1. ‘Ua ta‘oto Avia fa‘atasi ma ona tamā, ‘ua latou tanu fo‘i ‘iā te ia i le ‘a‘ai a Tavita. ‘Ona soloa‘i ane ai lea o lona atali‘i o Asa e fai ma tupu. O lana nofoa‘iga sa filemū ai le nu‘u i tausaga e sefulu.
2. ‘Ua amio lelei ma amiotonu Asa i luma o le ALI‘I lona Atua.
3. ‘Ua ‘ave‘eseina e ia o fatafaitaulaga i atua ‘ese, ma mea maualuluga, ‘ua ia nutinini‘ia fo‘i tupua ma ‘ua vavae i lalo o tupua o Asaira.
4. ‘Ua ia fai atu ‘iā Iuta ‘ia sā‘ili i le ALI‘I le Atua o latou tamā ma usiusita‘i i le tulafono ma le poloa‘iga.
5. ‘Ua ia ‘ave‘esea fo‘i o mea maualuluga ma tupua o le la, i ‘a‘ai uma o Iuta. Sa filemū le nu‘u i lana nofoa‘iga.
6. ‘Ua faia e ia o ‘a‘ai nofo ‘olo i Iuta; auā ‘ua filemū le nu‘u, ‘ua leai fo‘i se tau‘a ‘iā te ia i ia tausaga; auā ‘ua foa‘iina mai e le ALI‘I le filemū ‘iā te ia.
7. ‘Ua fa‘apea atu fo‘i o ia ‘iā Iuta, “‘Inā tatou fai ia o ia ‘a‘ai ma si‘osi‘o ai i pā ma ‘olo ma puipui ma fa‘amaufa‘alava, manū o i o tatou luma le lau‘ele‘ele; auā na tatou sā‘ili i le ALI‘I lo tatou Atua, ‘ua tatou sā‘ili‘ili ‘iā te ia, ‘ua foa‘iina mai ai e ia le filemū ‘iā te i tatou i itū uma.” ‘Ona latou faia lea ma ‘ua manuia.
8. O ‘au a Asa, mai ‘iā Iuta e tolu selau o afe o ē ‘ave tali pupuni ma tao; mai ‘iā Peniamina fo‘i e lua selau o afe ma le valu sefulu o afe o ē ‘ave talitā ma fanafana i ‘aufana. O toa malolosi i latou uma.
9. ‘Ona ō mai lea o Sera le Aitiope ma ‘au e afe o afe ma kariota e tolu selau e tau ma i latou; na ō mai fo‘i i Maresa.
10. ‘Ona alu atu lea o Asa e tau ma ia ma ‘ua latou tofia le tau‘a i le vanu o Sefata i Maresa.
11. ‘Ona vala‘au atu lea o Asa i le ALI‘I lona Atua, ‘ua fa‘apea atu, “Le ALI‘I e, e lē se mea faigatā ‘iā te oe ‘ona fesoasoani i ē to‘atele, po o i latou ‘ua leai se malosi. Le ALI‘I e, lo matou Atua, ‘ia e fesoasoani mai ‘iā te i matou; auā matou te fa‘alagolago ‘iā te oe, ‘ua matou ō atu i lou suafa lava e tau ma lenā to‘atele. Le ALI‘I e, o oe lava lo matou Atua; ‘aua ne‘i manumālō mai tagata ‘iā te oe.”
12. ‘Ona fasia lea e le ALI‘I o Aitiope i luma o Asa ma luma o Iuta; ‘ona sōsōla ai lea o Aitiope.
13. ‘Ua tulimuli‘au ‘iā te i latou e Asa ma le nu‘u sa ‘iā te ia ‘ua o‘o i Kira; ‘ua fasia Aitiope, ‘ua leai so latou olataga; auā sa fa‘aumatia i latou i luma o le ALI‘I ma luma fo‘i o lana itūtau‘a; ‘ua latou ‘ave fo‘i vete e matuā tele.
14. ‘Ua fasia fo‘i e i latou o ‘a‘ai uma na vagavagai i Kira; auā ‘ua o‘o ‘iā te i latou le mata‘u i le ALI‘I; ‘ua vetea e i latou o ‘a‘ai uma; auā ‘ua matuā tele le vete sa i ai.
15. ‘Ua lepetia fo‘i e i latou fale o manu ma ‘ua ‘aumaia mamoe ma kamela e matuā tele ma latou toe fo‘i mai i Ierusalema.