1. ‘Ona ‘ave ai lea e le nu‘u uma o Iuta ‘iā Usia i le sefulu ma le ono o ona tausaga ma ‘ua tofia o ia e fai ma tupu sui a‘i lona tamā o Amasia.
2. ‘Ua ia faia Elata ma na toe tu‘uina mai ai ‘iā Iuta, ‘ina ‘ua ta‘oto le tupu fa‘atasi ma ona tamā.
3. E sefulu ma le ono o tausaga o Usia, ‘ina ‘ua fai o ia ma tupu, ‘ua fai fo‘i o ia ma tupu i tausaga e limagafulu ma le lua i Ierusalema. O Iekalia fo‘i le igoa o lona tinā, o le Ierusalema ia.
4. ‘Ua ia faia le amiotonu i luma o le ALI‘I, e tusa ma mea uma na faia e lona tamā o Amasia.
5. ‘Ua ia sā‘ili atu i le Atua i ona po o Sakaria o lē sa poto i fa‘aaliga mai le Atua; o aso fo‘i na ia sā‘ili atu ai i le ALI‘I sa fa‘amanūina o ia e le Atua.
6. ‘Ua alu atu fo‘i o ia ‘ua tau ma Filisitia ma sōloia le pā o Kata ma le pā o Iapene ma le pā o Asetota, ma ‘ua faia e ia o ‘a‘ai i Asetota ma Filisitia.
7. ‘Ua fesoasoani mai fo‘i le Atua ‘iā te ia e tau ma Filisitia ma tagata o Arapi o ē nonofo i Kuro-paala ma tagata o Maona.
8. ‘Ua ‘aumaia fo‘i e tagata o Amoni o taulaga ‘iā Usia; ‘ua ‘avea fo‘i lona logo e o‘o atu i le ala e ui ai i Aikupito; auā na ia matuā fa‘amalosi lava.
9. ‘Ua faia e Usia ‘olo i Ierusalema i luga o le faitoto‘a o le tulimanu ma luga o le faitoto‘a o le vanu ma luga o le tulimanu o le pā, ‘ua na faia ‘ia malolosi.
10. ‘Ua faia fo‘i e ia o ‘olo i le vao ma ‘ua ‘eli vai‘eli e tele; auā sa ‘iā te ia o lafu manu e tele i le nu‘u maulalo ma le ‘ele‘ele laugatasi; o tagata galuefanua fo‘i ma tagata galuevine i mauga ma Karamelu; auā sa fiafia o ia i galuega i le fanua.
11. Sa ‘iā Usia o ‘au, o tagata tau o ē na ō atu i fua‘i ‘au e tau ai tau‘a, e tusa ma le faitau aofa‘i o i latou e Ieielu le tusi‘upu ma Maaseia le faipule, e i le pule fo‘i a Hanania, o le tasi ali‘i ‘ave ‘au a le tupu.
12. O le faitau aofa‘i o matai sili, o toa malolosi, e lua afe ma le ono o selau.
13. ‘Ua latou pule i ‘au tau e tolu selau o afe ma le fitu o afe ma le lima o selau, o ē taulia tau‘a ma le loto tetele, e fesoasoani i le tupu e tau ma ē ita mai.
14. ‘Ua saunia fo‘i e Usia mo ia ‘au uma o talitā ma tao ma pulou tau ma ‘ofu tau u‘amea ma ‘aufana ma ma‘a o ma‘atā.
15. ‘Ua faia e ia i Ierusalema o mea e fana a‘i, ‘ua mafaufauina e tagata popoto i galuega ma tu‘u ai i luga o ‘olo ma luga o tulimanu o le pā, e fana a‘i ū ma ma‘a tetele. ‘Ua o‘o atu lona logo i mea mamao; auā e ma‘eu le fesoasoani ‘iā te ia, ‘ua o‘o ‘ina malosi lava o ia.
16. ‘Ua malosi o ia, ‘ona fa‘amaualugaina lea o lona loto, e i‘u ai i lona malaia; auā ‘ua ia agasala atu i le ALI‘I, lona Atua, ‘ua alu atu i le malumalu o le ALI‘I e fa‘amū ai mea manogi i luga o le fata e fa‘amū ai mea manogi.
17. ‘Ona mulimuli atu lea ‘iā te ia o Asaraia le ositaulaga, ‘atoa ma le ‘au ositaulaga a le ALI‘I e to‘avalugafulu fa‘atasi ma ia, o tagata loto tetele;
18. ‘Ona latou tete‘e lea ‘iā Usia le tupu, ‘ua latou fa‘apea atu ai, “Usia e, ‘e te lē ‘aiā ‘ona fa‘amū o mea manogi i le ALI‘I, a o le ‘au ositaulaga o le fānauga a Arona, ‘ua fa‘apa‘iaina i latou e fa‘amū ai mea manogi; maliu ‘ese ia oe i le malumalu; auā ‘ua e agasala lava; e lē o‘o ai ‘iā te oe se mamalu mai le ALI‘I le Atua.”
19. ‘Ona ita ai lea o Usia, sa i lona lima le ipu e mū ai mea manogi; o lo‘o ita o ia i le ‘au ositaulaga, ‘ona tupu loa lea o le lepela i lona muaulu i luma o le ‘au ositaulaga i le fale o le ALI‘I, i tafatafa o le fata e mū ai mea manogi.
20. ‘Ua va‘ava‘ai atu ‘iā te ia o Asaraia le ositaulaga sili ma le ‘au ositaulaga uma, fa‘auta fo‘i, ‘ua i ai ‘iā te ia le lepela i lona muaulu, ‘ona latou tuli atu ai lea ‘iā te ia a‘i lea mea; o ia fo‘i ‘ua fa‘ata‘alise ‘ona alu i fafo, auā ‘ua taia o ia e le ALI‘I.
21. Sa lepela Usia le tupu ‘ua o‘o i le aso na oti ai, ma ‘ua fale‘esea o ia, ‘ina ‘ua lepela; auā ‘ua fa‘ate‘a‘eseina o ia i le fale o le ALI‘I. O Iotama fo‘i lona atali‘i na pule i le ‘āiga o le tupu, o fa‘amasino e ia o tagata o le nu‘u.
22. O toe o mea na faia e Usia, o mea muamua ma mea mulimuli, ‘ua tusia e Isaia le perofeta o le atali‘i o Amota.
23. ‘Ua ta‘oto Usia fa‘atasi ma ona tamā ma latou tanumia o ia fa‘atasi ma ona tamā i le fanua e tanu ai ‘ua i tupu; auā ‘ua fa‘apea a latou, “O ia o le lepela.” ‘Ona soloa‘i ane ai lea o Iotama lona atali‘i e fai ma tupu.#