1. ‘Ua mavae ia mea, mōna ‘ua fa‘atumauina ai, ‘ona sau ai lea o Sanerivi le tupu o Asuria, ‘ua o‘o mai i Iuta ma tolauapi i ‘a‘ai nofo ‘olo ma ‘ua manatu o ia e lepeti ai e fai mōna.
2. ‘Ua iloa e Esekia ‘ua sau Sanerivi ma fa‘asaga mai o ia e tau ma Ierusalema,
3. ‘ona filifili lea o ia ma ali‘i ‘ua ‘iā te ia ma ana fitafita e pupuni i vaipuna ‘ua i tua o le ‘a‘ai; ‘ua latou fesoasoani fo‘i ‘iā te ia.
4. ‘Ona fa‘apotopoto ai lea o tagata e to‘atele ma ‘ua latou pupuni i vaipuna uma ma le alia ‘ua tafe i totonu o le nu‘u, ‘ua fa‘apea ane, “E ō mai i se a tupu o Asuria ma latou maua o vai e tele?”
5. ‘Ua fa‘amalosia o ia e ia ma ‘ua toe fai le pā uma ‘ua solo ma ‘ua ati a‘e ia o‘o i ‘olo ma le tasi pā i tua, ‘ua ia fa‘amalosia fo‘i o Milo i le ‘a‘ai a Tavita ma ‘ua faia tao ma talitā e tele;
6. ‘ona tofia lea e ia o ali‘i e taulia tau‘a e pule i le nu‘u ma ‘ua fa‘apotopotoina i latou i le malae i le faitoto‘a o le ‘a‘ai ma ‘ua fa‘amafanafana atu ‘iā te i latou, ‘ua fa‘apea atu,
7. “‘Ia ‘outou fa‘amalosi ma loto tetele, ‘aua le fefefe, ‘aua fo‘i tou te matata‘u ‘ona o le tupu o Asuria, ‘ona o le vao tagata uma fo‘i ‘ua fa‘atasi ma ia; auā e to‘atele o ‘iā te i tatou, ‘ae to‘aitiiti o ‘iā te ia.
8. O ‘iā te ia le lima o le tagata, a o ‘iā te i tatou le ALI‘I lo tatou Atua e fesoasoani mai ‘iā te i tatou, ma tau ai o tatou tau‘a.” ‘Ua fa‘alagolago fo‘i le nu‘u i ‘upu a Esekia le tupu o Iuta.
9. ‘Ua mavae ia mea, ‘ona ‘a‘auina atu lea e Sanerivi le tupu o Asuria o ana ‘au‘auna i Ierusalema, (a o ia ma lana itūtau‘a uma sa ‘iā te ia, na tau ma Lakisa,) ‘iā Esekia le tupu o Iuta, ‘atoa ma Iuta uma sa i Ierusalema, ‘ua fa‘apea atu,
10. “O lo‘o fa‘apea ‘ona fetalai mai o Sanerivi le tupu o Asuria, Pe se a se mea ‘ua ‘outou fa‘atuatua i ai tou te nonofo ai i le ‘olo i Ierusalema?
11. E lē o fa‘aosoina ‘ea ‘outou e Esekia ‘ia ‘outou tu‘uina ‘outou ‘ia oti i le oge ma le fia inu, o lo‘o fa‘apea atu, ‘O le ALI‘I lo tatou Atua na te lavea‘i ‘iā te i tatou a‘i le lima o le tupu o Asuria?’
12. E lē ‘ua ‘ave‘eseina ‘ea e lea lava Esekia ana mea maualuluga ma ona fatafaitaulaga ma ‘ua fai atu ‘iā Iuta ma Ierusalema, ‘ua fa‘apea atu, ‘Tou te ifo i luma o le fatafaitaulaga e tasi ma fa‘amū ai mea manogi i ona luga?’
13. Tou te lē o iloa ‘ea o mea na faia e a‘u ma o‘u tamā i tagata uma o isi nu‘u? ‘Ua mafaia ‘ea e atua o ia nu‘u ‘ona lavea‘i i o latou nu‘u a‘i lo‘u lima?
14. Po o ai se tasi o atua uma o ia nu‘u na fa‘aumatia e o‘u tamā, ‘ua mafaia ‘ona lavea‘i lona nu‘u a‘i lo‘u lima, ‘ina ‘ia mafaia e lo ‘outou Atua ‘ona lavea‘i ‘iā te ‘outou a‘i lo‘u lima?
15. O lenei, ‘aua ne‘i ‘olegia ‘outou e Esekia ma fa‘aosoina ‘outou fa‘apenā, ‘aua fo‘i tou te fa‘atuatua ‘iā te ia; auā e lē mafaia e se atua o nu‘u uma ma mālō, ‘ona lavea‘i lona nu‘u a‘i lo‘u lima, ma lima o o‘u tamā; ‘ae maise fo‘i lava lo ‘outou Atua na te lē lavea‘iina ‘outou a‘i lo‘u lima.”
