga a‘i e tusa ma le poloa‘iga a Mose, e fai i sapati ma masina fa‘ato‘ā va‘aia ma fa‘apotopotoga e ta‘iatutolu i tausaga, o le tausamiga o le areto e le fa‘afefeteina ma le tausamiga o vaiasosa ma le tausamiga o fale apitaga.
14. ‘Ua tofia fo‘i e ia e tusa ma le tofiga a Tavita lona tamā, o vasega o le ‘au ositaulaga ‘iā latou galuega ma sa Levī i o latou tofi, e vivi‘i ma ‘au‘auna i luma o le ‘au ositaulaga, o le aso ma le mea e fai ai; o leoleo faitoto‘a fo‘i i o latou vasega i lea faitoto‘a ma lea faitoto‘a; auā sa fa‘apea le poloa‘iga a Tavita le tagata o le Atua.
15. ‘Ua lē tu‘ua le fetalaiga a le tupu i le ‘au ositaulaga ma sa Levī, i mea uma lava, ‘atoa ma le ‘oloa.
16. O galuega uma a Solomona sa saunia, ‘ua o‘o i le aso na tu‘u ai le fa‘avae o le fale o le ALI‘I e o‘o fo‘i i le aso na uma ai. ‘Ua fa‘aumaina ‘ona fai o le fale o le ALI‘I.
17. ‘Ona alu atu lea o Solomona i Esiokape ma Elata i le matāfaga o le sami i le nu‘u o Etoma.
18. ‘Ua ‘aumaia e Hiramo ‘iā te ia i lima o ana ‘au‘auna o va‘a ma ona tagata ‘ua masani ma le sami; ‘ua latou ō fa‘atasi ma ‘au‘auna a Solomona i Ofeira, ma latou ‘aumai ai o auro e fa selau ma le limagafulu o taleni ma latou ‘aumaia i le tupu o Solomona.#