1. ‘Ua o‘o mai le Agaga o le Atua ‘iā Asaraia le atali‘i o Oteta;
2. ‘ona alu atu ai lea o ia e fa‘afetaia‘i ‘iā Asa ma ‘ua fa‘apea atu ‘iā te ia, “Asa e ma Iuta uma, ‘atoa ma Peniamina, ‘ia ‘outou fa‘afogafoga mai ‘iā te a‘u; e ‘iā te ‘outou le ALI‘I, pe a ‘outou i ai ‘iā te ia; ‘āfai fo‘i tou te sā‘ili‘ili ‘iā te ia, tou te maua o ia; ‘ae ‘āfai e tu‘ua o ia e ‘outou, e tu‘ua ‘outou e ia.
3. ‘Ua tele lava aso ‘ua aunoa ai Isaraelu ma le Atua moni ma ‘ua aunoa ma se ositaulaga e a‘oa‘o atu, ‘ua aunoa fo‘i ma le tulafono.
4. A ‘ua latou liliu mai i le ALI‘I le Atua o Isaraelu ‘ina ‘ua puapuagātia i latou ma ‘ua sā‘ili‘ili ‘iā te ia ‘ona maua ai lea o ia e i latou.
5. O ona po ia na lē i ai se filemū i lē alu atu ma lē fo‘i mai, a ‘ua tele le atuatuvale ‘iā i latou uma sa nonofo i nu‘u.
6. Na tu‘imomoia fo‘i o le tasi nu‘u e le tasi nu‘u ma le tasi ‘a‘ai e le tasi ‘a‘ai; auā sa fa‘aatuatuvaleina i latou e le Atua i puapuagā uma lava.
7. ‘Ia fa‘amalolosi ‘outou, ‘aua fo‘i tou te lima vaivai; auā e tauia a ‘outou galuega.”
8. ‘Ua fa‘alogo Asa i na ‘upu ma le valo‘aga a Oteta le perofeta, ‘ona fa‘amalosi ai lea o ia ma na ‘ave‘eseina o mea leaga i le nu‘u uma o Iuta ma Peniamina, ‘atoa ma ‘a‘ai fo‘i na ia faoa i le mauga o Efaraima ma ‘ua toe teuteu le fatafaitaulaga o le ALI‘I sa i luma o le fa‘apaologa o le fale o le ALI‘I.
9. ‘Ua fa‘apotopotoina fo‘i e ia o Iuta uma ‘atoa ma Peniamina ma tagata ‘ese na ‘iā te i latou mai Efaraima ma Manase ‘atoa ma Simeona; auā na sōsōla mai i latou ‘iā te ia e to‘atele mai Isaraelu, ‘ina ‘ua latou iloa ‘ua ‘iā te ia o le ALI‘I lona Atua.
10. ‘Ona fa‘apotopoto mai lea o i latou i Ierusalema i le tolu o masina i le sefulu ma le lima o tausaga o le nofoa‘iga a Asa.
11. ‘Ona latou faitaulaga ai lea i le ALI‘I i lea lava aso, i povi e fitu selau ma mamoe e fitu o afe, a‘i mea na latou vetea mai.
12. ‘Ua latou faia fo‘i le feagaiga ‘ia sā‘ili i le ALI‘I le Atua o latou tamā ma le loto ‘atoa ma le agaga ‘atoa;
13. ai se tasi e le sā‘ili i le ALI‘I le Atua o Isaraelu e fasiotia o ia, o se tama po o sē ‘ua matua, o se tane po o se fafine.
14. ‘Ua latou tu‘uautapu i le ALI‘I ma le leo tele ma le ‘alaga fiafia ma pū ma foafoa.
15. ‘Ua fiafia Iuta uma i le tu‘uautapuga; auā ‘ua latou tu‘uautapu ai ma le loto ‘atoa ma ‘ua latou sā‘ili‘ili atu ‘iā te ia ma o latou mana‘o uma; ‘ua latou maua fo‘i o ia. ‘Ua foa‘iina mai o le ALI‘I le filemū ‘iā te i latou i itū uma.
16. O Maaka fo‘i o le tinā o Asa le tupu, ‘ua ia fa‘ate‘a iā te ia, ‘ia lē fai o ia ma sa‘o tama‘ita‘i, auā na ia faia le tupua o Asaira; ‘ua vavae i lalo e Asa lana tupua ma ‘ua nutipalaina ma susunuina i le alia o Ketarono.
17. ‘Ae le‘i ‘ave‘eseina o mea maualuluga i Isaraelu; a o le loto o Asa ‘ua sao lea i ona aso uma.
18. ‘Ua ‘aumai fo‘i e ia i le fale o le Atua o mea na fa‘asāina e lona tamā ma mea fo‘i na fa‘asāina e ia, o ario ma auro ma ipu.
19. ‘Ua leai fo‘i se toe tau‘a ‘ua o‘o i le tolugafulu ma le lima o tausaga o le nofoa‘iga a Asa.#