16. A ‘ua fa‘aopoopoina e ana ‘au‘auna ‘ona fai ‘upu i le ALI‘I le Atua ma Esekia lana ‘au‘auna.
17. ‘Ua ia tusi mai fo‘i o tusi e fāifai ai i le ALI‘I le Atua o Isaraelu ma fa‘aleaga ‘iā te ia, ‘ua fa‘apea, “E pei o atua o tagata o isi nu‘u, ‘ua lē mafaia ‘ona lavea‘i o latou nu‘u a‘i lo‘u lima, e fa‘apea ‘ona lē lavea‘iina e le Atua o Esekia lona nu‘u a‘i lo‘u lima.”
18. ‘Ona vala‘au lea o i latou ‘ua leo tele i le gagana a Iuta i tagata o Ierusalema sa i luga o le pā, e fa‘amata‘u ‘iā te i latou ma fa‘aatuatuvale ‘iā te latou, ‘ina ‘ia maua e i latou le ‘a‘ai.
19. ‘Ua latou ‘upu leaga i le Atua o Ierusalema, e pei ‘ona ‘upu leaga i atua o nu‘u o le lalolagi na faia e lima o tagata.
20. ‘Ona tatalo atu ai lea o Esekia le tupu ma Isaia le perofeta le atali‘i o Amota ma la ‘alalaga atu i le lagi ‘ona o lenei mea.
21. ‘Ona ‘auina mai ai lea e le ALI‘I o le agelu ma ‘ua fa‘aumatia e ia o toa malolosi uma ma ta‘ita‘i ma ali‘i ‘ave ‘au sa i le toagalauapi a le tupu o Asuria; ‘ona toe fo‘i atu lea o ia ma le mā i lona nu‘u. ‘Ua ulufale atu o ia i le fale o lona atua, ‘ona fasia lea o ia i lea mea e ana lava fānau i le pelu.
22. ‘Ua fa‘asaoina e le ALI‘I o Esekia ma ē ‘ua nonofo i Ierusalema a‘i le lima o Sanerivi le tupu o Asuria ma lima o nu‘u uma ma ‘ua leoleo ‘iā te i latou i itū uma.
23. E to‘atele fo‘i na ‘aumai taulaga i le ALI‘I i Ierusalema ma ‘oloa tāua ‘iā Esekia le tupu o Iuta. Sa mamalu fo‘i o ia i luma o nu‘u uma talu mai ai.
24. O ia ona po sa ma‘i ai Esekia ‘ua tāli oti ma ‘ua tatalo atu o ia i le ALI‘I; ‘ona fetalai mai ai lea o ia ‘iā te ia ma na tu‘uina mai ‘iā te ia se fa‘ailoga.
25. A ‘ua lē toe avatu e Esekia e tusa ma le mea alofa na faia ‘iā te ia; auā na fa‘amaualuga lona loto; sa o‘o ai le to‘asā ‘iā te ia ma Iuta ma Ierusalema.
26. A ‘ua toe fa‘amaulalo Esekia ‘ona o le fa‘amaualuga o lona loto, o ia ‘atoa ma ē ‘ua nonofo i Ierusalema, ‘ona lē o‘o mai ai lea o le to‘asā o le ALI‘I ‘iā te i latou i ona po o Esekia.
27. Sa ‘iā Esekia le ‘oloa ma le mamalu, e matuā tele lava; na ia faia fo‘i mo ia o mea e teu ai ario ma auro ma ma‘a tāua ma mea manogi ma talitā ma teuga matagofie uma;
28. o fale fo‘i e tu‘u ai saito ma uaina ma suāu‘u; ma mea e nonofo ai manu ‘ese‘ese uma ma mea e nonofo ai lafu manu.
29. ‘Ua ia faia fo‘i ‘a‘ai mōna ma lafu mamoe ma lafu povi e tele; auā na foa‘iina mai e le Atua ‘iā te ia o mea e matuā tele lava.
30. O Esekia lenei na pupuni le vaipuna aupito i luga i Kiona ma ‘ua ta‘i tonu ifo i le itū i sisifo o le ‘a‘ai a Tavita. Sa manuia fo‘i Esekia i mea uma na ia faia.
31. ‘Ae peita‘i o le sāvali a ali‘i o Papelonia, na latou ‘auina mai ‘iā te ia e fesili i le vāvega sa faia i le nu‘u, sa tu‘ua ai o ia e le Atua ‘ina ‘ia tofotofo ‘iā te ia, ‘ia iloa ai mea uma ‘ua i lona loto.
32. O toe o mea sa faia e Esekia ma lona agalelei, fa‘auta, ‘ua tusia i le fa‘aaliga ‘iā Isaia le perofeta, le atali‘i o Amota ma le tusi i tupu o Iuta ma Isaraelu.
33. ‘Ua ta‘oto fo‘i Esekia fa‘atasi ma ona tamā ma latou tanumia o ia i le ā‘ega i tu‘ugamau o le fānauga a Tavita. Sa fa‘ane‘ene‘e ‘iā te ia o Iuta uma ma ē ‘ua nonofo i Ierusalema i lona oti. ‘Ona soloa‘i ane ai lea o Manase lona atali‘i e fai ma tupu.